حرومتاۋ اۋدانىنداعى ءدوڭ اۋىلىنىڭ تۇرعىنى اينۇر جولدىباەۆا «اۋىل اماناتى» اياسىندا 2,5%-دىق مولشەرلەمەمەن 6,5 ملن تەڭگە قارىز الدى. بۇل قاراجاتقا ناۋبايحانا اشقان ول قازىر اۋىل تۇرعىندارىن كۇندەلىكتى جاڭا پىسكەن نانمەن جانە باسقا دا ونىمدەرمەن قامتاماسىز ەتەدى. كاسىپكەردىڭ ايتۋىنشا, جوبانىڭ ارقاسىندا وتباسىنىڭ ورتاشا تابىسى ايتارلىقتاي وسكەن.
ءدوڭ اۋىلىنىڭ تاعى ءبىر تۇرعىنى اسىلحان تەمىرحانوۆ «اۋىل اماناتى» بويىنشا جەڭىلدىكپەن 3,5 ملن تەڭگە قارىز العان. بۇل قاراجاتقا 500 تاۋىق ساتىپ الىندى. مەكيەن تاۋىقتار كۇنىنە ورتا ەسەپپەن 350 جۇمىرتقا بەرەدى. ولار اۋىل تۇرعىندارى اراسىندا جوعارى سۇرانىسقا يە.
اقتوبە وبلىسىنىڭ اكىمى ەرالى توعجانوۆ ۇكىمەت باسشىسىنا وڭىردە «اۋىل اماناتى» باعدارلاماسىنىڭ قالاي ىسكە اسىرىلىپ جاتقانى تۋرالى ەگجەي-تەگجەيلى ايتىپ بەردى.
«جوبا 2022 جىلعى قاراشا ايىندا باستالدى. وعان كىرىسپەس بۇرىن ءبىز ءار اۋىلعا سكرينينگ جۇرگىزىپ, العاش رەت بارلىق 134 اۋىلدىق وكرۋگتىڭ الەۋمەتتىك-ەكونوميكالىق دامۋ جوسپارىن ازىرلەدىك. جوبانى قارجىلاندىرۋعا رەسپۋبليكالىق بيۋدجەتتەن 6,5 ملرد تەڭگە ءبولىندى. بيىل قىركۇيەك ايىندا قوسىمشا 12,5 ملرد تەڭگە بولىنەدى دەپ كۇتىلۋدە», دەدى ءوڭىر باسشىسى.
پرەمەر-مينيستر ازاماتتاردىڭ ءال-اۋقاتىن ارتتىرۋ ۇكىمەتتىڭ نەگىزگى مىندەتتەرىنىڭ ءبىرى ەكەنىن اتاپ ءوتتى.
«اۋىل اماناتى» جوباسىن ىسكە اسىرۋ تاجىريبەسى بارلىق وڭىرگە كەڭىنەن تارالۋى ءتيىس. بيىل وعان 100 ملرد تەڭگە ءبولىندى, سونىڭ ەسەبىنەن اۋىلدا كوپتەگەن كاسىپكەرلىك باستامانى قولداۋ جوسپارلانىپ وتىر. كەلەسى جىلى تاعى 100 ملرد تەڭگە بولەمىز. جوبانىڭ ارقاسىندا اۋىلدىق ەلدى مەكەندەردە ءومىر ءسۇرۋ دەڭگەيى ايتارلىقتاي جاقسارماق. اقتوبە وبلىسى – جوبانى ىسكە اسىرۋ بويىنشا جەتەكشى وڭىرلەردىڭ ءبىرى. وسى قارقىنمەن بۇل جۇمىستى جالعاستىرۋ قاجەت», دەدى ءاليحان سمايىلوۆ.
قازىرگى ۋاقىتتا ءوڭىر تۇرعىندارى «اۋىل اماناتى» اياسىندا 6,5 ملرد تەڭگە سوماعا 1 486 جوبانى قارجىلاندىرۋعا ءوتىنىم بەردى. 1 389 جوبا ماقۇلدانىپ, ونىڭ 930-ى 4 ملرد تەڭگەگە قارجىلاندىرىلدى. ناتيجەسىندە 1 122 جاڭا جۇمىس ورنى قۇرىلىپ, 103 مىڭنان استام قۇس ساتىپ الىندى, 48 جىلىجاي سالىندى, 146 گا القاپقا كارتوپ جانە باسقا دا كوكونىستەر ەگىلدى, سونداي-اق اۋىلدا 389 جاڭا شاعىن بيزنەس نىسانى اشىلدى (ناۋبايحانا, ەت, ءسۇت وڭدەۋ بويىنشا شاعىن تسەحتار جانە ت.ب.).
سونىمەن قاتار اقتوبە وبلىسىندا كەپىلگە قوياتىن مۇلكى جوق از قامتىلعان وتباسىلاردى قولداۋ ءۇشىن تاۋارلىق نەسيە بەرۋ تەتىگى ەنگىزىلدى. ءىرى شارۋا قوجالىقتارى ولارعا اتالعان شارتتارمەن مال باسىن نەسيەگە بەرۋدە. مۇنداي نەسيە 3-5 جىل ىشىندە كوبەيگەن مالدىڭ ءبىر بولىگىمەن قايتارىلادى. بۇگىنگى تاڭدا شارۋا قوجالىقتارىنىڭ قولداۋىمەن 329 وتباسىنا 4 580 باس مال بەرىلدى.
