فوتو: پرەمەر-ءمينيستردىڭ رەسمي اقپاراتتىق رەسۋرسى
اقتوبە كتق پايدالانۋعا 1981 جىلى بەرىلگەن. قازىرگى ۋاقىتتا نەگىزگى قۇرىلىستاردىڭ تەحنيكالىق جاعدايى ناشار, توزۋى 80%-عا جەتكەن. بۇگىندە جاڭا كتق سالۋدىڭ تەحنيكالىق-ەكونوميكالىق نەگىزدەمەسى ازىرلەنىپ, قۇجات مەملەكەتتىك ساراپتامادان وڭ قورىتىندى الىپ ۇلگەرگەن. سونىمەن قاتار قۇجاتتامانى دايىنداۋدان باستاپ, نىساندى پايدالانۋعا بەرۋگە دەيىنگى ءىس-شارالاردى كوزدەيتىن جوبانى جۇزەگە اسىرۋدىڭ جول كارتاسى بەكىتىلدى.
اقتوبە وبلىسىنىڭ اكىمى ەرالى توعجانوۆتىڭ ايتۋىنشا, كتق سالۋ اقتوبە قالاسىنىڭ نەگىزگى ەكولوگيالىق پروبلەمالارىنىڭ ءبىرى – اۋانىڭ كۇكىرتتى سۋتەگىمەن لاستانۋىنا قاتىستى ماسەلەنى شەشۋگە مۇمكىندىك بەرەدى.
سونىمەن قاتار پرەمەر-مينيستر اقتوبە قالاسىنىڭ ەكولوگيالىق ماسەلەلەرىن شەشۋ جەرگىلىكتى اتقارۋشى ورگانداردىڭ باسىم مىندەتتەرىنىڭ ءبىرى ەكەنىن اتاپ ءوتتى.
«كاسىپورىنداردان شىعاتىن زياندى قالدىقتار اقتوبە قالاسىن جايلاعان جاعىمسىز ءيىستىڭ نەگىزگى سەبەبى بولىپ وتىر. قوقىس پوليگونىندا قايتا-قايتا ءورت شىعىپ, ونسىز دا كۇردەلى ەكولوگيالىق احۋالعا زيان كەلتىرۋدە. قوقىس شىعارۋ قىزمەتتەرىنىڭ جۇمىسى دا اقتوبەلىكتەردىڭ ورىندى نارازىلىعىن تۋدىرىپ وتىر. وسى ماسەلەلەردىڭ بارلىعىنا وبلىس اكىمدىگى ءجىتى نازار اۋدارىپ, ولاردى شەشۋ ءۇشىن جەدەل شارالار قابىلداۋى قاجەت», دەدى ءاليحان سمايىلوۆ.
ۇكىمەت باسشىسى جىل سوڭىنا دەيىن جاڭا كارىز تازارتۋ قۇرىلىستارىن سالۋعا قاتىستى بارلىق قۇجاتتامانى دايىنداۋدى اياقتاپ, الداعى 2–2,5 جىلدا قالا ءۇشىن ماڭىزدى جوبانى جۇزەگە اسىرۋ قاجەتتىگىن اتاپ ءوتتى. اتالعان ماسەلە ۇكىمەتتىڭ باقىلاۋىندا بولادى.
