«ساۋىقتىرۋ ورتالىعىن اشقاننان بەرى وسى مەكەمەگە باسشىلىق جاساپ كەلەمىن. ارينە, العاشقى كەزدە تالاي قيىنشىلىقتار كەزدەستى, بۇرىن بالالار دەمالعان كورپۋستاردى جوندەۋ, كەم-كەتىگىن تۇزەۋگە قارجى تاپتىق. سەنبى, جەكسەنبى كۇندەرى شتات قىزمەتكەرلەرىمەن بىرلەسىپ, سەنبىلىكتەر ۇيىمداستىردىق. بۇل ىستە ورىنباسارلارىم روللان دۇيسەنباي, اقىلبەك ەسىموۆ, 43 جىلدىق ەڭبەك ءوتىلى بار ساۋىقتىرۋ ورتالىعىنىڭ باس دارىگەرى روزا قاليەۆا, اعا اكىمشىلىك قىزمەتكەرى ريزاگۇل گۋساكوۆا كوپ كومەك كورسەتتى. ولار وڭالتۋ ورتالىعىنا ەمدەلۋگە جانە تازا اۋامەن تىنىستاپ, دەنساۋلىعىن تۇزەۋگە كەلگەندەرمەن ءتىل تابىسىپ, اقىل-كەڭەستەرىن بەرەدى. قازىر ءبىزدىڭ مەكەمەدە 200 ادام قىزمەت ەتەدى», دەيدى بىزبەن اڭگىمەسىندە ارىستان جانعازيەۆ.
مۇندا دەمالۋشىلارعا بارلىق جاعداي جاسالعان. ءتورت مەزگىل تاعام بەرىلەدى. ەم الۋشىلاردىڭ بوس ۋاقىتىن ءماندى وتكىزۋىنە كوڭىل بولىنەدى. بيليارد, ۇستەل تەننيسى, جاتتىعۋ جاسايتىن ارنايى بولمەلەر قاشان كەلسەڭ دە اشىق. اپتاسىنا بىرنەشە رەت سپورت جارىستارى ءوتىپ تۇرادى. رەتى كەلگەندە ايتا كەتۋ كەرەك, شيپاجاي ديرەكتورىنىڭ ءبىرىنشى ورىنباسارى روللان مەيرام ۇلى ەركىن كۇرەستەن كسرو سپورت شەبەرى, كەزىندە سان مارتە ءدۇبىرلى دودالاردا توپ جارعان. شيپاجايدىڭ باس ديرەكتورى ارىستان ارحيمەد ۇلى دا سپورتقا بەيىم, دەمالۋشىلار اراسىندا جارىستاردىڭ ءماندى وتۋىنە كوڭىل بولەدى. شاحمات تۋرنيرىندە 82 جاستاعى ەسىمحان جۋكيچ, باقىتبەك قوڭدىباەۆ سياقتى بەلسەندى اقساقالدار جۇلدەلى ورىنداردى ءبولىستى. ەم الۋشىلارعا بەلگىلى ءانشى باۋىرجان يساەۆ, شۋششينسك قالاسىنان كەلگەن ارتىستەر گ ۇلىم قۇدىسبەك, نۇراي قابيدەن, سامعاۋ بي توبىنىڭ ونەرپازدارى, «دۋمان» ۆوكالدى اسپاپتار توبىنىڭ انشىلەرى كوڭىلدى كەش سىيلادى. شيپاجايداعى مۋزىكالىق جەتەكشى ءبىرجان ءحامزيننىڭ ايتۋىنشا, دەمالۋشىلار 14 كۇننىڭ ىشىندە بي بيلەپ, ءتۇرلى بايقاۋلارعا قاتىسادى, كۇن ارالاتىپ قىزىقتى كونتسەرتتەردى تاماشالايدى.
ساۋىقتىرۋ ورتالىعىندا قىزمەت ەتەتىندەردىڭ بارلىعى – ءوز ماماندىعىن جەتىك مەڭگەرگەن, جۇمىس ءوتىلى 15-20 جىل, ءتىپتى ودان دا كوپ, ناعىز ءوز ءىسىنىڭ مايتالماندارى. باس دارىگەر روزا قاليەۆا – دەنساۋلىق سالاسىندا 43 جىلدان بەرى ءۇزىلىسسىز قىزمەت ەتىپ كەلە جاتقان جوعارى ساناتتى دارىگەر. كەيىنگى 7,5 جىلدان بەرى ءوزىنىڭ ءبىلىمى مەن بىلىكتىلىگىن, مول تاجىريبەسىن مۇگەدەكتەر مەن زەينەتكەرلەرگە ارناعان. دارىگەرلەر مەن ۇيقالاۋشىلار زابيرا حاسەنوۆا, رۋستام ۆاليۋللين, زينا باتالوۆا, ءزۇلفيا قانعوجينا, انار تورعاەۆا, بالشىقپەن ەمدەۋشى گۇلجان ەڭكەباەۆا, اننا ستاسەنكو قاراپايىم ەڭبەكتەرىمەن دەمالۋشىلار العىسىنا بولەنۋدە.
ساۋىقتىرۋ ورتالىعىنىڭ باس دارىگەرى روزا قاليەۆانىڭ ايتۋىنشا, مۇندا مەديتسينالىق قىزمەتتىڭ 47 ءتۇرى بار. تۇزدى سۋ, ماگنيوتەراپيا, بالشىقپەن ەمدەۋ, ۇيقالاۋ, ەلەكتر, بيوترون, پارافين دەيسىز بە, ەم الۋشىلار قالاۋىنشا پايدالانا الادى. كورپۋستاردىڭ ىرگەسىندەگى قوتىركول كولىنىڭ سۋى شيپالى, ءتۇرلى دەرتتەرگە مىڭ دا ءبىر ەم. ىستىق جاز ايلارىندا دەمالۋشىلار كولگە شومىلادى, كۇنگە قىزدىرىنادى.
«اتتەڭ, سۋمەن ەمدەۋگە قاجەتتى ۆاننالار جەتىسپەيدى. قىس مەزگىلىندە اراسى قاشىق ەكىنشى جانە ءۇشىنشى كورپۋس اراسىندا دالاعا شىقپايتىن ءدالىز سالىنسا, وڭ بولار ەدى. ءتىپتى جاڭا ەم الاتىن كورپۋس سالاتىن ۋاقىت جەتتى. سپورت زالى قۇرىلىسىن دا سالۋ كەرەك. مۇنىڭ ءبارى – شەشىمىن تاباتىن پروبلەمالار. ينتەرنەت, ۆاي-فاي سىمدارى جاڭارتىلدى», دەيدى باس دارىگەر.
قالاي دەگەندە دە, ساۋىقتىرۋ ورتالىعىنىڭ قىزمەتىنە ەم الۋشىلار ءدان رازى.
وڭداسىن ەلۋباي,
«ەگەمەن قازاقستان» گازەتىنىڭ ارداگەر ءتىلشىسى
