ۇلتتىق بانك توراعاسىنىڭ ورىنباسارى ءاليا مولدابەكوۆانىڭ مالىمدەۋىنشە, شىلدەنىڭ سوڭىندا قازاقستاننىڭ مەملەكەتتىك باعالى قاعازدارىنا بەيرەزيدەنتتەردىڭ سالىمدارى جىل باسىنان بەرى 178 ملرد تەڭگەگە ۇلعايىپ, 559 ملرد تەڭگەنى قۇرادى. شىلدە ايىندا عانا قر مەملەكەتتىك بورىشىنا جاڭا قاراجاتتىڭ قۇيىلۋى شامامەن 100 ملرد تەڭگە بولدى.
– ۇلتتىق قوردان رەسپۋبليكالىق بيۋدجەتكە بەرىلەتىن ترانسفەرتتى قامتاماسىز ەتۋ اياسىندا ساتۋ كولەمى 591 ملن دوللاردى قۇرادى. تامىزدا قارجى مينيسترلىگىنىڭ بولجامدارىنا سايكەس, ساتۋ كولەمى 750 ملن دوللاردان 800 ملن دوللارعا دەيىنگى كولەمگە باردى. بجزق شىلدەدە 240 ملن دوللارعا ۆاليۋتا ساتىپ الدى. وسى ايدا دا سول شامادا – 200 ملن دوللاردان 250 ملن دوللارعا دەيىن ساتىپ الۋ كۇتىلەدى. سونىمەن قاتار قازاقستاننىڭ دەپوزيتتەرگە كەپىلدىك بەرۋ قورى ءوز اكتيۆتەرىنىڭ ۆاليۋتالىق ۇلەسىن بىرتىندەپ 15%-عا دەيىن ارتتىرۋدى كوزدەيدى. ۇلتتىق بانك قوردىڭ اقشاسىن باسقارۋشى رەتىندە بيرجادا جىل سوڭىنا دەيىن شامامەن 140 ملرد تەڭگەگە, ونىڭ ىشىندە تامىز ايىندا 50 ملن دوللاردان 100 ملن دوللارعا دەيىن ۆاليۋتا ساتىپ الۋدى جوسپارلاپ وتىر. كۆازيمەملەكەتتىك كومپانيالاردىڭ ۆاليۋتا ساتۋ كولەمى شىلدەدە مىندەتتى ساتۋ ۇلەسى 30%-عا دەيىن تومەندەگەننەن كەيىن 195 ملن دوللاردى قۇرادى. بيىل جىل باسىنان بەرى ينتەرۆەنتسيالار جۇرگىزىلگەن جوق, دەدى ءا.مولدابەكوۆا.
ونىڭ ايتۋىنشا, ۇلتتىق بانك تەڭگەنىڭ ايىرباس باعامىنا بولجام جاسامايدى جانە تارگەت جۇرگىزبەيدى. بۇل نارىقتاعى فاكتورلارعا بايلانىستى قالىپتاسادى. ايىرباستاۋ باعامى ينفلياتسيالىق تارگەتتەۋ رەجىمىنە بايلانىستى وزگەرمەلى كەلەدى. ۆاليۋتا نارىعىنا قاتىستى ۇلتتىق بانكتىڭ باستى مىندەتى – ۆاليۋتا نارىعىنىڭ قيىن كەزەڭدەردە دە تۇراقتى ءارى ءتيىمدى جۇمىس ىستەۋىن قامتاماسىز ەتۋ.
– الدىن الا دەرەكتەرگە سايكەس, ۇلتتىق قورداعى ۆاليۋتالىق اكتيۆتەردىڭ كولەمى وتكەن ايدا شامامەن 413 ملن دوللارعا ۇلعايىپ, شىلدە سوڭىندا 60,2 ملرد دوللاردى قۇرادى. قارجى نارىعىنا قاتىسۋشىلار ەكونوميكانىڭ ورنىقتىلىعىنا بايلانىستى بيىل رەتسەسسيانىڭ باستالمايتىنىن بولجاپ وتىر. ال جەتەكشى ينۆەستيتسيالىق بانكتەردىڭ ەكونوميستەرى قۇلدىراپ جاتقان ينفلياتسيا اياسىندا قىركۇيەك وتىرىسىندا فرج مولشەرلەمەنىڭ كوتەرىلۋىن كىدىرتەدى دەپ كۇتەدى. شىلدەدە ينۆەستورلاردا وپتيميزم باسىمىراق بولدى جانە بۇل اكتسيالار مەن وبليگاتسيالاردىڭ جانە التىن نارىعىنىڭ وسۋىنە اسەر ەتتى. ءسويتىپ, شىلدەدە ۇلتتىق قوردىڭ ينۆەستيتسيالىق كىرىسى شامامەن 900 ملن دوللاردى قۇرادى. وتكەن ايدا ۇلتتىق قوردان رەسپۋبليكالىق بيۋدجەتكە ترانسفەرت تۇرىندە 284 ملرد تەڭگە اۋدارىلدى. وسى ماقساتتا ىشكى ۆاليۋتا نارىعىندا 591 ملن دوللار كولەمىندەگى شەتەل ۆاليۋتاسى بىركەلكى ساتىلدى. بۇل رەتتە شىلدەدە ۇلتتىق قوردىڭ شوتتارىنا ۆاليۋتالىق ءتۇسىم 102 ملن دوللاردى قۇرادى, دەدى ۇلتتىق بانك وكىلى.
