1973 جىلى نەگىزى قالانعان قاراعاندى اكادەميالىق مۋزىكالىق كومەديا تەاترى بيىل ءوزىنىڭ مەرەيتويلىق 50-ماۋسىمىن اياقتادى. وسىناۋ ۋاقىت ىشىندە ۇجىم الىس-جاقىن شەتەلدىڭ 200-دەن استام قالاسىندا بولىپ, ءوز جانكۇيەرلەرىن تاپتى. ال بۇل جولعى ساپار – ولاردىڭ «استانا وپەرا» ساحناسىنداعى ءۇشىنشى گاسترولى.
– جازدا بىزگە گاسترولمەن كەلۋ قاراعاندى اكادەميالىق مۋزىكالىق كومەديا تەاترىنا داستۇرگە اينالدى دەۋگە بولادى. البەتتە, ءبىز بۇعان تەك قۋانامىز, سەبەبى مۇنداي ارىپتەستىك ءبىزدىڭ ۇجىمدارىمىز اراسىنداعى مادەني بايلانىستاردى ودان سايىن نىعايتا تۇسەدى. بيىل مامىردا تەاترىمىزدىڭ وپەرا ترۋپپاسى مەن حورى قاراعاندىدا جارقىن گالا-باعدارلاما مەن س.ءراحمانينوۆتىڭ «الەكو» وپەراسىنىڭ كونتسەرتتىك نۇسقاسىن ۇسىنعانىن دا اتاپ وتكىم كەلەدى. ەندى ارىپتەستەرىمىزدى ءبىز قارسى العالى جاتىرمىز. جازعى دەمالىستا بالالارعا ۋاقىتتارىن ءتيىمدى وتكىزۋگە جاقسى مۇمكىندىك تۋىپ وتىر, ويتكەنى ترۋپپا ولارعا رەپەرتۋارىنداعى ەڭ قىزىقتى ەرتەگىلەردى كورسەتپەكشى. قاراعاندىلىق ارىپتەستەرىمىزگە جەمىستى گاسترول تىلەي وتىرا, كورەرمەندەردىڭ ىستىق ىقىلاسىنا بولەنە بەرىڭىزدەر دەگىم كەلەدى, – دەپ اتاپ ءوتتى «استانا وپەرا» ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
ەلورداداعى ونەر كورسەتۋگە اسقان جاۋاپكەرشىلىكپەن قارايتىن قاراعاندىلىق ترۋپپا بۇل جولى دا ادەتتەگىدەي تەاتر رەپەرتۋارىنداعى ەڭ قىزىقتى ءارى سان الۋان قويىلىمداردى ىرىكتەپ الۋعا تىرىسىپتى. اتاپ ايتساق, ولار – ءبىرتۋار ي.كالماننىڭ «ماريتسا» وپەرەتتاسى, بۇدان كەم تۇسپەيتىن تاعى ءبىر تاماشا وپەرەتتا – ي.شتراۋستىڭ مۋزىكاسىنا قويىلعان «جارقانات» جانە گ.گلادكوۆتىڭ ء«شوپ قورىعان يت» مۋزىكالىق كومەدياسى. سونىمەن قاتار ۇيىمشىل ۇجىم ءوزىنىڭ كىشكەنتاي كورەرمەندەرىن دە ۇمىتقان جوق, ولارعا «الاددين» جانە «برەمەن مۋزىكانتتارى» سەكىلدى ەكى مۋزىكالىق ەرتەگىنى, سونداي-اق «قار پاتشايىمى» ميۋزيكلىن كورسەتەدى.
– قاراعاندى اكادەميالىق مۋزىكالىق كومەديا تەاترى ەلىمىزدەگى وپەرەتتا مەن ميۋزيكل جانرىندا قويىلىم قوياتىن بىردەن-ءبىر تەاتر بولعاندىقتان, ترۋپپامىزدى بارلىق ءوڭىر اسىعا كۇتەدى دەسەم ارتىق ايتقاندىعىم ەمەس. العاش رەت ءبىزدىڭ ۇجىم «استانا وپەرانىڭ» كەرەمەت ساحناسىندا 2019 جىلى ونەر كورسەتكەن ەدى. اراعا ءۇش جىل سالىپ, تەاتردىڭ 50-ءشى مەرەيتويلىق ماۋسىمىن دا وسىندا گاسترولمەن باستادىق. بۇل ءبىز ءۇشىن ۇلكەن مارتەبە ءارى قۋانىش. وتكەن جىلعى ساپارىمىزدا دا بارلىق سپەكتاكلدەر زور تابىسپەن وتكەنىن, ەلوردالىق كوپشىلىك ءبىزدى وتە جىلى قارسى العانىن ايتا كەتۋىم قاجەت. مۇنداي جەتىستىككە ترۋپپانىڭ تالپىنىسى مەن شابىتىنان بولەك, «استانا وپەرا» ساحناسىنىڭ تەحنيكالىق مۇمكىندىكتەرى كوپ ىقپالىن تيگىزدى. تەاتر ساحناسى مۋزىكالىق تەاترلارعا قويىلاتىن بارلىق الەمدىك تالاپتارعا ساي. بۇل ساحنادا ءبىز ءوز سپەكتاكلدەرىمىزدى مۇلدە جاڭا قىرىنان كوردىك. ارتىستەرىمىز دە وسىنداي كەرەمەت ساحنادا ونەر كورسەتۋگە جانە ەلوردالىق جانكۇيەرلەرىمەن قايتا كەزدەسۋگە ءاردايىم اسىق. ولار تالعامپاز كورەرمەندەرىن بۇل جولى دا قۋانتىپ, ۇمىتىلماس اسەر سىيلاۋ ءۇشىن بار كۇشىن سالادى, – دەپ ءسوزىن قورىتىندىلادى قاراعاندى اكادەميالىق مۋزىكالىق كومەديا تەاترىنىڭ باسشىسى, قازاقستاننىڭ ەڭبەك سىڭىرگەن قايراتكەرى امانتاي ىبراەۆ.
ەسكە سالا كەتەيىك, گاسترولدىك ساپار باعدارلاماسىنا ەنگەن قويىلىمدار «استانا وپەرا» تەاترىنىڭ ۇلكەن زالى ساحناسىندا 11-13 تامىز ارالىعىندا ءۇش كۇن قاتارىنان قويىلادى.
