فوتو: اباي وبلىسى اكىمدىگىنىڭ تەلەگرام پاراقشاسى
ۇلى اقىن, اعارتۋشى اباي قۇنانباي ۇلىنىڭ ەسكەرتكىشىنە عالىمدار, قوعام قايراتكەرلەرى, زيالى قاۋىم, دەپۋتاتتار, جاستار گۇل شوقتارىن قويدى. سالتاناتتى شاراعا اباي وبلىسىنىڭ اكىمى نۇرلان ۇرانحاەۆ قاتىستى.
ءوڭىر باسشىسى بۇل شارا ۇلى تۇلعاعا تاعزىم ەتۋ عانا ەمەس, ەل تاريحىندا باعا جەتپەس مۇرا قالدىرىپ, وشپەس ءىز قالدىرعان اقىننىڭ ءومىرى مەن شىعارماشىلىعىن ناسيحاتتاۋعا دا قۇرمەت كورسەتىلىپ وتىرعانىن اتاپ ءوتتى.
«زامانالار اۋىسىپ, دۇنيە ديدارى, كۇندە وزگەرسە دە, حالقىمىزدىڭ ابايعا دەگەن, قۇرمەت سەزىمى, ەش كەمىمەيدى! ۇكىمەتتىڭ قاۋلىسىمەن بەلگىلەنگەن وسى كۇن دە – سونىڭ ايعاعى. اقىننىڭ مول مۇراسى – باعا جەتپەس, رۋحاني اسىل قازىنامىز بولىپ قالا بەرەدى. قالىڭ ەلىن, قايران جۇرتىن «جەتى قاراڭعى تۇندە» اداستىرماي, «بەس دۇشپاننان» بوي سۋىتىپ, «بەس اسىل ىسكە» اسىقتىرعان ۇلى اباي – تۋعان حالقىمەن ماڭگى جاسايدى! سەبەبى – وسىناۋ الماعايىپ زاماندا, سۇيەنەرىمىز دە, تابىنارىمىز دا – اباي!», دەدى وبلىس باسشىسى.
ەستەرىڭىزگە سالساق, مەملەكەت باسشىسى قاسىم-جومارت توقاەۆ ءوزىنىڭ «اباي جانە ءححى عاسىرداعى قازاقستان» اتتى ماقالاسىندا اباي مۇراسى - ۇلت بولىپ بىرلەسۋىمىزگە, ەل بولىپ دامۋىمىزعا جول اشاتىن قاستەرلى قۇندىلىق ەكەندىگىن اتاپ وتكەن بولاتىن. وسىلايشا 10 تامىز بۇكىل قازاقستاندا «اباي كۇنى» بولىپ بەلگىلەنگەنى ءمالىم.
ايتا كەتەلىك, مەرەكەگە وراي 8 تامىزدان باستاپ اباي وبلىسىنىڭ بارلىق قالا مەن اۋداندارىندا 50-دەن استام مادەني-تانىمدىق ءىس-شارالار وتكىزىلۋدە.
