شىمكەنت پوليتسياسىنا ۇقساس مازمۇندى ارىز-شاعىممەن 235 ادام جۇگىندى. ولار جالعان تەندرمەن اينالىساتىن الاياقتاردىڭ قۇربانى بولعانىن ايتىپ, ءتارتىپ ساقشىلارىنان كومەك سۇراعان.
جابىرلەنۋشىلەردىڭ ايتۋىنشا, ءوز تانىستارى «تەندرمەن اينالىساتىن باستىعىنا» كومەك قاجەتتىگىن ايتىپ, نەسيە راسىمدەۋگە ۇگىتتەگەن. جاساعان جاقسىلىعى ءۇشىن تيەسىلى ۇلەسىن بەرۋگە جانە بانك الدىنداعى قارىزدى تولىق وتەۋگە ۋادە ەتكەن.
كوبىنەسە ولار نەسيەنى تاۋارلاي راسىمدەتىپ, الىنعان قىمبات تەحنيكانى قايتا ساتىپ, شىققان سومانىڭ 10-12% پايىزىن سىياقى رەتىندە بەرىپ وتىرعان. الايدا, اي سايىنعى تولەم ۋاقىتى كەلگەندە, كۇدىكتىلەر قوڭىراۋعا جاۋاپ بەرمەي, ءىزىن سۋىتقان.
«ناتيجەسىندە نەسيە ءوسىمى كوبەيىپ, ازاماتتار قارىزعا بەلشەسىنەن باتقان. 11 ادامنان تۇراتىن قىلمىستىق توپتىڭ قۇرباندارى تۇركىستان وبلىسىنىڭ جانە شىمكەنت قالاسىنىڭ تۇرعىندارى بولىپ شىقتى. اتالعان جايت قر قك-ءنىڭ 190-بابى (الاياقتىق) بويىنشا تىركەلدى», دەلىنگەن ۆەدومستۆو تاراتقان اقپاراتتا.
قۇزىرلى ورگاندار كۇدىكتىلەردىڭ اتى-ءجونىن انىقتاپ, قاماۋعا الدى. انىقتالعانداي, الاياقتار توبى 23-43 جاس ارالىعىنداعى, 4 ايەل جانە 7 ەر ادامنان تۇرعان. ونىڭ ىشىندە ەكى بانك مەنەدجەرى بار. ولاردىڭ ارقايسىسىنىڭ ءوز مىندەتتەرى بولعان: كەيبىرى نەسيە الاتىن ادامداردى تابۋمەن, تاعى ەكەۋى ونى راسىمدەۋمەن, قالعاندارى ساتىپ الىنعان تاۋارلاردى الىپ-ساتۋمەن اينالىسقان ەكەن.
الاياقتار 340 ملن تەڭگەگە جۋىق شىعىن كەلتىردى. ارىزدانۋشىلار ءارتۇرلى بانكتەردەن 250 مىڭ تەڭگەدەن 6 ملن تەڭگەگە دەيىن قارىز العان. ءتارتىپ ساقشىلارى جيناقتالعان ءىس-قۇجاتتاردى ايىپتاۋ اكتىسىمەن سوتقا جولدادى.
ايىپتالۋشىلاردىڭ ارقايسىسى جاساعان قىلمىسى ءۇشىن 5 جىلعا دەيىن سوتتالدى.
