وسى ورايدا كەيبىر مەملەكەتتەردىڭ بەتكەۇستار قالالارى تۋريستەردى تارتۋ بويىنشا تىپتەن الەمدە كوش ىلگەرى تۇرعانىن ايتا كەتكەن ءجون. ونداي قالالاردىڭ تانىمالدىعى جىل وتكەن سايىن ارتىپ, ءوز ەلىنە ءتۇسىرىپ جاتقان تابىسى ودان سايىن ەسەلەنىپ كەلەدى. وسى جونىندە Freedom Life ءومىردى ساقتاندىرۋ كومپانياسىنىڭ ماماندارى جان-جاقتى زەرتتەۋ جۇرگىزىپ كورىپتى. ولاردىڭ مالىمەتى بويىنشا, الەمدەگى ءتۋريسى ەڭ كوپ, سوعان سايكەس تابىسى دا ەڭ كوپ قالالاردىڭ كوشىن دۋباي باستاپ تۇر ەكەن.
تارقاتىپ ايتساق, ساياحات جانە تۋريزم جونىندەگى بۇكىلالەمدىك كەڭەسى (WTTC) 2022 جىلى تۋريستەر ەڭ كوپ اقشا جۇمساعان 10 ءىرى قالانى انىقتادى. بۇل رەتتە مەگاپوليستەر ۇشتىگىن 29,42 ملرد دوللار تابىسپەن دۋباي, 16,79 ملرد دوللار پايدا تاپقان دوحا جانە 16,07 ملرد دوللار كىرىس كىرگەن لوندون قالالارى قۇراعان.
ال ەندى WTTC بولجامى بويىنشا 2032 جىلعا قاراي ەڭ كوپ تۋريست اعىلاتىن قالالاردىڭ ۇزدىكتەرى وزگەرۋى مۇمكىن. مىسالى, ءبىرىنشى ورىنعا گونكونگ (52,06 ملرد دوللار), ەكىنشى ورىنعا ماكاو (43,14 ملرد دوللار), ال ءۇشىنشى ورىنعا دۋباي (42,98 ملرد دوللار) قالالارىنىڭ ورنالاسۋ ىقتيمالدىعى زور ەكەن.
سونىمەن قاتار Statista حالىقارالىق زەرتتەۋ كومپانياسىنىڭ مالىمەتتەرىنە سايكەس 2022 جىلى الەمدىك تۋريزم سەكتورىنداعى نارىق كولەمى 2021 جىلمەن سالىستىرعاندا شامامەن 41%-عا وسكەن. COVID-19 پاندەمياسىنان كەيىن قالپىنا كەلە باستاعان تۋريزم نارىعى 2022 جىلى پاندەميا الدىنداعى دەڭگەيىنە جەتە الماعان, ياعني جالپى كولەمى 2 ترلن-عا جۋىق دوللاردى قۇراعان. مامانداردىڭ بولجامىنا سايكەس 2023 جىل اياعىنا دەيىن بۇل نارىقتىڭ جىلدىق كورسەتكىشى 2,29 ترلن دوللارعا دەيىن ءوسۋى مۇمكىن جانە 2019 جىلداعى نارىق كولەمىنەن ارتىق شىعادى.
ال ەندى ءوز ەلىمىزگە ورالساق, ۇلتتىق ستاتيستيكا بيۋروسىنىڭ مالىمەتى بويىنشا 2022 جىلى ەلىمىزدە 9,8 ملن تۋريست تىركەلگەن. بۇل قاتاردا 8,8 ملن ادام ەل ىشىندەگى ساياحاتشىلار بولسا, 974,7 مىڭ ادام – شەتەلگە شىققاندار. ەل ىشىندە جانە شەتەلگە شىعاتىن ساياحاتشىلارىمىز كوبىنەسە الماتىدا تىركەلگەن – 970,9 مىڭ ادام. سول سياقتى استانادان 924,4 مىڭ ادام جانە تۇركىستان وبلىسىنان 903,9 مىڭ ادام ساياحاتتاعان. ەڭ از تۋريستەر اتىراۋ وبلىسى (121,8 مىڭ ادام) مەن ۇلىتاۋ وبلىسىندا (130,4 مىڭ ادام) تىركەلىپتى.
ىشكى تۋريزمگە توقتالساق, ەQonaq اقپاراتتىق جۇيەسىنىڭ مالىمەتىنە سايكەس مەملەكەتتىڭ وڭتۇستىك جانە سولتۇستىك بولىكتەرى – تۋريستىك اعىمنىڭ ەڭ نەگىزدى باعىتتارى. ال شەتەل تۋريستەرى كوپ باراتىن ايماق, جوعارىدا ايتقانىمىزداي, الماتى قالاسى بولىپ وتىر. 2023 جىلى بۇل قالاعا كەلگەن شەتەلدىك قوناقتار بارلىق ءتۋريستىڭ 30,1%-ىن قۇراعان.
سونداي-اق 2022 جىلى تۋريستەرگە ارنالعان ءارتۇرلى دەمالىس ورىندارىنىڭ پايداسى شامامەن 160 ملرد تەڭگەنى قۇراعان. بۇل 2021 جىلدىڭ كورسەتكىشتەرىنەن 60%-عا ارتىق.
بۇعان قوسا ۇلتتىق بانك 2023 جىلدىڭ 6 ايىندا شەتەلگە شىعاتىن تۋريستەردى مىندەتتى ساقتاندىرۋ بويىنشا ساقتاندىرۋ سىيلىقاقىسىنىڭ كولەمى 3,2 ملرد تەڭگەنى قۇراعانىن مالىمدەدى. بۇل بىلتىرعى ۇقساس كەزەڭمەن سالىستىرعاندا 69,8%-عا ارتىق. ەرىكتى تۋريستىك ساقتاندىرۋ بويىنشا ساقتاندىرۋ سىيلىقاقىسىنىڭ كولەمى 2023 جىلدىڭ 6 ايى ىشىندە 1,8 ملرد تەڭگە قۇراعان. بۇل 2022 جىلمەن سالىستىرعاندا 5,6%-عا تومەن. وسى ورايدا مىندەتتى ساقتاندىرۋ تۋريستىك فيرمالار ارقىلى ۇسىنىلاتىنىن ايتا كەتۋ كەرەك. بۇل جازاتايىم وقيعالاردى جانە كەيبىر اۋرۋلار سياقتى تاۋەكەلدەردى ساقتاندىرادى. ورتاشا العاندا ەرىكتى ساقتاندىرۋ 15 ەۋروعا تۇسەدى, ياعني قازىرگى باعام بويىنشا 7 349 تەڭگە.
