فوتو: تۇركىستان وبلىسى اكىمدىگىنىڭ رەسمي سايتى
جەتىساي اۋدانىنىڭ ماقتالى اۋىلدىق وكرۋگىنە قاراستى شولپانقۇدىق شاعىن اۋىلىندا ورنالاسقان «ديماش» شارۋا قوجالىعىنىڭ توراعاسى سۇندەت ابىلاەۆ 20 ملن تەڭگە جەكە قارجىسىن ءوزىنىڭ بالىق شارۋاشىلىعىنا سالىپ, ءدوڭماڭداي, امۋر, سازان سەكىلدى بالىق تۇرلەرىنىڭ 1 ملن 300 مىڭ دانا شاباعىن الىپ كەلگەن ەكەن. ۇزىندىعى - 250 مەتر, ەنى - 180 مەتر بولاتىن 3 باسسەيندە ءوسىرىلىپ جاتقان بالىقتاردىڭ ورتاشا سالماعى - 1,5 كەلى. بالىقتارعا قاجەتتى جەمدى پولشا ەلىنەن الدىرادى ەكەن. مامانداردىڭ ايتۋىنشا, شەكارا اسىپ كەلەتىن جەمنىڭ قۇرامىندا بالىقتى ءتۇرلى اۋرۋ-سىرقاۋدان ساقتايتىن جانە ءوسىپ-جەتىلۋىنە قاجەتتى بارلىق مينەرالدار بار.
وبلىس اكىمىنىڭ ءباسپاسوز قىزمەتى ۇسىنعان اقپاراتقا سايكەس, ەلىمىز بويىنشا جاساندى بالىق وسىرۋدەن كوش باستاپ تۇرعان تۇركىستان وبلىسىندا 104 سۋ ايدىنى بار. ولاردان بولەك 4 حالىقارالىق, 4 رەسپۋبليكالىق ماڭىزى بار كاسىپشىلىك ماقساتتاعى ۋچاسكەلەر بەكىتىلگەن. تاۋارلى بالىق وسىرۋمەن 156 كاسىپكەرلىك مەكەمە اينالىسادى. وبلىس تۇرعىندارىن بالىق ونىمدەرىمەن تولىق قامتاماسىز ەتۋ ماقساتىندا 30 توعاندى بالىق شارۋاشىلىعى, ونىڭ ىشىندە 4-ەۋى ۇيىرگەلىك اۋلادا اشىلعان ەكەن.
«مەملەكەت باسشىسى قاسىم-جومارت كەمەل ۇلى اۋىل شارۋاشىلىعىن دامىتپاي باسەكەگە قابىلەتتى ەكونوميكا قۇرۋ مۇمكىن ەمەستىگىن اتاپ, ونىڭ ىشىندە بالىق شارۋاشىلىعىنا دا ەرەكشە ءمان بەرۋدى تاپسىرعان ەدى. ناتيجەسىندە, مەملەكەت تاراپىنان اكۆاوسىرۋگە پايدالانىلاتىن ازىقتى ساتىپ الۋعا جۇمسالاتىن شىعىنداردى سۋبسيديالاۋ باعدارلاماسى بالىق شارۋاشىلىعىن دامىتۋعا وڭدى ىقپالىن تيگىزىپ كەلەدى», دەدى جەتىساي اۋدانىنىڭ اكىمى سەرىك مامىتوۆ.
مەملەكەتتىك قولداۋدان قالىس قالماعان تۇركىستان وبلىسىنىڭ بالىق وندىرۋشىلەرى ونىمدەرىن ازەربايجان, گرۋزيا, يزرايل, رەسەي, قىتاي جانە وزبەكستان ەلدەرىنە ەكسپورتتاپ, تابىستارىن ارتتىرىپ جاتىر.
