ىشكى ىستەر مينيسترلىگىنىڭ رەسمي وكىلى اقتوتى بورانوۆا مينيسترلىكتە «ەلەكتروساموكاتتار جانە ولاردى جولداردا پايدالانۋ كەزىندەگى ارەكەتتەر الگوريتمى» تاقىرىبىندا جيىن وتكەنىن حابارلادى. جيىنعا قاتىسۋشىلار جاياۋ جۇرگىنشىلەر مەن ساموكاتشىلاردىڭ قاۋىپسىزدىگىن قامتاماسىز ەتۋ ماقساتىندا جاڭا شەكتەۋلەر ەنگىزۋدى ۇسىندى.
«حالىقتى ەنگىزىلگەن شەكتەۋلەر تۋرالى حاباردار ەتۋ ماقساتىندا ءموبيلدى قوسىمشالاردى پايدالانۋ ۇسىنىلدى. بۇل قوسىمشالاردا ساموكاتتى ارنايى بەلگىلەنگەن ورىندارعا ورنالاستىرمايىنشا, ساپار اياقتالدى دەپ ەسەپتەلمەيدى. جيىنعا قاتىسۋشىلار ەلەكتروساموكاتتى جارىقتاندىرىلماعان جەرلەردە, ساياجاي جولدارىندا جانە كامەلەتكە تولماعانداردىڭ پايدالانۋىنا تىيىم سالۋدى ەنگىزۋدى ۇسىندى. ساموكاتتى كامەلەتكە تولماعاندار پايدالانباۋى ءۇشىن سالماق ساناتتارىنا تىيىم سالۋ ماسەلەسى دە قوزعالدى. ماسەلەن, ساموكاتقا سالماعى 30 كەلى جانە ودان جوعارى ادام مىنە الادى», دەپ ءتۇسىندىردى اقتوتى بورانوۆا.
ونىڭ ايتۋىنشا, ىشكى ىستەر مينيسترلىگى ءتارتىپ پەن ەرەجە بۇزعان ەلەكتروساموكاتشىلاردى «قارا تىزىمگە» ەنگىزۋدى جوسپارلاپ وتىر.
«كيكشەرينگ كومپانيالارى ناشار كليەنتتەردىڭ جالپى ءتىزىمىن قۇرۋدى ۇسىندى. مۇنداي پايدالانۋشىلار كيكشەرينگپەن اينالىساتىن كومپانيالاردىڭ قىزمەتىمەن پايدالانا المايدى», دەپ قوستى اقتوتى بورانوۆا.
«قارا تىزىمگە» جول ەرەجەسىن بۇزعان, جولاۋشىلار مەن جۇكتەردى تاسىمالداۋ ەرەجەلەرىن ساقتاماعان نەمەسە ساموكاتتى جولاۋشىلار تاسىمالىنا كەدەرگى كەلتىرەتىن جەرلەردە قالدىرعاندار ەنگىزىلەدى.
ايتا كەتسەك, مەملەكەت باسشىسى قاسىم-جومارت توقاەۆ 2023 جىلدىڭ 29 ماۋسىمىندا «كەيبىر زاڭنامالىق اكتىلەرگە جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويعان ەدى. بۇل زاڭدا ەلەكتروساموكات جۇرگىزۋشىلەرىنە سالىناتىن ايىپپۇلدار مەن بىرقاتار جاڭا ەرەجەلەر بەلگىلەنگەن. زاڭ 30 تامىزدا كۇشىنە ەنەدى.
