2017 جىلى قازاقستان مۇسىلماندارى ءدىني باسقارماسى عۇلامالار كەڭەسىنىڭ XV ماجىلىسىندە مەشىت جاماعاتتارى مەن جەكەلەي ازاماتتاردان كەلىپ تۇسكەن سۇراقتار مەن وتىنىشتەرگە بايلانىستى مۇسىلمان زيراتىنىڭ قاعيدالارى مەن تالاپتارىن بەكىتكەن ەدى. وندا شاريعات تۇرعىسىنان قابىر ۇستىنەن قاندايدا ءبىر قۇرىلىس جۇرگىزۋگە رۇقسات جوق دەلىنگەن.
ەندى جەرلەۋ ءراسىمى عانا ەمەس, بەيىت قۇلپىتاسىنا قاتىستى ءارتۇرلى پىكىر ايتىلىپ جۇرگەندە, زيراتتارعا QR ورناتاتىن جاڭالىق بىزگە دە جەتىپتى. تەحنولوگيانىڭ مۇنداي سەگمەنتى العاش رەت ازيانىڭ تەحنولوگيالىق دامىعان ەلدەرىندە – قىتايدا, جاپونيادا, كورەيادا, كەيىننەن رەسەيدە پايدا بولعان. ال ەلىمىزدە جاڭا تاجىريبەگە ۇركە قاراعاندار كوپ بولىپتى.
وسى باعدارلامانى ەلىمىزگە الىپ كەلگەن سەرگەي پروفير جۋرناليستەرمەن كەزدەسكەن كەزدە QR-كودتىڭ كومەگىمەن بەيىتتە جەرلەنگەن مارقۇمنىڭ فوتوسۋرەتتەرىن كورىپ, اۋديوجازبالاردان داۋىسىن ەستۋگە مۇمكىندىك بولاتىنىن ايتىپتى. ونىڭ ايتۋىنشا, جوباداعى ءماتىننىڭ مازمۇنىنا تاپسىرىس بەرۋشىنىڭ ءوزى جاۋاپتى. ولىلەرگە ارنالعان تسيفرلىق جوبا اۆتورىنىڭ ايتۋىنشا, قوعام مۇنى ازىرگە قۇپ كورىپ وتىر. ازىرگە بۇل كۇپىرلىك نەمەسە دىنىمىزگە, سالتىمىزعا قايشى دەگەندەر جوق. ەگەر سولاي بولعان كۇننىڭ وزىندە اۆتوردىڭ مۇنداي قارسىلىقتارعا ايتار دالەلى دە بار ەكەن. سەبەبى مۇنداي باستامالاردى بىردەن جەرسىنىپ كەتۋى دە, حالىقتىڭ بىردەن قابىلداپ كەتۋى دە قيىن كورىنەدى.
الماتىداعى سالتتىق قىزمەت كورسەتۋ كومبيناتى ديرەكتورىنىڭ ورىنباسارى مارات يسمايلوۆتىڭ ايتۋىنشا كەڭسايدىڭ ەڭ بيىگىندەگى كەيبىر ەسكەرتكىشتەردىڭ قۇنى 100 مىڭ دوللاردان اسىپ كەتەدى. شاماسى جەتكەندەر فرانتسۋز ديزاينەرلەرىنە تاپسىرىس بەرەدى ەكەن.
سونىمەن قاتار اڭگىمە بارىسىندا سالتتىق قىزمەتكە قاتىستى زاڭسىزدىقتىڭ ءبارى اۋرۋحانادا, مايىتحاناداعى اسا قۇپيا سانالاتىن اقپاراتتاردىڭ سىرتقا شىعىپ كەتۋىمەن باستالادى ەكەن. باسقاشا ايتقاندا, كەيبىر جەكەمەنشىك كومپانيالار ارتىندا قالعان تۋىستارىنىڭ ەسىگىن قاعىپ وزدەرىنىڭ «قىزمەتتەرىن» ۇسىناتىن كورىنەدى. 2019 جىلى استانادا قۇقىق قورعاۋ قىزمەتكەرلەرىنىڭ قازا تاپقاندار تۋرالى دەرەكتەردى جەرلەۋ قىزمەتتەرىنە ساتقانى تۋرالى اقپارات شىققان. سول كەزدە سىبايلاس جەمقورلىققا قارسى ءىس-قيمىل اگەنتتىگى پرەۆەنتسيا دەپارتامەنتىنىڭ باسشىسى انار جاروۆا جەرلەۋمەن اينالىساتىن كومپانيالار وكىلدەرى قايعىلى وقيعادان كەيىن قايتىس بولعان كىسىنىڭ ۇيىنە بىردەن كەلەتىن جاعدايلار ءجيى كەزدەسەتىنىن ايتقان. انىقتالعانداي, قازا بولعان ازاماتتاردىڭ جەكە دەرەگىن «102» دەرەكتەر بازاسىنان سىياقى ءۇشىن پوليتسيا قىزمەتكەرلەرى بەرگەن. ناتيجەسىندە, استانانىڭ الماتى جانە سارىارقا اۋداندارىنىڭ پوليتسيا باسقارمالارى كەزەكشى بولىمدەرىنىڭ 9 قىزمەتكەرى (كوبىسى مايور شەنىندەگى) قىزمەتتىك ءتارتىپتى ورەسكەل بۇزعانى, قۇقىق قورعاۋ ورگانىنا كىر كەلتىرەتىن تەرىس قىلىق جاساعانى ءۇشىن قىزمەتتەن بوساتىلعاندىعىن ايتىپ ءوتتى.
سونداي-اق مارات يسمايلوۆ جەرلەۋ قىزمەتى يندۋسترياسىنداعى كولەڭكەلى بيزنەستىڭ الماتىداعى جىلدىق اينالىمى ميللياردتاردان اسىپ كەتۋى مۇمكىن دەگەن دەرەكتەر بار ەكەنىن, زاڭنىڭ بولماۋىنان ادامدار اقىرەتتىك ورىندارىن دا ساتىپ الىپ جاتقانىن اتاپ ءوتتى.
«كەڭساي» الماتىلىقتاردىڭ ۇعىمىندا ۇلتتىق پانتەون رەتىندە قالىپتاسىپ قالعان. قوعامدا شاماسى كەلگەننىڭ ءبارى اقىرەتتىك مەكەنىن كەڭسايدان سايلاپ قويعىسى كەلەتىندەر دا كوبەيىپ بارادى. ەسەنعالي اقىن ايتپاقشى, «كەڭسايدىڭ جولى – قيىن جول, ونى قيىنداتقان – تىرىلەر»,- دەپ يسمايلوۆ ويىن تۇيىندەدى.
