عىلىم جانە جوعارى ءبىلىم مينيسترلىگىنىڭ مالىمەتىنشە, گرانتتاردى تاعايىنداۋ كونكۋرسىنا قاتىسۋ ءۇشىن 94 مىڭ تالاپكەر قۇجات تاپسىرعان. بۇل وتكەن جىلمەن سالىستىرعاندا 14 مىڭعا ارتىق.
«مەملەكەتتىك گرانتتار رەسپۋبليكالىق كوميسسيا وتىرىسىنىڭ قورىتىندىسى بويىنشا تاعايىندالدى. كوميسسيا قۇرامىندا پارلامەنت دەپۋتاتتارى, مۇددەلى مەملەكەتتىك ورگاندار, بiلiم سالاسى كاسiپوداقتارى, ۇلتتىق كاسiپكەرلەر پالاتاسى, جوعارى وقۋ ورىندارى قاۋىمداستىعى جانە قوعامدىق ۇيىمداردىڭ وكىلدەرى بولدى», دەپ حابارلادى مينيسترلىكتىڭ ءباسپاسوز قىزمەتى.
بيىل مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس حالىق تىعىز قونىستانعان باتىس جانە جاڭادان قۇرىلعان وڭىرلەردىڭ جاستارى ءۇشىن گرانتتار ءبولىندى. پەداگوگيكالىق, ينجەنەرلىك, IT ماماندىقتارعا جانە جاراتىلىستانۋ عىلىمدارى بويىنشا اتىراۋ وبلىسىنا – 1500, ماڭعىستاۋ وبلىسىنا – 1500, ۇلىتاۋ وبلىسىنا – 300, جەتىسۋ وبلىسىنا – 300, اباي وبلىسىنا – 500, شىمكەنت قالاسىنا – 400, تۇركىستان وبلىسىنا 500 گرانت بەرىلدى.
ءبىر گرانتتىق ورىنعا ەڭ ۇلكەن كونكۋرس «ستوماتولوگيا» ءبىلىم بەرۋ باعدارلامالارىنىڭ توپتارى بويىنشا تىركەلگەن. بۇل ماماندىق بويىنشا 22 تالاپكەر ءبىر ورىنعا تالاستى. سونداي-اق «حالىقارالىق قاتىناستار جانە ديپلوماتيا» ء(بىر ورىنعا 14 ادامنان), «قۇقىق» (11 ادامنان), «مۋزىكا مۇعالىمدەرىن دايارلاۋ», «دەنە شىنىقتىرۋ مۇعالىمدەرىن دايارلاۋ» جانە «پسيحولوگيا» (10 ادامنان) توپتارى بويىنشا دا تالاپكەرلەر كوپ تىركەلگەن.
گرانتقا ۇمىتكەرلەر اراسىندا ۇپايلار تەڭدىگى جاعدايىندا باسىم قۇقىققا يە بولاتىن 20 مىڭعا جۋىق تالاپكەر, ولاردىڭ ىشىندە «التىن بەلگى» يەگەرلەرى, حالىقارالىق جانە رەسپۋبليكالىق وليمپيادالاردىڭ جەڭىمپازدارى, وقۋ ۇزدىكتەرى بار. سونداي-اق گرانتتاردى ۇيلەستىرۋ بارىسىندا الەۋمەتتىك وسال ساناتتاعى بالالاردىڭ كۆوتالارى دا ەسكەرىلدى.
ءومىردىڭ اق-قاراسى قاتار جۇرەتىنى داۋسىز. تۇلەكتەردىڭ ءبىر توبى گرانتقا يە بولىپ, قۋانىپ جاتسا, ەندى ءبىر توبى «گرانت تىزىمىنە ىلىكپەدىك» دەپ كۇيزەلەتىنى راس. بىراق مۇنىمەن ءبارى بىتپەگەنى انىق. ويتكەنى ءالى دە گرانتتى جەڭىپ الۋعا مۇمكىندىك بار. بۇل تۋرالى ءماجىلىس دەپۋتاتى اسحات ايماعامبەتوۆ ءوزىنىڭ Facebook-تەگى جەكە پاراقشاسىنا جازدى.
«بىرىنشىدەن, يگەرىلمەگەن بىرنەشە مىڭ گرانت قايتادان ۇيلەستىرىلەدى. ياعني گرانت العان تالاپكەرلەردەن كەيىن تۇرعاندارعا ۇبت-دا جيناعان ۇپاي سانىنا سايكەس بەرىلەدى. سونى كۇتۋگە بولادى. ەكىنشىدەن, اكىمدىكتەردىڭ گرانتتارى بار. بىرنەشە مىڭ گرانت جەرگىلىكتى بيۋدجەتتەن بولىنەدى. ۇشىنشىدەن, «قازاقستان حالقىنا» قورىنىڭ گرانتتارى تاعى بار. تورتىنشىدەن, كەيبىر تالاپكەرلەر ءتۇرلى سەبەپ بويىنشا جەڭىپ العان گرانتتارىنان باس تارتادى. ولاردىڭ سانى دا از بولمايدى. ول گرانتتار دا قايتا تاعايىندالادى. بەسىنشىدەن, ءتىپتى ەشتەڭە بولماسا, ۋنيۆەرسيتەتكە اقىلى تۇردە ءتۇسىپ, كەيىن جاقسى وقىپ, GPA جوعارى بولسا, ءبىلىم الۋ كەزىندە بوساعان بوس گرانتتى ۇتىپ الۋعا بولادى. التىنشىدان, «gap year» ارقىلى ءبىر جىل دايىندالىپ, قايتادان ۇبت تاپسىرىپ, گرانتتى جەڭىپ الۋعا مۇمكىندىك بار. ول مەنىڭ ءوز باسىمنان وتكەن وقيعا. بۇل دا – جاقسى شەشىم. جەتىنشىدەن, كوللەدجگە تۇسۋگە بولادى. كوللەدجدە گرانت كوپ, قاجەتتى ماماندىقتار بويىنشا كوللەدج بىتىرگەندەر نارىقتا تاپشى. كەرەك بولسا, كەيىن ءارى قاراي جوعارى وقۋ ورنىنا ءتۇسىپ, قىسقا مەرزىمدە جوعارى ءبىلىم الىپ شىعۋعا دا بولادى. كورىپ وتىرعاندارىڭىزداي مۇمكىندىكتەر وتە كوپ. ءبارى الدا. تولىق مالىمەت الۋ ءۇشىن ۋنيۆەرسيتەتتەردىڭ قابىلداۋ كوميسسياسىنا جولىعۋ كەرەك», دەيدى اسحات ايماعامبەتوۆ.
ايتپاقشى, جوعارى وقۋ ورىندارىنا قۇجاتتاردى تاپسىرۋ 25 تامىزعا دەيىن جۇزەگە اسىرىلادى.
قوعامدا گرانتتى ۇيلەستىرۋگە قاتىستى ءتۇرلى پىكىر ايتىلىپ جاتىر. ماسەلەن, Narikbayev University باسقارما توراعاسىنىڭ ورىنباسارى ەربولات مۇحامەدجان وسىعان قاتىستى ويىن ءبىلدىردى. «94 مىڭ وقۋشى گرانتقا تاپسىرادى. ال بولىنگەن گرانت سانى – 73 مىڭ. باسەكە مۇلدەم جوق. 1 گرانتقا 1,5 مەكتەپ تۇلەگى تالاسقان. وسىنىڭ سالدارىنان جاقسى وقيتىن دا, ۇلگەرىمى ناشار بالا دا گرانتقا يە بولادى. سالدارىنان ۋنيۆەرسيتەتتەر تۇسىنىكسىز جاعدايدا قالادى», دەدى ول.
راس, مۇنداي دا ماسەلە بار. بۇل ەندى دەربەس ماقالانىڭ ارقاۋى.
