«5 تامىز كۇنى ساعات 16:25-تە «قازترانسگاز ايماق» اق اپاتتىق ديسپەتچەرلىك قىزمەتىنە ءۇش ادامنىڭ گاز جارىلىسىنان زارداپ شەككەنى تۋرالى حابارلاما كەلدى. وقيعا استانا قالاسىنىڭ «نۇرلى جول» ۆوكزالىنىڭ ماڭىنداعى شاعىناۋداندا بولعان. جەدەل جەتكەن اپاتتىق-ديسپەتچەرلىك بريگادانىڭ مالىمەتىنشە, جەكە تۇرعىن ۇيدە بولعان گاز جارىلىسىنا پروپان گاز باللونى سەبەپكەر بولعان», دەپ جازىلعان حابارلامادا.
جارىلىستان زارداپ شەككەن 1995 جىلعى ەر ادام مەن ونىڭ 2 جانە 7 جاستاعى ەكى بالاسى اۋرۋحاناعا جاتقىزىلعان.
ۇيىمنىڭ حابارلاۋىنشا, گاز باللونى رەدۋكتورىنىڭ شلانگپەن جالعاناتىن تۇسىندا بولعان اقاۋدان شىققان گاز پروپان باللونى تۇرعان ورىن مەن وعان جاپسارلاس جۋىناتىن بولمەدە جينالىپ قالعان. كەيىن جۋىناتىن بولمەگە كىرىپ جارىق جاققاندا ۇشقىننان گاز جارىلعان.
جارىلىس كەزىندە تابيعي گاز ءوشىرىلىپ تۇرعان. تابيعي گازعا قوسىلۋلى ءۇي يەلەرى ونى تەك جىلىتۋ ماۋسىمىندا عانا قولدانىپ, قالعان كەزدە گاز باللوندارىن قولدانىپ كەلگەن.
كىشىگىرىم توي-تومالاق وتكىزۋ ءۇشىن جالعا بەرىلىپ كەلگەن كوتتەدجدە گاز دابىلقاققىشتارى ورناتىلعانمەن, بىراق ىسكە قوسىلماعان.
«وقيعا ورنىنا تجد, ۋچاسكەلىك پوليتسيا قىزمەتكەرلەرى, ۇيىشىلىك گاز جابدىقتارىنا قىزمەت كورسەتۋ كومپانياسىنىڭ وكىلى مەن ءۇي يەسى شاقىرىلدى. قازىرگى ۋاقىتتا جاعدايدىڭ سەبەپتەرى انىقتالۋدا. بۇل رەتتە «قازترانسگاز ايماق» اق ۇيىشىلىك گاز جابدىقتارىنا تەحنيكالىق قىزمەت كورسەتپەيتىنىن اتاپ وتەمىز. گازدى پايدالانۋ ەرەجەلەرىن ساقتاڭىزدار», دەلىنگەن حابارلامادا.
