قوعامدىق كەڭەس مۇشەلەرى مەن قالا تۇرعىندارىنىڭ جانە قالالىق ءماسليحات دەپۋتاتتارىنىڭ قاتىسۋىمەن پاۆلودار قالاسىنىڭ 24 كوشەسىن قايتا اتاۋ بويىنشا قوعامدىق كەڭەس وتكىزىلگەن. بۇل پاۆلودار قالالىق ءماسليحاتىنىڭ جانە جەر قاتىناستارى مەن قالا قۇرىلىسى ماسەلەلەرى جونىندەگى تۇراقتى كوميسسيا نەگىزىندە ۇيىمداستىرىلعان.
ۇسىنىستار وبلىس پەن قالانىڭ قوعامدىق بىرلەستىكتەرى مەن وبلىستىڭ عىلىمي جانە شىعارماشىلىق زيالىلارى وكىلدەرىنەن كەلىپ تۇسكەن. كوشەلەر اتاۋىن وزگەرتۋ تۋرالى ماتەريالدار رەسپۋبليكالىق ونوماستيكا كوميسسياسىنىڭ قاراستىرىلۋىنا بەرىلىپ, سودان كەيىن وبلىستىق ءماسليحاتتىڭ سەسسياسىندا تۇپكىلىكتى شەشىم قابىلدانباق.
قالا كوشەلەرىن قايتا اتاۋ بويىنشا جوسپارعا ۋسولكا, روزا ليۋكسەمبۋرگ, مولودەجنايا, 29 نويابريا, نابەرەجنايا, تەپلوۆ, ءسىبىر, چاپاەۆ, مولودوگۆاردەيتسەۆ, زاسلونوۆ, كومسومولسكايا, ەرماك, لادوجسكايا, بايكالسكايا, ورلوۆسكايا, تۋلسكايا, الدانسكايا, كيرپيچنايا, كوشەۆايا, ۆولوچاەۆسكايا, كامسكايا, چەليابينسكايا, راسكوۆا, وسيپەنكو كوشەلەرى ەنگىزىلىپ وتىر.
ۇسىنىستاردا كوشەلەردى قازاقستاندىق جازۋشىلار مەن ارداگەرلەردىڭ جانە باتىرلار مەن قايراتكەرلەردىڭ ەسىمدەرىمەن اتاۋ تۋرالى پىكىرلەر ايتىلعان.
