پرەمەر-مينيستر كوپقاباتتى عيماراتتا بولعان ورتتەن 42 ادام زارداپ شەككەنىن ايتىپ, ۇكىمەت اتىنان قازا تاپقان ايەلدىڭ تۋىستارى مەن جاقىندارىنا كوڭىل ايتتى.
توتەنشە جاعدايلار ءمينيسترى سىرىم ءشارىپحانوۆ 16 قاباتتى ءۇيدىڭ كىرەبەرىسىندەگى ءتۇتىن تۋرالى حابار تۇسكەننەن كەيىن وقيعا ورنىنا دەرەۋ ەكى بولىمشە جىبەرىلگەنىن حابارلادى. قالاداعى كولىك كەپتەلىسىنە قاراماستان, العاشقى ءورت سوندىرۋشىلەر وقيعا ورنىنا 8 مينۋتتا جەتتى. 30 مينۋت ىشىندە ول جەرگە 15 تەحنيكا مەن جەكە قۇرامنان 75 ادام جينالدى.
ءورت سوندىرۋشىلەر 80 ادامدى, ونىڭ ىشىندە 35 ادامدى ارنايى قۇتقارۋ باس كيىمىنىڭ كومەگىمەن قۇتقارىپ قالدى. جالپى ءورت ءسوندىرۋ جۇمىستارى ءبىر جارىم ساعاتقا سوزىلدى. 4 تامىزداعى جاعداي بويىنشا 5 ادام مەديتسينالىق مەكەمەلەردە ستاتسيونارلىق ەم شارالارىن قابىلداپ جاتىر.
مينيستر ءورت سوندىرۋشىلەر جۇمىسىنىڭ بىرقاتار فاكتورعا بايلانىستى كۇردەلەنە تۇسكەنىن ايتتى. ماسەلەن, اۋلا ىشىنە قويىلعان اۆتوكولىكتەردىڭ سەبەبىنەن ءورت ءسوندىرۋ تەحنيكاسىنا وقيعا ورنىنا قاراي ءوتۋ قيىنعا سوقتى. سونداي-اق بالكوندارداعى شۇعىل ەۆاكۋاتسيالاۋعا ارنالعان اپاتتىق ليۋكتەر جابىق بولعان.
ءورتتىڭ سەبەپتەرىن انىقتاۋ ءۇشىن بىرقاتار ساراپتاما تاعايىندالدى. تەرگەۋ اياقتالعاننان كەيىن ءتيىستى پروتسەسسۋالدىق شەشىمدەر قابىلداناتىن بولادى.
الماتى قالاسى اكىمىنىڭ ورىنباسارى اسقار ءامرين تۇرعىن ءۇيدى قالپىنا كەلتىرۋ جۇمىستارىنىڭ بارىسى تۋرالى ايتىپ بەردى. اتاپ ايتقاندا, كىرەبەرىستەر مەن زارداپ شەككەن پاتەرلەرگە جوندەۋ جۇمىستارى جۇرگىزىلەدى. سونداي-اق تۇرعىنداردى ۋاقىتشا باسقا جەرگە ورنالاستىرۋ (پاتەر جالداۋ) بويىنشا شىعىنداردى وتەۋ كوزدەلگەن.
پرەمەر-مينيستر كوپقاباتتى ۇيلەردە ورتكە قارسى قاۋىپسىزدىكتى قامتاماسىز ەتۋ شارالارىن وزەكتەندىرىپ, سونداي-اق تۇرعىن ءۇي ينسپەكتسيالارىنىڭ جۇمىسىن جانداندىرۋ قاجەتتىگىن اتاپ ءوتتى.
«توتەنشە جاعدايلار مينيسترلىگى وتكىزىلىپ جاتقان وقۋ-جاتتىعۋلار اياسىندا حالىقتىڭ ءورت كەزىندەگى ءىس-قيمىلدارعا دايىندىق دەڭگەيىن ارتتىرۋ جونىندە شارالار قابىلداۋى ءتيىس», دەدى ۇكىمەت باسشىسى.
سونىمەن قاتار پرەمەر-مينيستر بارلىق وڭىردە ءۇي ورامدارىنىڭ ينفراقۇرىلىمىن دايىنداۋ جانە ولاردى اباتتاندىرۋ كەزىندە شۇعىل قىزمەتتەردىڭ قوزعالىسىن دا ەسكەرۋ قاجەتتىگىن اتاپ ءوتتى, ويتكەنى «اقكەنت» تۇرعىن ءۇي كەشەنىندەگى ءورت كەزىندە اۋلاداعى اۆتوموبيلدەر مەن بيىك بورديۋرلار ءورت ءسوندىرۋ تەحنيكاسىنىڭ جۇمىسىنا كەدەرگى كەلتىردى.
قورىتىندىلاي كەلە, ءاليحان سمايىلوۆ تۇرعىنداردى ۇيلەرىنە تەزىرەك قايتارۋ ءۇشىن قالپىنا كەلتىرۋ جۇمىستارىن جەدەلدەتۋدى, ورتكە قارسى تالاپتاردى ساقتاۋ بويىنشا جاڭا كوپقاباتتى ۇيلەرگە تەكسەرۋ جۇرگىزۋدى, سونداي-اق رەسپۋبليكا بويىنشا تجم بولىمشەلەرىندە جىل سايىن تەحنيكا جاڭارتۋ كەزىندە بيىك عيماراتتاردا جۇمىس ىستەۋ ءۇشىن ارنايى تەحنيكا قاجەتتىلىگىن ەسكەرۋدى تاپسىردى.
