«Egemen Qazaqstan» گازەتىندە تاعىلىمدامادان ءوتىپ جاتقان, ەلىمىزدىڭ ءار وڭىرىندە مەديا جانە كوممۋنيكاتسيا سالاسىندا وقيتىن ستۋدەنتتەر مەن تۇلەكتەرگە ارنالعان شەبەرلىك ءدارىسىن «قازاق گازەتتەرى» جشس باس ديرەكتورىنىڭ ورىنباسارى قامبار احمەت وتكىزدى. وندا ماقالا جازۋ, اقپارات دايىنداۋدا نەنى ەسكەرۋ كەرەك, جاس جۋرناليستەردە ءجيى كەزدەسەتىن قاتەلىكتەر, اقپاراتتى تەكسەرۋ, جالعان اقپاراتتى انىقتاۋ تاسىلدەرى تۋرالى ءسوز بولدى. دارىسكە قاتىسۋشىلار ءماتىندى تالداۋ, جىبەرىلگەن قاتەلەردى تابۋ سەكىلدى تاپسىرمالاردى ورىنداپ, كاسىبي ماماننىڭ تاجىريبەسىن تىڭدادى.
ءدارىس سوڭىندا «Egemen Qazaqstan» گازەتىنىڭ ءتىلشىسى ايتولعان ءجۇنىسحان دارىسكە قاتىسۋشىلار ءۇشىن بىرنەشە كەزەڭنەن تۇراتىن كۋيز ۇيىمداستىردى.
قامبار جۇماعالي ۇلى دارىسكە قاتىسىپ, ينتەللەكتۋالدى سايىس سۇراقتارىنا تاپقىرلىقپەن جاۋاپ بەرگەنى ءۇشىن جاس جۋرناليستەرگە سىي-سياپات جاسادى.
ايتا كەتۋ كەرەك, جۋرناليستەر ساياباعىندا ەرەكشە فورماتتاعى مۇنداي ءدارىس تۇڭعىش رەت وتكىزىلدى. «قازاق گازەتتەرى» جشس باس ديرەكتورىنىڭ ورىنباسارى قامبار احمەت سەرىكتەستىككە قاراستى باسىلىم ۇجىمدارى جاس جۋرناليستەردىڭ بىلىكتىلىگىن ارتتىرۋ ماقساتىندا وسى سەكىلدى تاجىريبە ءبولىسۋ شارالارىن ءجيى وتكىزىپ تۇرۋعا مۇددەلى ەكەنىن ايتتى.
