قازاقستاننىڭ ۇستەل تەننيسى فەدەراتسياسى ۇيىمداستىرعان اۋقىمدى دوداعا باس سەرىكتەس «سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» الەۋمەتتىك جوبالاردى دامىتۋ قورى دەمەۋشىلىك ەتتى. ماقسات – قايىرىمدىلىق جوباسى اياسىندا ۇستەل تەننيسىمەن اينالىسۋشىلار سانىن ارتتىرىپ, جاسوسپىرىمدەر سپورتىن دامىتۋ.
الەمدىك جارىستا باق سىناعان جەرلەستەرىمىز ءوز ەلىمىزدەگى دودادا 2 كۇمىس جانە 7 قولا مەدال جەڭىپ الدى. تۇعىردىڭ ەكىنشى ساتىسىنا 11 جاسقا دەيىنگى ساناتتا ارايلىم قاپاسبەك پەن دۋلات ەرالحان كوتەرىلدى. الان قۇرمانعاليەۆ (U19), ايناز ادىلگەرەەۆا (U13), ورىنباسار ەسماحان (U13), ءجانيا بەكمۇحامەتوۆا (U11), اكەجان ەرلان ۇلى (U11), كارولينا بوندار (U11), سونداي-اق 19 جاسقا دەيىنگى ساناتتا ارالاس جۇپ الان قۇرمانعاليەۆ/سارۆينوز ميركاديروۆا قولا مەدالدەرمەن ماراپاتتالدى.
حالىقارالىق جاسوسپىرىمدەر سايىسىنىڭ جەڭىمپازدارىن ماراپاتتاۋ راسىمىنە «سامۇرىق-قازىنا» اق باسقارما توراعاسى نۇرلان جاقىپوۆ قاتىستى. «ەلىمىزدە العاش رەت ۇيىمداستىرىلعان حالىقارالىق سايىسقا كۋا بولىپ وتىرمىز. بۇل – جاسوسپىرىمدەر مەن جاستار سپورتىن دامىتۋعا باعىتتالعان تاماشا قادام. جاس سپورتشىلاردىڭ الەۋەتى مەن ولاردىڭ جەڭىسكە دەگەن قۇلشىنىسى بىزدە چەمپيونداردىڭ كەرەمەت بۋىنى ءوسىپ كەلە جاتقانىن كورسەتەدى», دەپ اتاپ ءوتتى قور باسشىسى.
ۇستەل تەننيسى فەدەراتسياسىنىڭ پرەزيدەنتى دانيار ابىلعازيننىڭ ايتۋىنشا, بۇل باستاما داستۇرگە اينالىپ, ەرەسەكتەر اراسىنداعى تۋرنير سياقتى جىل سايىن وتكىزىلەدى. ء«وز ويىندارىمەن تەك قۇرامانىڭ كوشباسشىلارى عانا ەمەس, سونىمەن قاتار ءتۋرنيردىڭ ەڭ كىشكەنتاي قاتىسۋشىلارى دا قۋانتىپ, تاڭعالدىردى. ءبىر ايدان سوڭ وتەتىن كەلەسى اۋقىمدى شارا «WTT Contender Almaty» تۋرنيرىنە قاتىسۋ ءۇشىن الەمنىڭ ۇزدىك سپورتشىلارى, وليمپيا ويىندارىنىڭ جۇلدەگەرلەرى جانە الەمدىك رەيتينگ كوشباسشىلارى كەلەدى», دەدى ول.
سونىمەن قاتار جىل سوڭىنا دەيىن استانا, الماتى, قاراعاندى, پاۆلودار جانە اقتوبە قالالارىندا الەۋمەتتىك ءالسىز توپتاعى بالالار ءۇشىن ۇستەل تەننيسىنەن شەبەرلىك شارالارى قولعا الىنباق.
