«بۇگىنگى بالا – ەرتەڭگى بولاشاعىمىز. جاس ۇرپاقتى تاربيەلەۋدە اتا-انانىڭ ءرولى مەن وتباسى قۇندىلىعىنىڭ ماڭىزى وراسان زور. وڭىردە ونەگەلى وتباسىلار از ەمەس. قازاق حالقى قاي كەزدە دە ۇلكەندى قادىرلەگەن. ۇلتتىق داستۇردەن تامىرىن ۇزبەگەن وتباسىلاردىڭ ءاربىر ۇلاعاتتى ىسىنە شىن كوڭىلمەن قۋانامىز. ەلىمىز بويىنشا التىنشى رەت ۇيىمداستىرىلىپ وتىرعان بۇل بايقاۋدىڭ جامبىلدىقتار ءۇشىن ماڭىزى زور ەكەنى ءمالىم. ويتكەنى ۇلگىلى, مەرەيلى وتباسى – قوعام ايناسى», دەدى ءوڭىر باسشىسى ماراپاتتاۋ راسىمىندە سويلەگەن سوزىندە.
بايقاۋ قورىتىندىسىنا سايكەس, وڭىرلىك كەزەڭدە قارسىلاستارىنان وق بويى وزىق بولعان شۋلىق ماداليەۆتەر وتباسى باس جۇلدەگە لايىق دەپ تانىلسا, مويىنقۇمدىق يسابەكوۆتەر وتباسىنا جۇلدەلى ءبىرىنشى ورىن بۇيىردى. سونداي-اق جۇلدەلى ەكىنشى ورىندى تارازدىق سمەتوۆتەر مەن وتەپوۆتەر وتباسى ءوزارا بولىسسە, ۇزدىك ۇشتىكتى جۋالىلىق سۇرىمباەۆتار جانە تالاستىق يمانباەۆتار وتباسى قورىتىندىلادى.
ماراپاتتاۋ ءراسىمىنىڭ سوڭىندا ءسوز العان ماداليەۆتەر وتباسىنىڭ وتاناسى شىمشىق ماداليەۆا وڭىرلىك بايقاۋدىڭ ۇرپاق تاربيەسىندەگى ماڭىزىنا توقتالدى. ال وڭىرلىك كەزەڭنىڭ جەڭىمپازدارى مەن جۇلدەگەرلەرى قوماقتى قارجىلاي سىيلىققا يە بولدى.
