ەلىمىزدە اشىلاتىن جاڭا ءوندىرىس ورىندارى

ايتالىق, بيىلعى ءىىى توقساندا ەكىباستۇز قالاسىنىڭ ماڭىندا جىلىنا 240 مىڭ توننا فەرروسيليتسي شىعارۋعا قاۋقارلى اۋقىمدى ءوندىرىس ورنىنىڭ قىزمەتى جولعا قويىلادى. بۇل جىل سايىنعى ەكسپورتتىق تابىستى شامامەن 460 ملن دوللارعا ۇلعايتۋعا مۇمكىندىك بەرىپ, 800 ادامدى تۇراقتى جۇمىسپەن قامتۋعا جول اشادى. جوبانىڭ قۇنى – 92 ملرد تەڭگە.

سونداي-اق بيىل وتاندىق فەر­رو­قو­رىتپا وندىرۋشىلەرى قارا­عان­دى وبلىسىندا ونىمدىلىگى جىلىنا 400 مىڭ توننا بولاتىن ارنايى كوكس شىعاراتىن جاڭا زاۋىتتى اشىپ, ول العاشقى ءونىمىن شىعارا باستايدى دەپ كۇتىلىپ وتىر. بۇل يمپورتتىق ۇلەستى جى­لىنا 57 ملرد تەڭگەگە تومەندەتىپ, جو­عارى ساپالى وتىن تۇرىنە قول جەت­كى­زۋگە مۇمكىندىك بەرەدى. 261 ادام­دى جۇ­مىسپەن قامتاماسىز ەتۋدى كوز­دەي­تىن بۇل جوبانىڭ قۇنى – 43 ملرد تەڭگە.

قوستانايداعى رەسپۋبليكالىق ما­شينا جاساۋ ورتالىعى بيىل كوم­مەر­تسيالىق جۇك كولىكتەرىنە ارنال­عان كوپىرلەردىڭ نەگىزگى كومپونەنتتەرىن ءوندىرۋ بويىنشا نەگىزگى ونەركاسىپ ورتا­لىعىنا اينالماققا بەت بۇردى. زاۋىت اۆتوماتتاندىرۋدىڭ جوعارى دارەجەسىمەن ەرەكشەلەنىپ, حالىق­ارا­لىق ەكولوگيالىق ستاندارتتارعا تو­لىق ساي كەلەتىنىن جانە جەرگىلىكتى وقۋ ورىندارىمەن ىنتىماقتاستىق ورناتقانىن ءسوز اراسىندا ايتا كەت­كەنىمىز ءجون بولار. ءوندىرىس ىسكە قوسىلعاندا مۇندا 300-گە دەيىن ادام جۇ­مىس ىستەيتىن بولادى.

2023 جىلى وتاندىق اۆتوموبيل ونەركاسىبىندەگى تاعى ءبىر ايتارلىقتاي جاڭالىق – قوستانايدا Chevrolet Enix ماركالى اۆتوكولىكتەردىڭ ءوندى­رى­سى جۇزەگە اسىرىلادى. نارىقتا قوز­عالتقىشى 90 جانە 132 ات كۇشىنە تەڭ سەداننىڭ 2 ءتۇرى جاساپ شىعارۋ جوس­پار­لانعان. سوعان ساي جىل سايىن 30 مىڭ كولىك شىعارۋ كوزدەلىپ وتىر. اۋقىمدى جوبانى ىسكە اسىرۋعا 23,4 ملرد تەڭگە جۇمسالىپ, 400 جۇمىس ورنى قۇرىلادى.

بۇدان باسقا ساران قالاسىندا تۇر­مىس­تىق تەحنيكانى, الماتىدا اليۋ­ميني رادياتورلارىن, قارا­عان­دىدا جەل گەنەراتورلارىنا ارنالعان كو­نۋس­تىق مۇنارالاردى, قوستانايدا Jetour, Kia جانە SsangYong ماركالى كولىكتەردى, ال پاۆلوداردا اليۋميني ديسكىلەرىن ءوندىرۋ جوس­پارلانعان. ەلىمىزدە ازىق-ت ۇلىك قا­ۋىپسىزدىگىن قام­تاماسىز ەتۋ ءۇشىن ماكارون ونىم­دەرى, ءسۇت جانە ءسۇت ونىمدەرى, قۇس ەتى جانە تاعى دا باسقا ءون­دىرىس ورىندارىنىڭ اۋقىمى كە­ڭەيتىلمەك.

تۇتاستاي العاندا, 2023 جىلى 13,2 مىڭ تۇراقتى جۇمىس ورنىن قۇرۋ مەجە­لەنىپ وتىر.