بۇل رەتتە دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك مەديتسينالىق كومەكتى ۇيىمداستىرۋ تۋرالى كەڭىنەن مالىمەت بەردى. ونىڭ ايتۋىنشا, حالىققا 3 مىڭنان اسا امبۋلاتورلىق-ەمحانالىق جانە 800-دەن اسا اۋرۋحانا ۇيىمى مەديتسينالىق كومەك كورسەتەدى. بيىل ءبىرىنشى توقساننىڭ قورىتىندىسى بويىنشا ازاماتتار ەمحانالاردا 300 ملن-نان اسا رەت قارالعان. ستاتسيونارلاردا 800 مىڭ ادام, ونىڭ ىشىندە شۇعىل تۇردە 490 مىڭ ادام ەمدەلدى. 4,5 مىڭ تۇرعىن جوعارى مامانداندىرىلعان مەديتسينالىق كومەك الدى, 250 مىڭنان اسا وپەراتسيا جاسالدى. وسى كەزەڭدە ەلدە 96 مىڭنان اسا نارەستە دۇنيەگە كەلدى. ال كۇندىزگى ستاتسيونارلاردا 375 مىڭ ادام ەمدەلدى. جەدەل مەديتسينالىق كومەك قىزمەتى شامامەن 1 ملن 900 مىڭ شاقىرۋعا قىزمەت كورسەتتى. جالپى, حالىققا قولجەتىمدى جوعارى مامانداندىرىلعان مەديتسينالىق كومەكتىڭ 80 ءتۇرى بار.
بۇگىندە دەنساۋلىق ساقتاۋ جۇيەسىندە 270 مىڭنان اسا ادام جۇمىس ىستەيدى, ونىڭ ىشىندە 79 مىڭ دارىگەر, 190 مىڭ ورتاشا مەديتسينا قىزمەتكەرى بار. جەدەل مەديتسينالىق كومەك كورسەتۋ ءۇشىن 1,5 مىڭ كوشپەلى جەدەل مەديتسينالىق كومەك بريگاداسى جۇمىس ىستەيدى. تاۋلىگىنە جمك بريگادالارى 22 مىڭنان اسا شاقىرۋعا قىزمەت كورسەتەدى. مەديتسينالىق اۆياتسيامەن 500 پاتسيەنت تاسىمالداندى, قاشىقتان 760 مىڭ مەديتسينالىق قىزمەت كورسەتىلدى.
«دەنساۋلىق ساقتاۋدىڭ باسىم باعىتتارىنىڭ ءبىرى – بالالاردىڭ دەنساۋلىعىن قورعاۋ. قازىر جۇكتى ايەلدەردىڭ 82%-ى پەريناتالدىق ۋلترادىبىستىق سكرينينگپەن قامتىلعان. 5 جاسقا دەيىنگى بالالارى بار وتباسىلار – يۋنيسەف بالالار قورىنىڭ ۇسىنىستارىنا سايكەس پاتروناجدىق باقىلاۋدا. بۇل رەتتە جاسىنا تولماعان بالالاردىڭ 93%-ى پاتروناجبەن قامتىلعان. مينيسترلىكتىڭ باستاماسىمەن ەلىمىزدە 13 پەريناتالدىق ورتالىق سالۋ جوسپارلانىپ وتىر. بۇگىنگى تاڭدا 240 بوساندىرۋ ۇيىمى جۇمىس ىستەيدى, ونىڭ ىشىندە 37 ءۇشىنشى دەڭگەيدەگى پەريناتالدىق ورتالىق جانە 3 اكۋشەرلىك رەسپۋبليكالىق ورتالىق بار. امبۋلاتورلىق دەڭگەيدە اكۋشەرلىك-گينەكولوگيالىق كومەكتى 810 ايەلدەر كونسۋلتاتسياسى كورسەتەدى. جۇكتى ايەلدەردىڭ 99%-ى – مەديتسينا قىزمەتكەرلەرىنىڭ باقىلاۋىندا, ولاردىڭ 90%-ى ەرتە باقىلاۋمەن قامتىلعان», دەدى ۆ.دۋدنيك.
سونىمەن قاتار ەلىمىزدە جىل سايىن ەڭ كوپ تارالعان اۋرۋلاردى ەرتە انىقتاۋ ءۇشىن تۇرعىندارعا سكرينينگ جۇرگىزىلەدى ەكەن. ماسەلەن, بيىل ءبىرىنشى توقساننىڭ وزىندە 3 ملن-نان اسا ادام سكرينينگتەن ءوتتى. اۋرۋدىڭ ەرتە بەلگىلەرى بار 94 مىڭ ادام انىقتالدى.
«قاتەرلى ىسىك ستاتيستيكاسى تىم جوعارى. ماسەلەن, قازاقستاندا جىل سايىن 37 مىڭنان اسا ادام قاتەرلى ىسىك اۋرۋىنا شالدىعادى, 14 مىڭنان اسا ادام قايتىس بولادى. بۇگىنگى تاڭدا وسىنداي دياگنوزبەن 200 مىڭ پاتسيەنت ەسەپتە تۇر. بۇل رەتتە ناۋقاستاردىڭ 55%-ى – ەڭبەككە قابىلەتتى جاستا. ونكولوگيالىق اۋرۋلاردىڭ قۇرىلىمىندا ءبىرىنشى ورىندا – ءسۇت بەزى وبىرى, ەكىنشى ورىندا وكپە وبىرى تۇر. ەلدەگى ونكولوگيالىق اۋرۋلارى بار ناۋقاستاردىڭ 29%-ى نولدىك جانە ەرتە ساتىسىندا انىقتالادى, بۇل مەديتسينالىق قىزمەت ساپاسىنىڭ جاقسارعانىن كورسەتەدى. ونكولوگيامەن اۋىراتىن ناۋقاستارعا مەديتسينالىق كومەك كورسەتۋدىڭ بەكىتىلگەن ستاندارتى دا وسى ماقساتتارعا باعىتتالعان. مەملەكەت باسشىسىنىڭ تاپسىرماسى بويىنشا قازاقستاندا ونكولوگيالىق اۋرۋلارمەن كۇرەس جونىندەگى 2023-2027 جىلدارعا ارنالعان كەشەندى جوسپاردىڭ جوباسى ازىرلەندى, ول 5 باعىتتان تۇرادى. بۇل باعىتتاردىڭ قاتارىنا پروفيلاكتيكا, ەرتە دياگنوستيكا, مامانداندىرىلعان ەمدەۋدى دامىتۋ, پاللياتيۆتىك كومەك جانە وڭالتۋ, سونداي-اق كادرلىق الەۋەت پەن عىلىمدى دامىتۋ جاتادى», دەدى ۆيتسە-مينيستر.
دەنساۋلىق ساقتاۋ مينيسترلىگى اۋىل تۇرعىندارىن دا نازاردان تىس قالدىرمايدى. سپيكەردىڭ ايتۋىنشا, بۇگىندە ەلىمىزدە پروفيلاكتيكالىق دياگنوستيكا مەن مەديتسينالىق قىزمەتتەردىڭ كەڭ سپەكترىن ۇسىناتىن 150 جىلجىمالى مەديتسينالىق كەشەن جۇمىس ىستەيدى. بۇل 500-گە جۋىق ەلدى مەكەندى قامتيدى. وسىعان دەيىن اۋىل-ايماقتان 748 مىڭ ادام تەكسەرىلدى. سونداي-اق بيىل ءساۋىر ايىندا 112 ەلدى مەكەندى قامتيتىن «سالاماتتى قازاقستان» مەديتسينالىق پويىزى ىسكە قوسىلدى.
مەديتسينالىق كومەكتى ۇيىمداستىرۋ باعىتىندا جاستاردىڭ رەپرودۋكتيۆتى دەنساۋلىعىن قورعاۋدىڭ دا ماڭىزى زور. بۇل تۇرعىدا دەنساۋلىق ساقتاۋ مينيسترلىگى انالار دەنساۋلىعىن قورعاۋ باسقارماسىنىڭ باسشىسى شاكيزات حالىقوۆا ايتىپ بەردى.
«بيىل مەملەكەت باسشىسىنىڭ تاپسىرماسى بويىنشا مينيسترلىك انا مەن بالا دەنساۋلىعىن ساقتاۋعا باعىتتالعان ء«اربىر ايەل – ءاربىر بالا» اتتى تۇجىرىمدامانىڭ جوباسى ازىرلەندى. بۇل جوبانى ازىرلەۋگە ەلىمىزدىڭ بىلىكتى ماماندارىمەن قاتار, جوو-لاردىڭ پروفەسسورلارى قاتىستى. ناتيجەسىندە جوبانىڭ ءارى قاراي ورىندالۋىن قامتاماسىز ەتۋ باعىتىندا ءىس-جوسپارلار كەشەنى جاسالدى. وسى ءىس-جوسپارلار كەشەنىندە نەكەگە تۇرماعان بولاشاق وتباسىنىڭ دەنساۋلىق پاسپورتىن ەنگىزۋ جوباسى ازىرلەندى. بۇل جوبانىڭ اياسىندا نەكەگە تۇرماس بۇرىن قىزدار مەن جىگىتتەردى پروفيلاكتيكالىق تەكسەرۋ كوزدەلىپ وتىر. بۇل بولاشاقتا ءاربىر جاستىڭ رەپرودۋكتيۆتىك, سوماتيكالىق, گەنەتيكالىق ساۋلىعىن ساقتاۋ ماڭىزدى ەكەنىن, ياعني دەنى ساۋ ۇرپاق دەنى ساۋ ۇلتتىڭ كەپىلدىگى ەكەنىن كورسەتەدى. جوبا اياسىندا ۇسىنىلاتىن ۇسىنىس – مىندەتتى تۇردە تەكسەرىلۋ ەمەس. ءاربىر جاس جۇپ نەكەگە تۇرماس بۇرىن ەرىكتى تۇردە وزدەرى وسىنداي تەكسەرۋدەن ءوتىپ, ءوزىنىڭ دەنساۋلىعى تۋرالى تولىق اقپاراتتى الا الادى. بۇل اقپاراتتىڭ ناتيجەسى بويىنشا تۇجىرىمداما قىز بالانىڭ نەمەسە ەر ازاماتتىڭ ءوز قولىنا بەرىلەدى. ول مىندەتتى تۇردە نەكەنى ءارى قاراي جالعاستىرماۋ كەرەك دەگەن تۇجىرىمداما ەمەس, نەكەگە تۇرۋعا تىيىم سالىنبايدى. تاعى دا ايتا كەتەيىن, مۇنىڭ باستى ماقساتى – وتباسىن قۇرماي تۇرىپ جاستاردىڭ ءوز دەنساۋلىعى تۋرالى تولىق اقپاراتتى الۋى. ەگەر قانداي دا ءبىر دەرت انىقتالعان جاعدايدا, تولىق ەمدەلۋدەن ءوتىپ, جوسپارلى جۇكتىلىككە دايىندالۋى ءۇشىن كوزدەلىپ وتىرعان جوبا», دەدى باسقارما باسشىسى.
جوبانىڭ مازمۇنىمەن دەنساۋلىق ساقتاۋ مينيسترلىگىنىڭ سايتىنان تانىسۋعا بولادى. سونىمەن قاتار اتالعان جوبا باسقا مەملەكەتتىك ورگاندارعا كەلىسۋ ءۇشىن جولداندى جانە قىزۋ تالقىلانىپ جاتىر.
