«بازەلدىڭ» مىسىن باستى
بىلتىر ەل چەمپيوناتىندا قولا جۇلدەگەر اتانعان «توبىل» كونفەرەنتسيا ليگاسىنىڭ ءبىرىنشى اينالىمىندا فينليانديانىڭ «حونكا» كلۋبىن جارىس جولىنان ىعىستىرعان سوڭ, فۋتبول ماماندارى دا, جانكۇيەرلەر دە قوستانايلىق ۇجىمنان ەكىنشى كەزەڭدە كوپ نارسە كۇتپەيتىنىن اشىق ايتا باستادى. ويتكەنى «توبىل» ەكىنشى اينالىمدا وسى تۋرنيردەگى ەڭ قيىن ءارى ەڭ قاۋىپتى قارسىلاسقا تاپ بولدى.
بىراق ءوز شاكىرتتەرىنىڭ قىر-سىرىن جاقسى بىلەتىن باس باپكەر ميليچ چۋرچيچ ماتچقا دەيىن كومانداسىنىڭ جەڭىسىنە سەنىمدى بولدى. ويىن الدىنداعى ءباسپاسوز ءماسليحاتىندا ول بۇگىنگى ويىندا «بازەلدى» جەڭۋگە بولاتىنىن سەنىمدى تۇردە مالىمدەدى. باس باپكەردىڭ بۇل ءسوزى ماتچ قارساڭىندا كەڭ تالقىلانعانىمەن, شۆەيتساريالىقتار ميليچ ءچۋرچيچتىڭ بۇل مالىمدەمەسىن ەلەگەن جوق. ناتيجەسىندە, «توبىل» فۋتبولشىلارى شۆەيتساريادا جىگەرلى ويىن كورسەتىپ, الاڭ قوجايىندارىن 3:1 ەسەبىمەن تىزە بۇكتىردى. 38 مىڭ جانكۇيەرگە ارناپ سالىنعان «سانكت-ياكوب پارك» ستاديونىندا وتكەن كەزدەسۋدىڭ ەسەبىن 25-مينۋتتا الاڭ قوجايىندارى ساپىنان تەرنو بارري اشقانىمەن, ەكىنشى تايمدا جەرلەستەرىمىز قاتارىنان ءۇش گول سوعىپ, «بازەلگە» بەت قاراتقان جوق. 57-مينۋتتا سەرج دەبلە 11 مەترلىك نۇكتەدەن ءمۇلت كەتپەسە, 62-مينۋتتا رامازان ورازوۆ الىستان ءدال سوققى جاسادى. ارادا توعىز مينۋت وتكەندە يسلام چەسنوكوۆ كەزدەسۋدىڭ نۇكتەسىن قويدى – 3:1.
«تورپەدونى» تاپتاپ ءوتتى
«توبىلدىڭ» سىرت الاڭداعى تاريحي جەڭىسىنەن كەيىن جاسىل الاڭعا شىققان «اقتوبە» فۋتبولشىلارى سىرت الاڭدا گرۋزيانىڭ «تورپەدو» كلۋبىنان باسىم ءتۇسىپ, فۋتبول جانكۇيەرلەرىن قۋانىش پەن شاتتىققا بولەدى.
ارينە, «تورپەدو» كومانداسى «اقتوبەنىڭ» دەڭگەيىندەگى كوماندا بولماسا دا, جەرلەستەرىمىزدىڭ بۇل جەڭىسىنە جانكۇيەرلەردىڭ ەرەكشە قۋانۋىنا ايتارلىقتاي سەبەپ بار. ويتكەنى «اقتوبە» فۋتبولشىلارى كلۋب باسشىلىعىنىڭ سالعىرتتىعىنا بايلانىستى گرۋزياعا ماتچ بولاردان ءبىر كۇن بۇرىن ەمەس, تەك ويىن كۇنى عانا ارەڭ جەتتى. كلۋب باسشىسى سەرگەي كۋلەنكو كوماندانى گرۋزياعا جەتكىزۋ ءۇشىن رەسەيدىڭ تۋلا قالاسىنىڭ چارتەرىنە تاپسىرىس بەرگەن. الايدا قازىرگى ساياسي جاعدايعا بايلانىستى گرۋزيالىقتار رەسەيدىڭ ۇشاعىن قابىلداۋدان باس تارتىپ, رەيس كەلەسى كۇنگە قالدى. وسىنداي «تار جول, تايعاق كەشۋگە» قاراماستان «اقتوبە» فۋتبولشىلارى جاسىل الاڭدا ايانىپ قالماي, جەڭىس ءۇشىن بارىن سالدى.
ابىروي بولعاندا, «اقتوبەگە» بۇل كەزەڭدە «بازەل», «لەگيا» سياقتى داڭقتى قارسىلاستار ەمەس, «تورپەدو» كومانداسى تاپ كەلدى. ايتپەسە, قايبىر جىلعى «استانا» سياقتى ماسقارا بولىپ جەڭىلەر مە ەدى, كىم ءبىلسىن؟! ەۋروپا فۋتبولى بىلاي تۇرسىن, ءوز ەلىندە اسا مول تابىسقا جەتە قويماعان كۋتايسي كلۋبى شارشاپ-شالدىعىپ جەتكەن «اقتوبەنى» ءوز الاڭىندا اياقتان شالا الماي, جەر تەپكىلەپ قالدى.
ەل چەمپيوناتىنىڭ كۇمىس جۇلدەگەرلەرى سىرت الاڭداعى ماتچ تاعدىرىن ءبىرىنشى تايمنىڭ وزىندە شەشىپ تاستادى دەۋگە بولادى. ءبىرىنشى تايمدا ۇلتتىق قۇرامانىڭ ويىنشىسى الىبەك قاسىم پەنالتيدەن ەسەپتى اشسا, 43-مينۋتتا ميلوش رايچكوۆيچ ەسەپتى ەسەلەي ءتۇستى. ال كەزدەسۋدىڭ ەكىنشى جارتىسىندا ماكسيم سامورودوۆ «اقتوبەنىڭ» ءۇشىنشى گولىن سوعىپ, تابلوداعى كورسەتكىشتى 3:0-گە جەتكىزدى. ءۇشىنشى گول سوعىلعان سوڭ جەرلەستەرىمىزدىڭ ويىنى سايابىرسىپ قالعانداي بولدى. سول ءساتتى «تورپەدو» فۋتبولشىلارى ءتيىمدى پايدالانىپ, 89-مينۋتتا تارازى باسىن قىسقارتا الدى. دەگەنمەن جەرگىلىكتى جانكۇيەرلەر گەورگي ارابيدزەنىڭ گولىنا قۋانىپ بولعانشا اندريا فيليپوۆيچ «اقتوبەنىڭ» ءتورتىنشى گولىن قاقپاعا ەنگىزدى – 4:1.
تورەشى «ورداباسىنى» جىعىپ بەردى
شىمكەنتتىڭ «ورداباسى» كلۋبى «توبىل» سياقتى ىرىكتەۋ كەزەڭىندە ەڭ قيىن قارسىلاسقا تۇسسە دە ءوز جانكۇيەرلەرىن جەرگە قاراتقان جوق. پولشانىڭ «لەگياسىن» قابىلداعان شىمكەنتتىكتەر ءوز الاڭىندا 2:2 ەسەبىمەن تەڭ وينادى.
كەزدەسۋدىڭ ءبىرىنشى تايمىن جوعارى دەڭگەيدە وتكىزگەن جەرلەس-
تەرىمىز ۇزىلىسكە دەيىن قارسىلاستاردىڭ قاقپاسىنا جاۋاپسىز ەكى گول سوقتى. 13-مينۋتتا ۆسەۆولود سادوۆسكي مەرگەندىگىمەن كوزگە تۇسسە, كەيىننەن قورعاۋشى مامادۋ مبودجا اسحات تاعىبەرگەننىڭ بۇرىشتامادان اسىرعان پاسىنا ءبىرىنشى جەتىپ, ەسەپتى 2:0-گە جەتكىزدى.
دەگەنمەن ويىنداعى بارلىق قىزىق ەكىنشى تايمدا باستالدى. «لەگيا» فۋتبولشىلارى ەكىنشى 45 مينۋتتىقتا تورەشىمەن قوسقاندا «ورداباسىعا» قارسى 12 ويىنشى بولىپ ويناپ, «ورداباسى» قاقپاسىنا ەكى گول توعىتتى. ءبىرىنشى گولدى توماش پەكحارت ويىن جاعدايىندا سوققانىمەن, 86-مينۋتتاعى بلاج كرامەردىڭ ەكىنشى گولىنا كۇمانمەن قاراۋعا بولادى. ويتكەنى ءبىر ەمەس, ەكى فۋتبولشىسى ويىننان تىس جاعدايدا قالىپ قويسا دا, باس تورەشى مەن قاپتالداعى لاينسمەن بۇل جاعدايعا كوز جۇما قاراپ, «ورداباسىنىڭ» قاقپاسىنا سوعىلعان گولدى ەسەپتەپ جىبەردى. وسىدان كەيىن «ورداباسىنىڭ» وزبەكستاندىق شابۋىلشىسى بوبۋر ابدۋحوليكوۆتى «لەگيا» فۋتبولشىلارى ءوز ايىپ الاڭىندا شالىپ قۇلاتتى. يسلانديالىق تورەشى بۇل جاعدايعا دا نازار اۋدارماي, تازا پەنالتيدى بەرمەي قويدى. تورەشىنىڭ سالعىرتتىعىنان كەيىن «ورداباسى» جەڭىپ تۇرعان ماتچتا تەڭ ويناۋعا ءماجبۇر بولدى. ارينە, 2:2 ەسەبى دە جامان ەمەس, بىراق قارىمتا ويىندا بۇل ناتيجە شىمكەنتتىك كلۋبقا ەشقانداي باسىمدىق بەرمەيتىنى بەلگىلى. ەندى 3 تامىزدا ۆارشاۆادا وتەتىن ماتچتا «لەگيا» جەڭىستى وڭاي بەرىپ قويمايتىنى انىق.
«مەنىڭ ويىمشا, بۇگىنگى ماتچ بارىنە ۇناعان سياقتى. ويتكەنى مۇنداي دەڭگەيدەگى كوماندالار شىمكەنتكە ءجيى كەلە بەرمەيدى. ويىنعا كەلەر بولساق, كەزدەسۋدىڭ باس تورەشىسى ەكىنشى تايمدا ويىندى باقىلاۋىنان شىعارىپ الدى. «لەگيانىڭ» ەكىنشى گولى تازا وفسايد بولدى. وسى جاعدايدان كەيىن تورەشى ابدۋحوليكوۆپەن بولعان ەپيزودتا پەنالتي تاعايىنداۋعا بولار ەدى. بىراق ول ولاي ىستەمەدى. ەندى پولشادا بارلىعىن باسىنان باستايمىز», دەيدى باس باپكەر الەكساندر سەدنيوۆ.
«ورداباسى» كلۋبىنىڭ قورعاۋشىسى سەرگەي مالىي دا الەۋمەتتىك جەلىدە تورەشىنىڭ ارەكەتتەرىنە نارازى ەكەنىن ءبىلدىردى. ء«بىز بۇل ويىندا 3:0 ەسەبىمەن جەڭۋىمىز دە, 3:2 ناتيجەسىمەن ۇتىلۋىمىز دا مۇمكىن ەدى. بىراق تورەشىلەر نەگە ءبىزدىڭ كلۋبتارعا عانا ادىلەتسىزدىك جاسايدى؟ ويىننان تىس جاعدايدا سوعىلعان گولدى ەسەپتەيدى دە, ەرەجە بۇزىلعان جاعدايدا پەنالتي بەلگىلەمەيدى. دانيادان, يسلانديادان كەلگەن تورەشىلەر ءبىزدىڭ كلۋبتاردى اياقتان شالىپ جاتىر. بۇل بەي-بەرەكتسىزدىكتىڭ دە شەگى بار شىعار؟» دەپ جازدى قورعاۋشى الەۋمەتتىك جەلىدە.
