ستۋدەنتتەر سايىسىنىڭ ەكىنشى كۇنىندە ءتورت سپورت تۇرىنەن العاشقى جۇلدەلەر ساراپقا سالىندى. دزيۋدو سپورتى بويىنشا وتكەن باسەكەلەردە تاتاميگە شىققان 66 كگ سالماقتاعى وتانداسىمىز سۇڭعات جۇباتقان قولا جۇلدەگەر اتاندى. ءۇشىنشى ورىن ءۇشىن بولعان كەزدەسۋدە ول وزبەكستاندىق ابدۋراحيم نۋتفۋللوەۆتان ايلاسىن اسىردى. بۇل سالماقتا سۇڭعاتتى جارتىلاي فينالدا الىپ جىققان جاپونيالىق حاتتوري شينسەي توپ جاردى.
ءال-فارابي اتىنداعى قازۇۋ ستۋدەنتى سۇڭعات جۇباتقان ماۋسىم ايىندا دۋشانبەدە وتكەن گران-پري تۋرنيرىندە قولا جۇلدەگەر اتانىپ, استانادا تۇڭعىش رەت ۇيىمداستىرىلعان «Grand Slam» تۋرنيرىنە قاتىسقان. سونداي-اق ول 2015 جىلى كادەتتەر (18 جاسقا دەيىنگى) اراسىندا ازيا چەمپيونى اتانعان.
ايتا كەتەيىك, ۋنيۆەرسيادادا 18 سپورت تۇرىنەن 269 مەدال ساراپقا سالىنىپ جاتىر. بۇل جارىسقا ساداق اتۋ, گيمناستيكا, جەڭىل اتلەتيكا, سەمسەرلەسۋ, دزيۋدو, ءجۇزۋ, ۇستەل تەننيسى, تاەكۆوندو, ۋشۋ سياقتى 11 سپورت تۇرىنەن 93 سپورتشىدان تۇراتىن قازاقستاننىڭ سپورتتىق ستۋدەنتتىك قۇراماسى قاتىسىپ جاتىر.
