بۇگىندە قالالىق ارحيۆتە 736 قور جانە 404 458-دەن استام ساقتاۋ بىرلىگى بار. ەلوردا تۇرعىندارىنىڭ تاريحىنىڭ شىنايى ايعاعىنا اينالعان كورنەكتى قۇجاتتاردىڭ جەكە تەكتىك قور ەسەبىندە ماڭىزى زور. ماسەلەن, ارحيۆ قورىنا تاپسىرىلعان قۇجاتتار عابدوللا بايتەن ۇلىنىڭ تۋعان ولكەسى قاراقويىن – قاشىرلى ءوڭىرىنىڭ رۋحاني, ساياسي ومىرىنەن, مادەنيەتى مەن تاريحىنان مول ماعلۇمات بەرەدى. بۇل ءوز كەزەگىندە سول ولكەنىڭ ازاماتتارىنا ۇلكەن اقپاراتتىق كومەك.
شارا بارىسىندا باتىردىڭ ءومىربايانى مەن وشپەس مۇراسى ارقاۋ بولعان «قاشىرلى سىر-ساندىعى» اتتى باسىلىمنىڭ تۇساۋى كەسىلدى. بۇل ەڭبەكتە قالامگەردىڭ ومىردەن تۇيگەن وي-پىكىرى مەن پايىمى, قولجازبا يەسىنىڭ شىعارمالارى, وسيەت سوزدەرى, ەل اراسىنان جيناپ-تەرگەن شەجىرە-داستاندارى توپتاستىرىلدى. شىعارمالاردا قازىرگى ۋاقىتتا ۇمىتىلىپ بارا جاتقان جەر-سۋ اتاۋلارىنىڭ فوتوسۋرەتتەرى دە كورىنىس تاپقان.
«اۋىلىڭدا قارتىڭ بولسا, جازىپ قويعان حاتپەن تەڭ» دەگەن قازاقتىڭ ناقىل ءسوزى بار. وسى قازىنالى قارتتاردىڭ ايتىپ ۇرپاققا قالدىرعان ونەگەلى سوزدەرى, ۇلگى بولار تاعىلىمدى ىستەرى, ەلىنىڭ, ءوزى تۋعان ولكەسىنىڭ ءوسىپ-وركەندەۋىنە ارناعان ەڭبەك جولدارى, ءبىر سوزبەن ايتقاندا, بارلىق بولمىسى – تۇنىپ تۇرعان اڭىز بەن تاريح», دەدى استانا قالاسى مەملەكەتتىك ءارحيۆى ديرەكتورىنىڭ مىندەتىن اتقارۋشى جانگەلدى بيمولدين. سونىمەن قاتار عابدوللا بايتەن ۇلىنىڭ جازىپ قالدىرعان مۇراسى كوپشىلىك كورەرمەن نازارىنا كورمە ارقىلى ۇسىنىلدى. ونىڭ ماقساتى – ەلىمىزدىڭ تاريحى مەن مادەنيەتىنە قاتىستى سيرەك كەزدەسەتىن قولجازبالاردى كەڭىنەن ناسيحاتتاۋ, الەۋمەتتىك ءرولىن انىقتاۋ.
جيىن سوڭىندا قوناقتار مەن باتىر ۇرپاقتارى ەستەلىك سۋرەتكە ءتۇسىپ, وقۋشىلارعا كىتاپ ۇسىندى.
