بەس جىلدان بەرى بەلگيادا تۇرىپ جاتقان الماتىلىق قازاق ساعىنعالي ماماي بريۋسسەلدەگى جوعارعى تەحنولوگيا مەكتەبىندە ءبىلىم الىپ, سول جەردە توقىما ونەركاسىبى سالاسىندا جۇمىس ىستەپتى.
Qazaqstan ۇلتتىق ارناسى حابارلاعانداي, ءبىر ءوزى كارى قۇرلىقتاعى اعايىندى قازىمەن قامتاماسىز ەتكەلى ەكى جىل بولعان.
ساعىنعالي ماماي قازى جاساپ كورۋگە بەل بۋعان كەزدە جىلقى ەتى ول جەردە تاپشى بولعاندىقتان, سول ەتتى, ىشەكتەردى, بارلىق ينگرەديەنتتەرىن تابۋعا جارتى جىل ۋاقىتى كەتكەن. الدىمەن وزىنە جاساپ, ونان سوڭ دوستارى, دوستارىنىڭ دوستارى, ءارى قاراي, ادامدار ءبىر-بىرىنەن ەستىپ, قازىعا تاپسىرىس كوبەيگەن.
ارنا ءتىلشىسىنىڭ ايتۋىنشا, قازىر جىلقىنىڭ ەتىن جەمەيتىن بەلگيالىقتار تاراپىنان قازاقتىڭ قازىسىنا سۇرانىس ارتىپ, بىردەن 30 قازى جاساۋعا دا تاپسىرىس بەرىلەدى ەكەن.
عالامتوردان قازى اينالدىرۋدى ۇيرەنگەن كاسىپكەردىڭ سوزىنشە, ءبىر قازىنى اينالدىرۋعا 5-10 مينۋت ۋاقىت كەتەدى, جىڭىشكە ىشەككە ەتتى تەز تىعىنداۋ ءۇشىن پلاستيكتەن ارنايى قۇرال جاساپ العان. تۇتىنۋشىنىڭ تالعامىنا سايكەس, وزبەكتەرگە ءانىس وسىمدىگىن قوسىپ, ەۋروپالىقتارعا قازىنىڭ مايىن ازداۋ قىلىپ اينالدىرادى ەكەن. قازى جاساۋدىڭ حاس شەبەرىنە, اسىرەسە ەۋروپاداعى ءوز قانداستارىمىز ريزا.
«قوناق شاقىرىپ, ەت اساتىن بولساق, اۋەلگى حابارلاساتىن كىسىمىز وسى ساعىنعالي. بىردەن اكەلىپ بەرەدى. قازىنى وتە ءدامدى قىلىپ دايىندايدى. ءدامى قازاقستاندا جاسالىناتىن قازى سياقتى», دەيدى بەلگياداعى قازاق دياسپوراسىنىڭ وكىلى اينۇر وڭتالاپقىزى.
جەكەلەگەن ادامداردىڭ ۇلتتىق دامگە دەگەن ساعىنىشىن باسىپ جۇرگەن كاسىپكەر قازىر ەۋروپا قازاقتارىنىڭ توي-دومالاقتارىنا ءىرى كولەمدە تاپسىرىس الادى ەكەن. قازىنىڭ باعاسى سالماعىنا قاراي 15-25 ەۋرو ارالىعىندا. قازاقتاردى شاتتىققا بولەپ, شەتەلدىكتەرگە ۇلتتىق تاعامدى دارىپتەپ جۇرگەن ساعىنعالي مامايدىڭ ەندىگى كوزدەگەن جوسپارى - بەلگيادا تسەح اشىپ, قازىلارىن جەرگىلىكتى ساۋدا ورىندارىندا ساتىلىمعا شىعارۋ.
