استانا مەديتسينا ۋنيۆەرسيتەتىندە ۇيىمداستىرىلعان كەلەلى جيىندا تراۆماتولوگيا مەن ورتوپەديا سالاسىنداعى وتاندىق جانە شەتەلدىك مامانداردىڭ, سونداي-اق وسى سالامەن ساباقتاس مامانداردىڭ باسى قوسىلىپ, ۇلكەن تاجىريبە الماسۋ الاڭى سالتانات قۇردى. ءىس-شارا بارىسىندا تىرەك-قيمىل اپپاراتىنىڭ زاقىمدانۋى مەن اۋرۋلارىن دياگنوستيكالاۋ جانە ەمدەۋ, سونداي-اق مەديتسينالىق مەكەمەلەردىڭ پراكتيكاسىنا يننوۆاتسيالاردى ەنگىزۋ ماسەلەلەرى كەڭىنەن تالقىلانىپ جاتىر.
دەنساۋلىق ساقتاۋ ءمينيسترى اجار عينيات ءوزىنىڭ قۇتتىقتاۋ سوزىندە مەملەكەت باسشىسى ساياساتىنىڭ ارقاسىندا وتاندىق دەنساۋلىق ساقتاۋ سالاسى ءوز دامۋىندا سەرپىلىس جاساي العانىن, بۇل قازاقستاندىقتاردىڭ ءومىر ءسۇرۋ ساپاسىنا وڭ اسەر ەتكەنىن اتاپ ءوتتى. سونداي-اق ول بۇگىنگى تاڭدا ەلىمىزدەگى تراۆماتولوگيا جانە ورتوپەديا سالاسى عىلىمي زەرتتەۋلەردىڭ كەڭ سپەكترىن جۇزەگە اسىرىپ, جاڭا مەديتسينالىق تەحنولوگيالاردى بەلسەندى تۇردە ەنگىزىلىپ جاتقانىن العا تارتتى.
«ەلىمىزدە ەكونوميكالىق ءال-اۋقاتتىڭ وسۋىمەن تىكەلەي بايلانىستى دەنساۋلىق ساقتاۋ سالاسىنىڭ جوسپارلى دامۋى بايقالادى. جوعارى تەحنولوگيالاردى, الەمدىك جەتىستىكتەردى جوسپارلى پايدالانۋدى جەدەلدەتۋ, دارىگەرلىك كادرلاردى دايارلاۋ جانە ولاردىڭ بىلىكتىلىگىن ارتتىرۋ, تىرەك-قيمىل اپپاراتىنىڭ زاقىمدانۋى مەن اۋرۋلارى كەزىندە دياگنوستيكا مەن ەمدەۋدىڭ جاڭا تەحنولوگيالارىن بەلسەندى ەنگىزۋ ماڭىزدى», دەدى مينيستر.
اتالعان كونفەرەنتسيا مەديتسينا عىلىمدارىنىڭ دوكتورى, پروفەسسور, قازاقستان جاراتىلىستانۋ عىلىمدارى اكادەمياسىنىڭ تولىق مۇشەسى, عىلىمعا قوسقان زور ۇلەسى ءۇشىن ءال-فارابي كۇمىس مەدالىنىڭ لاۋرەاتى الىبەك ءابدىراحمانوۆتىڭ 80 جىلدىعىنا ورايلاستىرىلعان. وسى ورايدا دەنساۋلىق ساقتاۋ ءمينيسترى ا.عينيات پروفەسسور ءا.ابدىراحمانوۆقا اكادەميك ن.ج.باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعىنىڭ قۇرمەتتى پروفەسسورى اتاعىن تابىس ەتتى.
جاس دارىگەرلەر ءۇشىن مۇنداي كەزدەسۋلەر شەتەلگە شىقپاي-اق دارەجەسى جوعارى ايتۋلى تۇلعالارمەن, پروفەسسورلارمەن, الىس جانە جاقىن شەتەلدەردىڭ ءىرى ورتالىقتارىنىڭ باسشىلارىمەن تانىسۋعا جانە ولاردىڭ تاجىريبەسىنە قانىعۋعا مۇمكىندىك تۋعىزىپ وتىر. سونداي-اق وسىناۋ كونفەرەنتسيا اياسىندا جاس مامانداردىڭ قىزىعۋشىلىعىن ارتتىرۋ ءۇشىن اقشالاي سىياقىسى بار «باتپەنوۆ وقۋلارى» اتتى جاس عالىمدار كونكۋرسى وتكىزىلەدى.
بۇعان قوسا باعدارلامادا رەسەي, قىتاي, تۇركيا, گەرمانيا, ءۇندىستان, ءباا جانە وزبەكستان ساراپشىلارىنىڭ كۇردەلى وپەراتسيالارىن تالدايتىن شەبەرلىك ساباقتارى جوسپارلانعان.
