ءىس-شارادا ءسوز العان قمگ باسشىسى م.مىرزاعاليەۆ جوبا مەملەكەت باسشىسىنىڭ بيىل 9 ناۋرىزدا باتىس قازاقستان وبلىسىنا جۇمىس ساپارى بارىسىندا بەرگەن تىكەلەي تاپسىرماسىمەن ىسكە اسقالى وتىرعانىن اتاپ ءوتتى. «پرەزيدەنت حالىق اراسىندا سالاماتتى ءومىر سالتىن ناسيحاتتاۋ مەن جاستار اراسىندا سپورتتى دارىپتەۋدىڭ ايرىقشا ماڭىزىن ۇنەمى العا تارتىپ كەلەدى», دەپ اتاپ ءوتتى م.مىرزاعاليەۆ.
– كومپانيامىز ءۇشىن بۇل – تۇراقتى دامۋ بويىنشا العان مىندەتتەرىمىزدىڭ ءبىرىن ورىنداۋ عانا ەمەس, «قازمۇنايگازدىڭ» باستى قۇندىلىقتارعا – جاۋاپكەرشىلىك پەن قوعامعا دەگەن قامقورلىعىنىڭ كورىنىسى. بىلتىردىڭ وزىندە ۇلتتىق كومپانيا قايىرىمدىلىققا – شامامەن 13 ملرد تەڭگە, وڭىرلەردىڭ الەۋمەتتىك دامۋىنا 12 ملرد تەڭگە بولگەنىن اتاپ ءوتۋ كەرەك. بۇل قاراجاتقا تۇرعىن اۋداندار مەن قالانىڭ كورىكتى جەرلەرىندە اباتتاندىرۋ جۇمىستارى جۇرگىزىلىپ, مەكتەپتەر مەن اۋرۋحانالار, سپورت الاڭدارى مەن وزگە دە نىساندار سالىنىپ جاتىر», – دەپ تولىقتىردى ۇلتتىق كومپانيا باسشىسى.
سپورت كەشەنى ورال قالاسىنىڭ 10-شاعىن اۋدانىندا سالىنادى. جوسپار بويىنشا ونىڭ قۇرىلىسى 2024 جىلدىڭ سوڭىندا اياقتالادى.
سپورت كەشەنىندە ءتۇرلى جارىس وتكىزۋمەن قاتار, سپورتشىلاردىڭ جاتتىعۋىنا دا بارلىق مۇمكىندىك جاسالادى. عيمارات ىشىندە جۇگىرۋگە ارنالعان 150 مەترلىك جولاعى بار, يادرو لاقتىرۋ, بيىكتىككە, ۇزىندىققا, سىرىقپەن سەكىرۋگە, ساداق اتۋعا ارنايى جابدىقتالعان جەڭىل اتلەتيكا ارەناسى دا سالىنادى.
اتالعان ارەنادا 1 200 ورىنعا ارنالعان تريبۋنا بولادى. سونىمەن قاتار سپورت كەشەنىندە 25 مەترلىك بىرنەشە جولاعى بار باسسەين سالۋ, پنەۆماتيكالىق تير, جارتاسقا ورمەلەۋ الاڭىن, ۇستەل تەننيسىن, باتۋت, كۇرەس جانە بوكس زالدارىن اشۋ جوسپاردا بار.
قمگ باسقارما توراعاسى مەردىگەرلەرگە قاراتا ايتقان سوزىندە, قۇرىلىس ساپاسى ۇدايى باقىلاۋدا بولاتىنىن, سەبەبى جەرگىلىكتى سپورتشىلاردىڭ الداعى دايىندىعى وسى جۇمىستىڭ ساپاسىنا بايلانىستى ەكەنىن اتاپ ءوتتى.
«وسى جەردە بوي كوتەرەتىن كەشەن ناعىز سپورت ساڭلاقتارىن, ميلليونداعان جانعا ۇلگى بولاتىن بولاشاق چەمپيونداردى تاربيەلەپ شىعاراتىنىنا كامىل سەنەمىز. زاماناۋي ارحيتەكتۋرالىق شەشىمدەردىڭ ارقاسىندا كەشەن قالاعا ەرەكشە كورىك بەرىپ, ورالدىڭ كوز تارتار كوركەم جەرلەرىنىڭ بىرىنە اينالاتىنى ءسوزسىز», دەدى قمگ باسقارما توراعاسى م.مىرزاعاليەۆ.
