قىتايداعى دوداعا قازاقستان اتىنان 93 قاتىسۋشى سپورتتىڭ 11 تۇرىنەن جۇلدەلەرگە تالاسىپ كورەدى. ولار ساداق اتۋ, وق اتۋ, جەڭىل اتلەتيكا, سپورتتىق گيمناستيكا, دزيۋدو, كوركەم گيمناستيكا, ۇستەل تەننيسى, تاەكۆوندو, ۋ-شۋ, ءجۇزۋ جانە سەمسەرلەسۋ بويىنشا سىنعا تۇسەدى. ەل قۇراماسى ەلىمىزدىڭ 26 جوعارى وقۋ ورنىنىڭ ستۋدەنتتەرىنەن جاساقتالعان.
جازعى سپورت تۇرلەرىنەن دۇنيە ءجۇزى ستۋدەنتتەرىنىڭ ويىندارى باستاپقىدا 2021 جىلى ءوتۋى كەرەك ەدى. الايدا قىتاي بيلىگى كوروناۆيرۋس پاندەمياسىنا بايلانىستى العاش بۇل جارىستى 2022 جىلعا, كەيىننەن 2023 جىلعا شەگەردى. دەگەنمەن توكيو وليمپياداسى سياقتى بيىلعى جازعى ۋنيۆەرسيادا ويىندارى دا چەندۋ–2021 رەسمي اتاۋى اياسىندا وتكىزىلە بەرەدى.
ۇلكەن پاندالار مەكەندەيتىن چەندۋ قالاسى قىتايدا جازعى ۋنيۆەرسيادانى قابىل-
داپ جاتقان ءۇشىنشى قالا اتانىپ وتىر. بۇعان دەيىنگى ستۋدەنتتەردىڭ جازعى ويىندارى 2001 جىلى بەيجىڭدە, 2011 جىلى شەنچجەندە ۇيىمداستىرىلعان ەدى. ال 2009 جىلى حاربيندە قىسقى ۋنيۆەرسيادا باسەكەسى وتكەنى دە بەلگىلى.
جازعى ۋنيۆەرسيادا جارىستارىن قابىلداۋ ءۇشىن چەندۋ قالاسىندا 36 نىسان كۇردەلى جوندەۋدەن ءوتىپ, 13 جاڭا نىسان سالىنعان. چەندۋ ۋنيۆەرسيتەتىنىڭ كامپۋسىندا ورنالاسقان ۋنيۆەرسيادا اۋىلى جەر-جاھاننىڭ تۇكپىر-تۇكپىرىنەن كەلەتىن 11 مىڭعا جۋىق سپورتشىنى, جاتتىقتىرۋشىلاردى جانە دەلەگاتسيا مۇشەلەرىن قابىلدايدى.
تاعى ءبىر ايتا كەتەرلىگى, حالىقارالىق ستۋدەنتتىك سپورت فەدەراتسياسى (FISU) جازعى ۋنيۆەرسيادا ويىندارى 2021 جىلدان 2023 جىلعا اۋىستىرىلعاندىقتان, بيىلعى جارىسقا قاتىسۋشىلاردىڭ جاس مولشەرىن 25-تەن 27 جاسقا دەيىن ۇلعايتۋ تۋرالى شەشىم قابىلداعان ەدى. سونداي-اق ۋنيۆەرسيتەت ستۋدەنتتەرى نەمەسە ءبىر جىل بۇرىن وقۋىن اياقتاعاندار دا ۋنيۆەرسياداعا قاتىسا الاتىنى تۋرالى دا ەرەجە ەنگىزىلدى. چەندۋدەگى جارىستارعا 2020 جانە 2021 جىلدارداعى جوعارى وقۋ ورىندارىنىڭ تۇلەكتەرى دە قاتىسا الادى.
رەسمي دەرەك بويىنشا بيىلعى جازعى ۋنيۆەرسيادادا الەمنىڭ 119 ەلىنەن 6 517 سپورتشى باق سىنايدى. ولار سپورتتىڭ 18 ءتۇرى بويىنشا 296 جۇلدە جيىنتىعىن ساراپقا سالادى. جارىستىڭ اشىلۋ سالتاناتى رەسمي تۇردە بۇگىن وتكەنىمەن, باسەكەلەر كەشە باستالىپ كەتتى. 27 شىلدەدە جەرلەستەرىمىز ساداق اتۋدان العاشقى جارىستارىن وتكىزدى.
جارىستىڭ اشىلۋ سالتاناتىندا ەلىمىزدىڭ كوك بايراعىن ى.التىنسارين اتىنداعى ارقالىق پەداگوگيكا ينستيتۋتىنىڭ 3-كۋرس ستۋدەنتى, 19 جاستاعى دزيۋدوشى قابىلان نۇرسۇلتان ۇستاپ شىعادى. نۇرسۇلتان دزيۋدو سپورتىمەن 2013 جىلدان بەرى تۇراقتى اينالىسىپ كەلەدى. بۇگىنگە دەيىن ول جاسوسپىرىمدەر اراسىندا ەل بىرىنشىلىگىندە توپ جارىپ, جاسوسپىرىمدەر اراسىنداعى ازيا چەمپيوناتىندا قولا جۇلدە ەنشىلەگەن. سونىمەن قاتار اكادەميك ق.ساتباەۆتى ەسكە تۇسىرۋگە ارنالعان دزيۋدودان حالىقارالىق تۋرنيردە كۇمىس, قازاق كۇرەسىنەن «جاس بارىس» رەسپۋبليكالىق باسەكەسىندە باس جۇلدەنى جەڭىپ العان.
ۋنيۆەرسيادا جارىستارى «ارماندار چەندۋدە شىندىققا اينالادى» دەگەن ۇرانمەن وتەدى.
