اتالعان ءىس-شارا «جاسىل ەكونوميكانى قولداۋ جانە G-Global دامىتۋ كواليتسياسى» زتب, «الەۋمەتتىك ديناميكا» قوعامدىق قورى, قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, «اتامەكەن» ۇكپ وكىلدەرى مەن الماتى, جامبىل, جەتىسۋ, قىزىلوردا, تۇركىستان وبلىستارى اكىمدىكتەرىنىڭ قولداۋىمەن ۇيىمداستىرىلدى.
فورۋمعا اۋىلدى دامىتۋ باعىتىندا الىستان ات تەرلەتىپ, وزدەرىنىڭ وي-پىكىرلەرىن جەتكىزۋگە كەلگەن ەڭ بەلسەندى ىسكەر قىز-كەلىنشەكتەر قاتىستى. وبلىستاردىڭ مەملەكەتتىك قۇرىلىمدارى مەن قوعامدىق ۇيىمداردىڭ وكىلدەرى دە وسى جيىننان تابىلدى. شاقىرىلعاندار الدىمەن جەتىسۋ وبلىسى كاسىپكەرلەرى مەن «Coca-Cola بەلەستەرى» جەڭىمپازدارىنىڭ قاتىسۋىمەن ۇيىمداستىرىلعان كورمەنى تاماشالادى. وندا ازىق-ت ۇلىك ونىمدەرى مەن ءارتۇرلى بۇيىم كوپشىلىك نازارىنا ۇسىنىلدى. ءىس-شارا اياسىندا ەلدەگى اۋىل ايەلدەرىنىڭ فورۋمدارى تۋرالى بەينەبايان كورسەتىلدى.
ءىس-شارا شىمىلدىعىن قازاقستان اۋىل ايەلدەرى فورۋمىن ۇيىمداستىرۋ كوميتەتىنىڭ توراعاسى, IV, V, VI شاقىرىلىمداعى پارلامەنت ءماجىلىسىنىڭ دەپۋتاتى مايرا ايسينا اشىپ, ءسوز سويلەدى. ايتۋىنشا, اۋىل ايەلدەرى فورۋمىنىڭ تاريحى 2018 جىلى استانا قالاسىندا وتكەن العاشقى رەسپۋبليكالىق فورۋمنان باستاۋ العان. ەلىمىزدە 6 جىلدان بەرى تۇراقتى ۇيىمداستىرىلىپ كەلە جاتقان بۇل ءىس-شارا كوروناۆيرۋس پاندەمياسى كەزەڭىندە ونلاين فورماتتا وتكەن.
جيىندا ءسوز العان جەتىسۋ وبلىسى اكىمىنىڭ ورىنباسارى رۋستام ءالي: «بۇل فورۋم ايەلدەر بيزنەسىنىڭ دامۋىنا سەرپىن قوسىپ, قوعامداعى ايەل كاسىپكەرلەردىڭ مارتەبەسىن ارتتىرۋعا مۇمكىندىك بەرمەك. سونداي-اق ەكونوميكانىڭ تابىستى دامۋىنىڭ نەگىزگى دىڭگەگى بولىپ, تيىسىنشە حالىقتىڭ ءومىر ءسۇرۋ ساپاسىن ارتتىرۋعا وڭ اسەر ەتەتىن شاعىن جانە ورتا كاسىپكەرلىكتى دامىتۋعا باعىتتالعان بىرلەسكەن باستامالاردى ازىرلەۋ ءۇشىن جەمىستى الاڭ بولاتىنىنا سەنەمىن» دەدى.
سونداي-اق ول جەتىسۋ وبلىسى تۇرعىندارىنىڭ 353 مىڭى ايەل بولسا, سونىڭ 193 مىڭى اۋىلدى جەرلەردە تۇراتىنىن, ايماقتا جىل سايىن تابىستى كاسىپكەرلەر سانى ارتىپ, اۋىلدى جەردە شاعىن بيزنەستىڭ ءوسۋ ۇستىندە ەكەنىن تىلگە تيەك ەتتى. بۇگىنگى تاڭدا ايماقتا 58 مىڭ جۇمىس ىستەپ تۇرعان شاعىن جانە ورتا كاسىپكەرلىكتە ەڭبەك ەتەتىندەردىڭ 49%-ىن ايەلدەر باسقارادى. سۋبسيديالار مەن جەڭىلدەتىلگەن نەسيەلەر تۇرىندەگى مەملەكەتتىك قولداۋدىڭ ارقاسىندا اۋىلداعى كوپتەگەن ايەل ناۋبايحانا, دۇكەن, بالاباقشا, كيىم مەن اياقكيىم تىگۋ جانە جوندەۋ, كونديتەرلىك ونىمدەر ءوندىرۋ, ءسۇت وڭدەۋ سياقتى باسقا دا باعىتتاردا شاعىن تسەحتار اشقان.
بۇدان سوڭ قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, وڭتۇستىك وبلىستار اكىمدەرىنىڭ ورىنباسارلارى, سونداي-اق اۋىل شارۋاشىلىعى, ەڭبەك جانە حالىقتى الەۋمەتتىك قورعاۋ جانە ۇلتتىق ەكونوميكا مينيسترلىكتەرى مەن حالىقارالىق ۇيىمدار وكىلدەرى دە ىزگى تىلەكتەرىن جەتكىزدى. باسقوسۋ بارىسىندا اۋىل-ايماقتاردان جينالعان كاسىپكەر قىز-كەلىنشەكتەر دە وزدەرىنىڭ ۇسىنىس-تىلەكتەرىن ورتاعا سالىپ, ءوزارا تاجىريبە الماسىپ, ءبىلىم-بىلىكتىلىگىمەن ءبولىستى.
جيىندا اۋىلدى تۇراقتى دامىتىپ, ايەلدەر كاسىپكەرلىگىن وركەندەتۋ, جەرگىلىكتى تۇرعىنداردى ءوزىن-ءوزى جۇمىسپەن قامتىپ, جاعدايدى جاقسارتۋ, ءومىر ءسۇرۋ ساپاسىن ارتتىرىپ, اۋىل حالقىنىڭ ءال-اۋقاتىن كوتەرۋ جايى ءسوز بولدى. جەكە كاسىپكەرلىك پەن اۋىل شارۋاشىلىعىن ورىستەتۋ, اتالعان سالاعا قولداۋ كورسەتىپ, بيزنەستىڭ الەۋمەتتىك جاۋاپكەرشىلىگىن قالىپتاستىرۋ, سونداي-اق جەرگىلىكتى دەڭگەيدە 2030 جىلعا دەيىن تۇراقتى دامۋ ماقساتىنا قول جەتكىزۋگە باعىتتالعان مەملەكەتتىك باعدارلامالاردى ىلگەرىلەتۋ ماسەلەسى دە اڭگىمە وزەگىنە اينالدى.
تۇستەن كەيىن فورۋم قاتىسۋشىلارىنا بيزنەس نەگىزدەرى, فەرمەرلىك داعدىلاردى دامىتۋ جانە كووپەراتسيا بويىنشا ترەنينگ ۇيىمداستىرىلدى. ايتا كەتەيىك, بيىلدان باستاپ بۇل فورۋم كوشپەلى تۇردە ءوتىپ, ەلىمىزدىڭ باتىس, شىعىس, ورتالىق جانە سولتۇستىك ايماقتارىن تۇتاس قامتىماق. قورىتىندى ءىس-شارا اۋىل ايەلدەرىنىڭ VI رەسپۋبليكالىق فورۋمى ەلوردادا وتەدى. وعان دەيىن ايماقتىق ماسەلەلەر وسىنداي اشىق ديالوگ الاڭدارىندا تالقىلانىپ, الداعى ماقسات-مىندەتتەر ايقىندالادى.
