وسىناۋ مۇمكىندىكتى تۋدىرىپ, قولايلى جاعداي جاساپ وتىرعان قاناتقاقتى جوبا ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن قولعا الىنىپ جاتىر. ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ كەزىندە تاكسي اگرەگاتورلارىن پايدالانۋ جونىندەگى جوبانى جۇزەگە اسىرۋدىڭ العاشقى 10 كۇنىندە استانا مەن الماتى قالالارىندا اتالعان قىزمەت 268 رەت كورسەتىلدى.
ينۆاتاكسي قىزمەتىنىڭ ساپاسى مەن كورسەتۋ جىلدامدىعىن ارتتىرۋ ماقساتىندا مينيسترلىك اكىمدىكتەرمەن بىرلەسىپ, وسى قىزمەتتىڭ مەحانيزمىنە وزگەرتۋ ەنگىزۋ تۋرالى شەشىم قابىلدادى. مىسالى, وسى كۇنگە دەيىن ازاماتتارعا ينۆاتاكسيدى پايدالانۋ ءۇشىن ءبىر كۇن بۇرىن تەلەفون ارقىلى جازىلۋ قاجەت ەدى. بۇل ءوز ساپارلارىن الدىن الا جوسپارلاۋعا, ينۆاتاكسيدى كۇتۋگە ءماجبۇر ەتەدى. سونداي-اق ينۆاتاكسي قىزمەتتەرىن ۇسىنۋ ءۇشىن كولىك قۇرالدارىنىڭ جەتىسپەۋشىلىگى جانە باسقا دا ماسەلەلەر بار. مىنە, ەندى شارتتاردى جەڭىلدەتۋ ءۇشىن تاكسي اگرەگاتورلارىن تارتۋ بويىنشا قاناتقاقتى جوبا جۇزەگە اسىرىلا باستادى.
ادەتتە اگرەگاتور جاسالعان ساپارلاردىڭ تولەماقىسىنان پلاتفورمالارىنىڭ پايداسىنا بەلگىلى مولشەردە پايىز اۋداراتىن بولسا, مۇنداعى باستى شارت – سول پايىزدىڭ بولماۋى. وسى جۇمىستى قولداعان «ياندەكس» كومپانياسى قاناتقاقتى جوباعا وتەۋسىز نەگىزدە قاتىسۋعا نيەت ءبىلدىردى. ينۆاتاكسي قىزمەتىن ازاماتتار اتالعان جوبا اياسىندا «ياندەكس Go» ءموبيلدى قوسىمشاسى ارقىلى قولدانا الادى. جوبانىڭ ەرەكشەلىگى – قىزمەتتى الۋشى ءۇشىن كولىكتى تەزىرەك تاڭداۋ, ونلاين رەجىمىندە تاپسىرىس مارتەبەسىن قاداعالاۋ جانە ساپارلاردى باقىلاۋدىڭ قاراپايىم جۇيەسى.
بۇل قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلدى. ءوز كەزەگىندە جۇرگىزۋشىلەر ادامدى كولىككە وتىرعىزۋ جانە ودان تۇسۋدە قالاي كومەك كورسەتۋگە بولاتىن سەكىلدى قاجەتتى نۇسقاۋلاردى الادى.
قاناتقاقتى جوباعا العاشقى كەزەڭدە استانا جانە الماتى قالالارىنان مۇگەدەكتىگى بار ادامداردىڭ فوكۋس-توبى قاتىسادى. قىزمەت كورسەتۋدىڭ وڭ ناتيجەسى بولعان جاعدايدا جاڭا فورماتتا مۇگەدەكتىگى بار ادامداردىڭ باسقا توپتارىنا جانە ەلىمىزدىڭ بارلىق وڭىرىندە جۇزەگە اسىرىلادى.
