الەم چەمپيوناتىندا سپورتشىلار ەكى جاس ساناتى بويىنشا (12 جانە 18 جاسقا دەيىن) باس جۇلدەلەردى ساراپقا سالادى. اقتاۋدا العاش رەت جالاۋى جەلبىرەيتىن دۇنيەجۇزىلىك جارىسقا قازىردىڭ وزىندە الەمنىڭ 50 مەملەكەتىنەن 300-گە جۋىق شاحماتشى قاتىسۋعا نيەت بىلدىرگەن. ولاردىڭ اراسىندا پەرۋ, ماداگاسكار, سان-تومە, پرينسيپي سەكىلدى ەلدەردىڭ وكىلدەرى دە بار ەكەنىن ايتا كەتكەن ءجون. بۇل جەردە ءتورت قۇرلىقتىڭ مەكتەپ وقۋشىلارى ءوز مەكتەبىنىڭ جانە ەلىنىڭ نامىسىن قورعاۋ ءۇشىن بارىن سالادى.
بۇل سىندا ەل نامىسىن 6 قالادا ورنالاسقان 10 مەكتەپ وكىلدەرى قورعايدى. اتاپ ايتار بولساق, اقتاۋ قالاسىنداعى IT مەكتەپ-ليتسەيى مەن ن.ماراباەۆ اتىنداعى №7 مەكتەپ-ليتسەيى, الماتىداعى م.گاندي اتىنداعى №92 مامانداندىرىلعان ليتسەيى, رەسپۋبليكالىق فيزيكا-ماتەماتيكا مەكتەبى, فيزيكا-ماتەماتيكا باعىتىنداعى نازارباەۆ زياتكەرلىك مەكتەبى, ەلورداداعى №72 مەكتەپ-ليتسەيى مەن رەسپۋبليكالىق فيزيكا-ماتەماتيكا مەكتەبى, اتىراۋ وبلىستىق ء«بىلىم-يننوۆاتسيا» ليتسەي-ينتەرناتى, پاۆلودار قالاسىنداعى دارىندى بالالارعا ارنالعان №8 ليتسەي-مەكتەبى جانە شىمكەنت قالاسىنداعى و.جولداسبەكوۆ اتىنداعى №9 IT ليتسەيى.
الداعى الەم بىرىنشىلىگىنە مەكتەپ كوماندالارىنىڭ ءتيىمدى دايىندالۋى ءۇشىن قازاقستان شاحمات فەدەراتسياسى بىرىنشىلىك قارساڭىندا وقۋشىلارعا بۋرابايدا ارنايى وقۋ-جاتتىعۋ جيىنىن ۇيىمداستىرادى.
ۇيىمداستىرۋشىلاردىڭ ايتۋىنشا, الداعى تۋرنير وقۋشىلاردىڭ شاحماتقا دەگەن قىزىعۋشىلىعىن ارتتىرىپ قانا قويماي, كوماندالىق رۋحتى كۇشەيتۋىنە مۇمكىندىك بەرەدى. ماسەلەن, پاۆلودارلىق وقۋشى ۆاديم دەركسەن اياعىنىڭ سىنعانىنا قاراماستان, كومانداسىن قولايسىز جاعدايدا قالدىرماۋ ءۇشىن اقتاۋعا بارۋعا بەل بۋىپ وتىر. سونداي-اق شىمكەنت قالاسىنداعى و.جولداسبەكوۆ اتىنداعى №9 IT ليتسەي وقۋشىسى نۇريسلام ايناقۇل مەن مەكسيكادان كەلەتىن ريكاردو گاەل بريتو دە لا ءوز تۋعان كۇندەرىن ۇيلەرىنەن جىراقتا, چەمپيونات بارىسىندا وتكىزۋگە دايىن ەكەندىكتەرىن ايتقان.
ەلىمىزدە تۇڭعىش رەت وتكەلى وتىرعان وقۋشىلار اراسىنداعى ويلىلار ويىنى حالىقارالىق جانە قازاقستان شاحمات فەدەراتسيالارىنىڭ مۇرىندىق بولۋىمەن, ماڭعىستاۋ وبلىسى اكىمدىگىنىڭ قولداۋىمەن ۇيىمداستىرىلماق. ال جارىستىڭ باس سەرىكتەسى جانە باستى دەمەۋشىسى – «Freedom Holding Corp».
