سوت انىقتاعانداي, 2022 جىلعى 8 قاراشادا ساعات 14:00 شاماسىندا سوتتالۋشى ا. ابىلاي حان كوشەسىنىڭ بويىمەن وڭتۇستىك باعىتتا №98 اۆتوبۋستى باسقارىپ, ابىلاي حان جانە تولە بي كوشەلەرىنىڭ قيىلىسىندا جول قوزعالىسى ەرەجەسىن ەلەمەي, باعدارشامنىڭ تىيىم سالىنعان قىزىل تۇسىنە ءوتىپ, تولە بي كوشەسىمەن كەلە جاتقان №201 اۆتوبۋسپەن سوقتىعىسقان. جول-كولىك وقيعاسى كەزىندە №98 اۆتوبۋستىڭ جولاۋشىلارى سوققى سالدارىنان اينەككە سوعىلىپ, سىرتقا قۇلاعان. ناتيجەسىندە جابىرلەنۋشى ي. اۆتوبۋس استىندا قالىپ, العان جاراقاتتارىنان قايتىس بولعان. سونداي-اق جابىرلەنۋشى ك. اۋىر دەنە جاراقاتىن السا, تاعى ءبىر جابىرلەنۋشى ش. ورتاشا اۋىرلىقتاعى دەنە جاراقاتىن العان.
سوتتا سوتتالۋشى ءوز كىناسىن مويىنداماي, ءوزىن اقتاۋدى سۇراعان.
ادام ولىمىنە اكەپ سوقتىرعان جول قوزعالىسى ەرەجەسىن بۇزعان №98 اۆتوبۋس جۇرگىزۋشىسى كىنالى دەپ تانىلىپ, 2,5 جىلعا باس بوستاندىعىنان ايىرىلدى. سونداي-اق ول 5 جىل مەرزىمگە كولىك قۇرالىن باسقارۋ قۇقىعىنان ايىرىلدى. سونىمەن قاتار مورالدىق شىعىندى وتەۋ رەتىندە جابىرلەنۋشىلەردىڭ ارقايسىسىنا 2 ميلليون تەڭگە ءوندىرىلدى.
ۇكىم زاڭدى كۇشىنە ەنگەن جوق.
ەسكە سالا كەتەيىك, 2022 جىلدىڭ قاراشا ايىندا ابىلاي حان مەن تولە بي قيىلىسىندا ءىرى جول اپاتى بولدى. №98 اۆتوبۋس №201 اۆتوبۋسپەن سوقتىعىستى. سوقتىعىس سالدارىنان اۆتوبۋستىڭ استىندا قالعان ەر ادام قايتىس بولدى. تاعى 21 ادام جاراقات الدى, ونىڭ توعىزى اۋىر جاراقات الدى.
№98 اۆتوبۋستىڭ 36 جاستاعى جۇرگىزۋشىسى قر قىلمىستىق كودەكسىنىڭ 345-بابىنىڭ 3-بولىگى «كولiك قۇرالدارىن باسقاراتىن ادامداردىڭ ابايسىزدا ادام ولiمiنە اكەپ سوققان جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى» بويىنشا كىنالى دەپ تانىلدى.
