بيىل شىلدە ايىنان باستاپ مينيسترلىكتەر ءۇيىنىڭ 16-كىرەبەرىسىندە ءوز جۇمىسىن باستاعان ورتالىق مەملەكەتتىك ورگانداردىڭ حالىقپەن جۇمىس جۇرگىزۋ جونىندەگى بىرىڭعاي فرونت-جەلىسى فورماتىندا قۇرىلدى. بۇل ورتالىقتىڭ نەگىزگى مىندەتتەرىنىڭ ءبىرى – مەملەكەت پەن ازاماتتاردىڭ ءوزارا ءىس-قيمىلىنىڭ جاڭا ورتاسىن قۇرۋ. ال ونىڭ جۇمىسىنىڭ نەگىزگى قاعيداتتارى – كليەنتكە باعدارلانۋ, ءوتىنىش بەرۋشىلەرگە كورسەتىلەتىن قىزمەت ساپاسىن ارتتىرۋ جانە جالپى وسى سالاعا جاڭا ستاندارتتاردى ەنگىزۋ.
جالپاق تىلمەن ايتقاندا, ورتالىق بازاسىندا كەلۋشىلەر وزدەرىنە ىڭعايلى جاعدايدا كەز كەلگەن مەملەكەتتىك ورگانعا ءوتىنىشىن بەرە الادى, سونداي-اق حقو-عا ۇقساس ءتۇرلى ۆەدومستۆولار وكىلدەرىنەن, مەدياتورلار جانە زاڭ ماماندارىنان كەڭەس الا الادى. سونىمەن قاتار مۇندا ازاماتتار مەملەكەتتىك ورگانداردىڭ ءبىرىنشى باسشىلارىنىڭ جەكە قابىلداۋىنا جازىلۋ مۇمكىندىگىنە يە بولادى. ورتالىق الاڭىندا اپتا سايىن 18 مينيسترلىكتىڭ وكىلدەرى ازاماتتاردى جەكە قابىلدايدى, كەستە ۇكىمەت سايتىندا الدىن الا جاريالانادى. بۇل رەتتە وڭىرلەردىڭ تۇرعىندارىنا ەلورداعا ارنايى كەلۋدىڭ قاجەتى جوق, ويتكەنى ولاردى ونلاين-فورماتتا دا قابىلداۋ جۇرگىزىلەدى.
ورتالىقتىڭ قۇرىلۋى پرەزيدەنت قاسىم-جومارت توقاەۆتىڭ باستاماسىمەن قولعا الىنعان «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ جونىندەگى اۋقىمدى جۇمىستىڭ جالعاسى ەكەنىن ايتا كەتكەن ءجون. بۇعان دەيىن بۇل ۇدەرىس شەڭبەرىندە ءوتىنىش بەرۋشىلەر قۇقىقتارىنىڭ باسىمدىعىن قامتاماسىز ەتەتىن جانە وتىنىشتەردى قاراۋ كەزىندە مەملەكەتتىك ورگانداردىڭ جاۋاپكەرشىلىگىن كۇشەيتۋدى كوزدەيتىن اكىمشىلىك راسىمدىك-ۇدەرىستىك كودەكسى قولدانىسقا ەنگىزىلگەن ەدى. ودان كەيىن وڭىرلەردە وتىنىشتەردىڭ قارالۋىن باقىلاۋ بويىنشا بولىمدەر جۇمىس ىستەي باستادى, اكىمشىلىك سوتتار جۇيەسى قۇرىلىپ, eOtinish بىرىڭعاي اقپاراتتىق جۇيەسى جانە باسقا دا جوبالار ىسكە قوسىلدى.
جاڭادان اشىلىپ وتىرعان ورتالىقتىڭ بازاسىندا تسيفرلىق حقو جۇمىس ىستەيتىنىن اتاپ وتكەن ءجون. بۇل ارقىلى ونلاين رەجىمدە 1 220 مەملەكەتتىك قىزمەت ءتۇرىن الۋعا بولادى.
ورتالىقتا قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى زاڭناماسىندا, قىلمىستىق ءىس جۇرگىزۋ نەمەسە ازاماتتىق ءىس جۇرگىزۋ زاڭناماسىندا قاراۋ ءتارتىبى بەلگىلەنگەن وتىنىشتەر قابىلدانبايتىنىن اتاپ وتكەن ءجون. بۇل ماسەلەلەر بويىنشا ازاماتتار ءتيىستى قۇقىق قورعاۋ نەمەسە سوت ورگاندارىنىڭ فرونت-وفيستەرىنە جۇگىنۋى كەرەك.
تۇتاستاي العاندا, كەشەندى ءتاسىل جاڭا ورتالىقتى مەملەكەتتىك ورگاندار مەن ۇكىمەتتىك ەمەس ۇيىمداردىڭ, جۇرتشىلىقتىڭ ەڭ وزەكتى ماسەلەلەر توڭىرەگىندەگى ديالوگ الاڭىنا اينالدىرادى دەپ سەنەمىز.
