دەپارتامەنت باسشىسى, الدىمەن, وڭىردە كريمينوگەندىك احۋالدىڭ تۇراقتى ەكەندىگىن ايتىپ ءوتتى. ازاماتتاردىڭ ءومىرىن, دەنساۋلىعىن, مۇلكىن قورعاۋ ساپاسىن ارتتىرىپ, قۇقىق بۇزۋشىلىقتاردىڭ الدىن الۋدىڭ ءتيىمدى جۇيەسىن قۇرۋ, پوليتسيانى قاۋىپسىزدىكتى ءتيىمدى قامتاماسىز ەتەتىن ۇيىمعا اينالدىرۋ باعىتىنداعى باستامالارعا ەل نازارى اۋىپ وتىر. وسى كۇنى مەملەكەت باسشىسىنىڭ تاپسىرماسىمەن «قوعاممەن سەرىكتەستىكتە قوعامدىق قاۋىپسىزدىكتى قامتاماسىز ەتۋدىڭ 2024-2028 جىلدارعا ارنالعان تۇجىرىمداماسى» ازىرلەنۋدە. بۇل ماڭىزدى ستراتەگيالىق قۇجات بيىل قابىلدانادى.
– تۇجىرىمداماداعى ءوزارا ءىس-قيمىلدىڭ الگوريتمىندە ۇكىمەتتىك ەمەس ۇيىمدار قىزمەتىنە باسا ءمان بەرىلىپ وتىر. داعدارىس ورتالىقتارىنىڭ جەلىسى كەڭەيتىلەدى. وتباسىنداعى, تۇرمىستىق جاعدايداعى قىلمىستاردىڭ كوبىسى ماس كۇيىندە جاسالاتىندىقتان الكوگول ونىمدەرىن ساتۋ ورىندارىن شەكتەۋ, وعان قارسى جارنامانى ەنگىزۋ بويىنشا قىلمىستىڭ الدىن الۋ جۇيەسى قۇرىلادى, – دەدى دەپارتامەنت باستىعى.
وبلىس كولەمىندە تىركەلگەن قىلمىستار سانى 16 پايىزعا تومەندەگەن. اسىرەسە اسا اۋىر قىلمىستار, پاتەر ۇرلىعى, مال ۇرلىعى, بۇزاقىلىق, قاراقشىلىق, الاياقتىق, ينتەرنەت-الاياقتىقتىڭ ازايعانى بايقالادى. كامەلەتكە تولماعاندار قاتىساتىن جانە قارۋ قولدانۋ ارقىلى جاسالاتىن قىلمىس تا تومەندەپتى. اۋىر جانە اسا اۋىر قىلمىستاردىڭ اشىلۋ كورسەتكىشى جاقسارعان.
دەپارتامەنت باسشىسى جول قاۋىپسىزدىگىن جاقسارتۋ باعىتىنداعى شارالارعا توقتالىپ ءوتتى.
– بۇل قازىر ەڭ وزەكتى ماسەلەگە اينالىپ وتىر. مىسالى, وبلىستا جولدا ءجۇرۋ ەرەجەسىن بۇزۋدىڭ 137 مىڭنان اسا دەرەگى انىقتالسا, ونىڭ 63 مىڭنان استامى جول اپاتىنا تىكەلەي اسەر ەتەتىن ورەسكەل قۇقىق بۇزۋشىلىقتار. جۇرگىزۋشىلەردى تارتىپكە كەلتىرۋ ءۇشىن قازىرگى ۋاقىتتا «قورعاۋ» جۇيەسى, موبيلدىك جىلدامدىق ولشەگىشتەرى بار اۆتوكولىكتەر ءجيى جولعا شىعادى. «Ekin Patrol G2» جانە «Vuewo» ءموبيلدى كەشەنىنىڭ قولدانىسقا ەنگىزىلۋى وبلىستا جول-كولىك وقيعالارىنان قايتىس بولعاندار سانىن تومەندەتتى. تۇجىرىمدامادا جول ينفراقۇرىلىمىنىڭ ساپاسىن دا جاقسارتۋ كوزدەلگەن, – دەدى ماقسۇتحان نۇعمان ۇلى.
قۇرىق بەرمەي, ىرىققا كونبەي وتىرعان قىلمىس ءتۇرى – ينتەرنەت الاياقتىق. بۇل قىلمىستىڭ 108 دەرەگى تىركەلىپ, 14-ءى اشىلىپتى. بۇل, ارينە, تومەن كورسەتكىش, بىراق عالامتوردىڭ مۇمكىندىگى كەڭىگەن سايىن ايلا-شارعىسى جەتىلە بەرەتىن الاياقتىقتىڭ الدىن الۋ وڭاي بولماي تۇر. ابدەن اككىلەنگەندەر ابونەنتتىك نومىرلەردى ءجيى اۋىستىرىپ, ءىزىن جاسىرادى. ۇرلانعان اقشانىڭ حالىقارالىق اۋدارىم قىزمەتتەرى ارقىلى الىناتىنى دا قىلمىستىڭ تەز اشىلۋىنا كەدەرگى.
سوڭعى جىلدارى ەداۋىر تومەندەگەنىمەن دە اۋىلداعى مال ۇرلىعىمەن كۇرەس ماسەلەسى ءالى دە وزەكتى. بيىلعى «مال ۇرىسى» جەدەل-پروفيلاكتيكالىق ءىس-شاراسى اياسىندا 4 توپ ۇستالىپ, 22 ەپيزودتى ۇرلىق دەرەگى اشىلدى. ۆەتەريناريا قىزمەتىمەن بىرلەسىپ, ءتيىستى قۇجاتسىز مال تاسىمالداعان 54 جۇرگىزۋشىگە شارا كوتەرىلدى. قابىلدانعان شارالار ناتيجەسىندە مال ۇرلىعى 55 پايىزعا تومەندەپتى.
قۇقىق قورعاۋ سالاسى, ونىڭ ىشىندە پوليتسيا قىزمەتى ەلدەن الشاق بولسا, قوعام تىعىرىققا تىرەلەدى. سودان دا ولاردى جاقىنداتۋدىڭ بارلىق امالدارى قولعا الىندى «ەلەكتروندىق قىلمىستىق ءىس جۇيەسى» اياسىندا قىلمىستىق ىستەر ەلەكتروندىق فورماتتا تەرگەلىپ, بۇل ازاماتتارعا تەرگەپ-تەكسەرۋ بارىسىن قاداعالاۋعا مۇمكىندىك بەرەدى. قوعامدىق ورىنداردا, مەكتەپتەردە, ساۋدا-ويىن-ساۋىق ورتالىقتارىندا شۇعىل شاقىرۋ جۇيەلەرى ورناتىلىپ جاتىر.
حالىقتىڭ سەنىمىن ارتتىرۋ, بيۋروكراتيادان ارىلۋ, ادامنىڭ سۇرانىسىنا باعىتتالعان جۇمىس مودەلىنە كوشۋ باعىتىنداعى باستامالار جايلى ايتىلعان ەسەپتە وبلىس تۇرعىندارىنان ءتۇرلى ساۋال, پىكىرلەر مەن ۇسىنىستار كەلىپ ءتۇستى. ولاردى مۇقيات تىڭداعان گەنەرال-مايور ارنايى قۇرىلعان توپقا تاپسىرما بەرىپ, ونىڭ ورىندالۋىن باقىلاۋىنا الاتىنىن جەتكىزدى.
