ول ول ما, قازاقستاندا تاعى ءبىر قات ماسەلە بار. قاعاز دەگەن... ەلىمىزدىڭ قانشا قامدانسا دا ءوز قاعازىن وندىرە الماعانى وكىنىشتى-اق! الىسقا ۇزاماي كوبىنە تەرىسكەيدەگى كورشىمىزدەن اربالايتىنبىز. ولارداعى جاعداي دا وڭىپ تۇرعان جوق. سوعىسقا بايلانىستى ماتاپ تاستاعان سان ءتۇرلى سانكتسيانىڭ شىرماۋىنان شىعا الار ەمەس. سودان با, قاعاز باعاسى دا مىڭ قۇبىلىپ تۇر. قىمباتتاعان ۇستىنە قىمباتتاپ, باعا ەكەش باعا دا ءبىر ورىندا بايىز تاپپاي الەك. وسىنداي شاقتا وزىنە جۇكتەلگەن جۇمىستى اتقارۋعا تىرىسقان اسكەر اللاۆەردى ۇلى جاڭا قىزمەتكە اۋىسقالى جاتقانى تۋرالى دا ايتىلىپ قالدى. ەندىگى تاڭداۋ كىمگە تۇسەر ەكەن دەپ توپشىلاپ ۇلگەرگەنىمىزشە, ەربولات قامەن باۋىرىمىزدى تانىستىرۋعا الىپ كەلدى...
باسقا-باسقا بۇل ازاماتتىڭ «ەگەمەنگە» الابوتەندىگى جوق. بۇعان دەيىن دە سەنىپ تاپسىرعان سول قىزمەتتى ابىرويلى اتقارىپ شىققانىنا – ەل-جۇرت كۋاگەر. ءتىپتى ەرەكەڭنىڭ ەرەك باسقارۋ ءستيلىن سول كەزدە-اق بايقاعان ارىپتەستەرى ونى الىگە دەيىن مايىن تامىزا اڭگىمەلەپ بەرۋدەن جالىقپايدى. «جىگىتتى جىگەرىنەن تانى» دەمەۋشى مە ەدى, جارىقتىق بابالارىمىز. تاڭداۋ تاپ سول باياعى بىلىكتىلىك پەن بىلىمگە, قارىم مەن قابىلەتكە قايتا تۇسكەن سىڭايلى. ال بۇل – بەرىك بولاتتاي شىڭدالعان ەربولاتتىڭ بەس ساۋساقتاي بىلەتىن شارۋاسى. قۇنتتىلىعىنىڭ ءوزى قىرىق اتانعا جۇك بولاتىندىعىن قايدا قويارسىز؟
«جاس تا بولسا باس بولعان» ەربولاتتىڭ «استانا اقشامىنداعى» ايتۋلى كۇندەرىن اۋزىنان تاستامايتىن اعالارىنىڭ ءبىرى – اق مىلتىق جۋرناليست تالعات باتىرحان. گازەتكە كوررەكتور بولىپ قابىلدانىپ, تۇبىندە سونىڭ باسشىسىنا دەيىن كوتەرىلۋ ەكىنىڭ ءبىرىنىڭ قولىنان كەلمەيتىن وڭاي شارۋا بولماسا كەرەك. «تاعدىر جازىپ, تالاي باسشىمەن ىستەس بولدىم, سولاردىڭ ىشىندە ورنى بولەگى وسى ەربولات ەدى» دەۋى دە تەگىننەن-تەگىن ەمەس شىعار.
قالاي دەسەك تە, ەربولات تىلەكقابىل ۇلىنىڭ «قازاق گازەتتەرىنە» قايتا ورالعان قادامى قۇتتى بولعاي! الاش ءباسپاسوزىنىڭ ابىرويىن اسپانداتىپ, مارتەبەسىن مىڭ سان بيىكتەتەدى دەگەن سەنىمنىڭ كوكىرەگىمىزگە قايتا ۇيالاعانىنا ءبىز دە بەك قۋانىشتىمىز!
