وسى رەتتە تۇركىستان وبلىسى ءبىلىم باسقارماسى «وبلىستىق جاس تۋريستەر ستانساسى» مەملەكەتتىك مەكەمەسىنە قاراستى كەلەس اۋداندىق ءبىلىم ءبولىمى بالالاردىڭ جازعى دەمالىسىن پايدالى وتكىزۋىنە بارلىق جاعداي جاساعان. اۋدانداعى جازعى لاگەرلەردە بالالاردىڭ ۋاقتىلى تاماقتانۋى, ويناۋى, شىعارماشىلىقپەن اينالىسۋى, ەكسكۋرسياعا شىعۋى, دەمالۋى جان-جاقتى جوسپارلانعان. مۇندا جەتكىنشەكتەر ءبىر-بىرىمەن تانىسىپ, ءتىل تابىسىپ, تەز دوستاسادى, كوپشىل بولۋعا, اشىق مىنەزدى بولۋعا ۇيرەنەدى. سونداي-اق وقۋشىلاردىڭ دەنەسىن شىنىقتىرۋ, اقىل-ويىن ۇشتاۋ دا – لاگەردىڭ نەگىزگى ماقساتىنىڭ ءبىرى.
ىسكەر باسشى عالىمجان مىرزانوۆ جەتەكشىلىك ەتىپ وتىرعان اۋداندىق بولىمدەگى پەداگوگتەر – م.ءابىلوۆ, س.قالداروۆ, د.مىرزانوۆ, ا.احمەتوۆا ءوز ءىسىن سۇيەتىن, جۇمىسىنا جاۋاپكەرشىلىكپەن قارايتىن, ءبىلىمى مەن بىلىگى توعىسقان ماماندار. وسىنداي تاجىريبەلى مۇعالىمدەردىڭ تاربيەسىن العان وقۋشىلار دا وسال ەمەس, وبلىستىق جارىستاردا بىرنەشە رەت توپ جارىپ, جۇلدەلى ورىندارعا يە بولدى.
ء«تورت توقسان – ءتورت ونەر» اتتى ۇلتتىق مادەني-اعارتۋشىلىق جوباسىنىڭ «تۋعان ولكەم» فەستيۆالى اياسىندا «وبلىستىق جاس تۋريستەر ستانساسى» مەكەمەسىنىڭ ديرەكتورى س.ومىرباەۆانىڭ ەلىمىزدە ۇلتتىق جوبا رەتىندە ۇلتتىق ءتۋريزمدى دامىتۋ, ونى جاڭاشا تۇرلەندىرىپ ەنگىزۋ بويىنشا پەداگوگيكالىق كەڭەستەگى ۇسىنىسىنا سايكەس, كەلەس اۋداندىق ءبىلىم ءبولىمىنىڭ ۇيىتقى بولۋىمەن «ۇلتتىق ات سپورتىن ۇيىرمەشىلەر اراسىندا ناسيحاتتاۋ» اتتى وبلىستىق العاشقى كوشپەلى سەمينار ءوتتى. وعان ارداگەر شاباندوز مۇستافا ادامبەكوۆ, اتبەگى ىدىرىس كولباەۆ, شاباندوز تىللابەك ۇسەنوۆ شاقىرىلىپ, ولار ات سپورتىنداعى ءوز تاجىريبەلەرىمەن ءبولىستى. سونداي-اق ءىس-شارا اياسىندا ات ابزەلدەرى, كوكپارشىنىڭ كيىمى, قامشى ءورۋ سەكىلدى ۇلتتىق ونەردى ناسيحاتتايتىن كورمە ۇيىمداستىرىلىپ, «كوكپار تارتۋ» ويىنى كورسەتىلدى. كوشپەلى سەمينارعا كەنتاۋ, وتىرار, تولە بي, سايرام, تۇلكىباس, قازىعۇرت اۋداندارىنان قوناقتار كەلدى.
وقۋشىلاردىڭ جازعى دەمالىسى باستالعاننان بەرى 50-گە جۋىق ءتۇرلى ءىس-شارا ۇيىمداستىرىلدى. قوسىمشا ءبىلىم بەرۋ پەداگوگى س.قالداروۆ شىلدە ايىندا «جاس تۋريستەر» توبىنداعى شاكىرتتەرىمەن «سارىاعاش» شيپاجايىنا تانىمدىق ەكسكۋرسيا جاسادى. ەكسكۋرسيا بارىسىندا وقۋشىلار «سارىاعاش» شيپاجايىنىڭ ەرەكشەلىگى, سۋىنىڭ ەمدىك قاسيەتى مەن قۇرامىنداعى مينەرالدارى, ولاردىڭ ادام اعزاسىنا پايداسى تۋرالى كوپتەگەن تىڭ مالىمەتكە قانىقتى. تۋعان ولكەنىڭ وزىنە ءتان وسىنداي وزگەشەلىگى ۇيىرمەشىلەردىڭ كەۋدەسىنە تاڭدانىس پەن ماقتانىشتى ۇيالاتتى. ال تاجىريبەلى ۇستاز د.مىرزانوۆ «جاس تاۋ تۋريستەرى» ۇيىرمەسىنىڭ وقۋشىلارىمەن «جاز قىزىعى – مول دەمالىس» جوسپارىنا سايكەس, «كەدەرگىلەر جولاعى» اتتى تاقىرىپتا جارىس وتكىزدى.
«تۋعان جەرگە تۋىڭ تىك» دەگەن ءسوز بەكەر ەمەس. وتانعا, ەلگە, جەرگە دەگەن قۇرمەت ءوزىمىز وسكەن ولكەدەن باستالادى. بۇگىنگى بالا – ەرتەڭگى ەل بولاشاعى. وقۋشىلاردىڭ جازعى دەمالىسىن جوعارى دەڭگەيدە ۇيىمداستىرىپ, بالالار تاربيەسىندە دۇرىس باعىت-باعدار بەرۋ, ولاردىڭ بويىنا قورشاعان ورتانى قورعاۋ, تابيعاتتى ايالاۋ, وتاندى ءسۇيۋ, ەلگە ادال قىزمەت ەتۋ سىندى اسىل قاسيەتتەردى ءسىڭىرۋ – ءبىزدىڭ قاستەرلى مىندەتىمىز.
جومارت مەدەتوۆ,
كەلەس اۋداندىق
ءبىلىم ءبولىمىنىڭ ادىسكەرى
تۇركىستان وبلىسى
