ەگدە جاستاعى فۋتبول جانكۇيەرلەرى ءالى ۇمىتا قويماعان بولسا كەرەك, كەلمەسكە كەتكەن وداق تۇسىنداعى «قايرات» پەن «پاحتاكور» اراسىنداعى كسرو چەمپيوناتىنىڭ باسەكەلەرى ارقاشان وتە شيەلەنىستى ءارى قىزىقتى وتەتىن. ماتچ بولاتىن كۇنى ستاديونعا اعىلعان جانكۇيەرلەردىڭ سانىندا ەسەپ بولمايتىن. ءار كەزدەسۋدە ستاديوندا ينە شانشار ورىننىڭ ءوزىن تابۋ مۇڭ ەدى. قازىر كەز كەلگەن سپورت تۇرىندەگى قازاق-وزبەك باسەكەسىنە ايتىلاتىن «كىمگە ەسە جىبەرسەڭ دە, وزبەكتەردەن جەڭىلمە» دەگەن ۇستانىم «قايرات» پەن «پاحتاكور» ماتچتارىنان باستاۋ العان دەسەك, قاتەلەسپەيتىن شىعارمىز. ويتكەنى وڭتۇستىكتەگى كورشىلەرىمىزدىڭ دە ءدال وسى قاعيداتتى ۇستاناتىنى جاسىرىن ەمەس.
ستاتيستيكالىق مالىمەتتەرگە كوز جۇگىرتەر بولساق, قازاقستان مەن وزبەكستاننىڭ باس كوماندالارى كسرو چەمپيوناتى مەن كسرو كۋبوگى جولىنداعى رەسمي جارىستاردا ءوزارا 60 مارتە كۇش سىناسقان ەكەن. 26 رەت «قايرات» جەڭىسكە جەتسە, 20 ويىندا «پاحتاكوردىڭ» اسىعى الشىسىنان تۇسكەن. 14 باسەكەدە تەڭ ەسەپ تىركەلگەن. جەرلەستەرىمىز 60 ويىندا «پاحتاكور» قاقپاسىنا 81 گول سوقسا, قارسىلاستار 70 رەت نىسانانى ءدال كوزدەدى. 1956 جىلدىڭ 13 قىركۇيەگىندە الماتىلىقتار تاشكەنتتىكتەردىڭ قاقپاسىنا جاۋاپسىز ءتورت گول سوقسا, 1984 جىلدىڭ 29 قىركۇيەگىندە 6:2 ەسەبىمەن ويسىراتا ۇتتى. وزبەكتەر دە قاراپ قالعان جوق. 1957, 1973 جانە 1974 جىلدارى ولار بىزدەن 4:1 ەسەبىمەن باسىم ءتۇستى. بۇلار – وسى كلۋبتاردىڭ اراسىندا وتكەن باسەكەلەردە تىركەلگەن ەڭ ءىرى ەسەپتەر.
ەكى كوماندانىڭ دا كسرو چەمپيوناتىنداعى جەتىستىكتەرى دە شامالاس بولعان. ماسەلەن, «قايرات» وداق چەمپيوناتىنداعى ەڭ ۇزدىك كورسەتكىشىنە 1986 جىلى قول جەتكىزىپ, بىرىنشىلىكتى جەتىنشى ورىنمەن قورىتىندىلادى. ال تاشكەنتتىڭ «پاحتاكورى» 1962 جانە 1982 جىلدارى كسرو چەمپيوناتىندا التىنشى ورىندى يەلەنگەن-ءدى.
«قايرات» پەن «پاحتاكور» ەڭ كەيىنگى رەسمي كەزدەسۋلەرىن 1990 جىلدىڭ 15 مامىرىندا كسرو چەمپيوناتىنىڭ ءبىرىنشى ليگا ويىندارىنىڭ اياسىندا وتكىزگەن. الماتىنىڭ ورتالىق ستاديونىندا ۇيىمداستىرىلعان سول كەزدەگى باسەكەدە يگور شكۆيرين سوققان جالعىز گولى «پاحتاكورعا» جەڭىس سىيلاعان ەدى – 0:1. ءسويتىپ, توقسانىنشى جىلداردىڭ باسىندا كسرو ىدىراپ, ءار مەملەكەت تاۋەلسىزدىك العاننان كەيىن اتالعان كوماندالاردىڭ جولدارى ەكىگە ايىرىلدى. دەگەنمەن ەگەمەندىك العاننان كەيىن ەكى كوماندانىڭ جولى تەك ءبىر مارتە عانا جاسىل الاڭدا قيىستى. 2003 جىلى قازاق فۋتبولىنىڭ 90 جىلدىعى اياسىندا «قايرات» پەن «پاحتاكور» كلۋبتارى الماتىدا جولداستىق كەزدەسۋ وتكىزىپ, جەرلەستەرىمىز ءوز جانكۇيەرلەرىنىڭ الدىندا 2:1 ەسەبىمەن جەڭىسكە جەتتى.
الماتىدا وتكەن كەشەگى جولداستىق ماتچقا توقتالار بولساق, ەكى كلۋب تا الاڭعا ءوز ىشكى چەمپيوناتتارىندا دوپ تەۋىپ جۇرگەن نەگىزگى فۋتبولشىلارىن شىعاردى. ياعني ويىن جولداستىق ماتچ دەپ اتالعانىمەن, ەكەۋى دە جاسىل الاڭدا جەڭىس ءۇشىن بارىن سالدى دەۋگە بولادى. بۇل كەزدەسۋدە «قايرات» ساپىنان ءۇش لەگيونەر ءبىرىنشى مينۋتتان باستاپ ويناسا, «پاحتاكور» قۇرامىندا ەكى عانا لەگيونەر بولدى.
ماتچتىڭ ءبىرىنشى تايمىندا دا, ەكىنشى بولىگىندە دە ويىن تەڭ دارەجەدە ءوتتى. تەك باسەكەنىڭ اياقتالار تۇسىندا «قايرات» قورعاۋشىسىنىڭ قاتەلىگىن ءتيىمدى پايدالانعان «پاحتاكوردىڭ» پولشالىق شابۋىلشىسى پشەمىسلاۆ باناشاك گول سوعىپ, كومانداسىنا جەڭىس سىيلادى – 0:1.
