«دينامو» مەن «استانا» اراسىنداعى قارىمتا كەزدەسۋ قازاقستان مەن گرۋزيا كلۋبتارىنىڭ تالاي تارتىستى ويىندارىنىڭ كۋاسى بولعان تبيليسيدەگى بوريس پايچادزەنىڭ اتىنا بەرىلگەن «دينامو-ارەنا» ستاديونىندا ءوتتى. 1915 جىلى قاپ تاۋىندا دۇنيە كەلگەن بوريس پايتچادزە گرۋزيا مەن «دينامو» كلۋبىنىڭ اڭىز ويىنشىسى سانالدى. 2001 جىلى ول 20 عاسىرداعى گرۋزيانىڭ ەڭ ۇزدىك فۋتبولشىسى دەپ تانىلعان.
55 مىڭنان اسا جانكۇيەرلەرگە ارناپ سالىنعان بۇل ستاديوندا كەڭەس وكىمەتى تۇسىندا الماتىنىڭ «قايراتى» مەن «دينامو» كلۋبتارى بىرنەشە مارتە كەزدەسسە دە, جەرلەستەرىمىز بىردە-ءبىر ويىندا جەڭىسكە جەتە الماي, قازاقستانعا جانارىمەن جەر شۇقىپ ورالعان-دى. 1963 جىلى تبيليسيدە باستالعان ەكى ۇجىم اراسىنداعى «تەكەتىرەس» 1988 جىلعا دەيىن جالعاستى. وسى ۋاقىت ارالىعىندا كوماندالار جاسىل الاڭدا 45 مارتە جولىعىپ, سونىڭ نەبارى جەتەۋىندە عانا جەرلەستەرىمىزدىڭ مەرەيى ۇستەم بولعان. ال 16-ويىندا قارسىلاستار تەڭ ناتيجەگە قول جەتكىزسە, 22-ويىندا گرۋزيالىقتاردىڭ اسىعى الشىسىنان تۇسكەن-ءدى. «قايرات» پەن «دينامو» اراسىنداعى ازىرگە ەڭ سوڭعى ويىن 1988 جىلدىڭ 31 قازانىندا ءوتىپ, الماتىلىقتار 3:1 ەسەبىمەن «ديناموعا» جول بەرگەن.
25 جىلدىڭ ىشىندە «قايرات» تبيليسيدە 20-دان اسا ويىن وتكىزىپ, گرۋزيادا دارالانا الماعانىمەن, ەلىمىزدىڭ تاعى ءبىر ۇجىمى – «استانا» العاشقى ويىندا-اق الاڭ قوجايىندارىنىڭ اياعىن اسپاننان كەلتىردى. ەلورداداعى ماتچتا تەڭ ناتيجەگە قول جەتكىزگەن گرۋزيالىقتار ءوز الاڭىنداعى ويىندى سەنىمدى ءارى جەڭىسكە دەگەن جىگەرمەن باستادى. جانكۇيەرلەرىنىڭ قىزۋ قولداۋىنا يە بولعان «دينامو» فۋتبولشىلارى العاشقى تايمدا جاسىل الاڭدا ەركىن ويقاستاپ, «استانا» قاقپاسىنىڭ ماڭايىندا بىرنەشە مارتە قاۋىپتى شابۋىل ۇيىمداستىرىپ, دوپتى قاقپاعا الىستان دا, جاقىننان دا تەۋىپ كوردى. بىراق كەزدەسۋدىڭ 20-مينۋتىنا دەيىن ونىڭ ەشقايسىسىن گولعا اينالدىرا المادى. ارادا كوپ ۋاقىت وتپەي «دينامو» فۋتبولشىلارى سول قاپتالمەن شابۋىل ۇيىمداستىرىپ, ونى ۋسمان كامارا گولمەن تۇيىندەدى. ءبىر قورعاۋشىمىزدى جىلدامدىعىمەن قاپى قالدىرعان كامارا وسىلايشا ءبىرىنشى تايمنىڭ بەل ورتاسىندا ءوز كومانداسىن ەسەپتە العا شىعاردى – 1:0.
ۇزىلىستەن كەيىن «استانا» باس باپكەرى گريگوري بابايان ورتالىق الاڭدا ويىنى جۇرمەي جاتقان سەربيالىق جارتىلاي قورعاۋشى دۋشان ءيوۆانچيچتىڭ ورنىنا ارمەنيالىق كامو وگانەسياندى شىعاردى. ءسويتىپ, كوماندانىڭ ورتالىقتاعى ويىنى جاندانىپ, قارسىلاس كوماندانىڭ قاقپاسىنا قاراي ۇيىمداستىرىلعان شابۋىل سانى دا ارتا ءتۇستى. بۇل تاكتيكالىق وزگەرىستىڭ ناتيجەسى دە كوپ كۇتتىرگەن جوق. كەزدەسۋدىڭ 50-مينۋتىندا الەكسا ءامانوۆيچتىڭ وڭ قاپتالدان ايىپ الاڭىنا اسىرعان پاسىن ابزال بەيسەبەكوۆ ەكى قورعاۋشىنىڭ قورشاۋىندا قالىپ قويسا دا, اياعىنا ىڭعايلى كەلگەن دوپتى وڭ اياعىمەن قاقپانىڭ سول جاق بۇرىشىنا ءدال كوزدەدى. گول! «استانا» فۋتبولشىلارى دا, جانكۇيەرلەرى سوعىلعان گولدىڭ قۋانىشىنان ەس جيىپ ۇلگەرەمىن دەگەنشە ەلوردالىق ۇجىمنىڭ گامبيالىق فۋتبولشىسى دەمبو داربو «استانانىڭ» ەكىنشى گولىن سوعىپ كەتتى. بۇل جولى دا ناتيجەلى پاستى الەكسا امانوۆيچ بەرگەنىن اتاپ وتكەن ءجون. داربو دوپتى الا سالىپ, قارسىلاستاردىڭ ايىپ الاڭىنا كىرگەن بويدا دوپتى قاقپانىڭ «توعىزدىعىنا» توعىتتى. ەسەپ – 2:1. وسىدان كەيىن الاڭ يەلەرى تارازى باسىن تەڭەستىرۋگە بىرنەشە مارتە تالپىنعانىمەن, گول سوعۋعا شامالارى جەتپەدى. ءسويتىپ, كەزىندە ەۋروپا جاسىل الاڭىندا جاسىنداي جارقىلداعان «استانا» كومانداسى اينالدىرعان ەكى مينۋتتىڭ ىشىندە ەكى گول سالىپ, تاماشا كامبەكپەن چەمپيوندار ليگاسىنىڭ كەلەسى اينالىمىنا ءوتتى.
ەكىنشى كەزەڭدە «استانالىقتاردى» تاعى ءبىر ەۋروپانىڭ داڭقتى «ديناموسى» كۇتىپ تۇر. بۇل جولى ولار زاگرەبتىڭ «ديناموسىمەن» شەبەرلىك بايقاسادى. حورۆاتيانىڭ 22 دۇركىن چەمپيونى دا «استاناعا» بوتەن كوماندا ەمەس. ويتكەنى ەكى ۇجىمنىڭ بۇعان دەيىن 2018 جىلعى چەمپيوندار ليگاسىنىڭ ءۇشىنشى ىرىكتەۋ كەزەڭىندە جولدارى تۇيىسكەن. استانادا وتكەن العاشقى ويىندا قوناقتار 2:0 ەسەبىمەن باسىم تۇسسە, زاگرەبتەگى ەكىنشى باسەكەدە الاڭ يەلەرى 1:0 ەسەبىمەن كەلەسى كەزەڭنىڭ جولداماسىن شەگەلەپ قويدى.
«استانا» مەن «دينامو زاگرەب» اراسىندا ەكىنشى ىرىكتەۋدىڭ العاشقى ويىنى 25-26 شىلدەدە زاگرەبتە, قارىمتا ماتچ 1-2 تامىزدا «استانا ارەنادا» وتەدى دەپ جوسپارلانعان. كەزدەسۋدىڭ ناقتى كۇندەرى جاقىن ارادا بەلگىلى بولادى. «استانادان» جەڭىلگەن ءتبيليسيدىڭ «ديناموسى» ەۋروكۋبوكتەگى جولىن ەندى كونفەرەنتسيا ليگاسىندا جالعاستىرادى. ولار ەكىنشى كەزەڭدە مالتانىڭ «حامرۋن سپارتانس» ۇجىمىمەن كەزدەسەدى.
