سىبايلاس جەمقورلىققا قارسى قىزمەت جوعارى لاۋازىمدى شەنەۋنىكتەر اراسىندا جەمقورلىقتىڭ جۇيەلى فاكتىلەرىن انىقتاۋ اياسىندا توتەنشە جاعدايلار مينيسترلىگىمەن بىرلەسىپ, وسى ۆەدومستۆونىڭ بولىمشە باسشىلارىنىڭ زاڭسىز ارەكەتتەرىنىڭ جولىن كەستى.
بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ جارتىجىلدىق قورىتىندى وتىرىسىندا توراعا اسحات جۇماعالي حابارلادى.
«جاسىرىن ءىس-شارالاردىڭ ناتيجەلەرى بويىنشا تجم ورتكە قارسى قىزمەت كوميتەتىنىڭ توراعاسى, سونداي-اق شىمكەنت قالاسى مەن جەتىسۋ وبلىسى بويىنشا تجد باستىقتارى پاراقورلىقپەن اشكەرەلەندى. ولار ورتكە قارسى قاۋىپسىزدىك سالاسىنداعى قامقورلىعى ءۇشىن كاسىپكەرلەردەن جۇيەلى نەگىزدە پارا الىپ, تەكسەرىلەتىن ۇيىمداردى كەلىسىمشارتتار جاساۋ ارقىلى ولاردىڭ قىزمەتتەرىن ساتىپ الۋعا جانە ۋاقتىلى اقى تولەۋگە ماجبۇرلەگەن دەپ كۇدىكتەنەدى. پارا سوماسى 100 مىڭنان 4 ملن تەڭگەگە دەيىنگى ارالىقتى قۇرايدى», دەلىنگەن حابارلامادا.
سونداي-اق تجم ورتكە قارسى قاۋىپسىزدىك كوميتەتىنىڭ توراعاسى زاڭسىز اقشالاي سىياقى ءۇشىن ۇلىتاۋ وبلىسى بويىنشا تجد باسشىلارىنىڭ بىرىنە قامقورشىلىق جاساعان.
قازىرگى تاڭدا كۇدىكتىلەر ۇستالىپ, ۋۇي-نا قامالدى. سوتقا دەيىنگى تەرگەۋ جۇمىستارى جالعاسىپ جاتىر.
اتالعان لاۋازىمدى ادامداردىڭ باسقا دا جەمقورلىق قۇقىق بۇزۋشىلىقتارعا قاتىستىلىعى تەكسەرىلىپ جاتىر.
«قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى», دەپ ەسكە سالدى ۆەدومستۆو وكىلدەرى.
