مىسالى, وتكەن جىلدىڭ سايكەس مەرزىمىندە بارلىعى 29 ءوتىنىم كەلىپ ءتۇسىپ, ونىڭ 17-ءسى ماقۇلدانسا, بيىل 87 ءوتىنىم قاراستىرىلىپ, قور تاراپىنان 4 ميلليارد 400 ميلليون تەڭگەگە 27 جوبا قولداۋ تاۋىپ وتىر. وسىلايشا 454 مىڭ قازاقستاندىققا قامقورلىق جاسالدى, ونىڭ ىشىندە 22 مىڭى بالا, ال 81 مىڭى – اۋىل تۇرعىنى.
«بۇل كورسەتكىشتەر بىرىڭعاي قايىرىمدىلىق وپەراتورى ۇستانعان اشىق ساياساتتىڭ ناتيجەسى بولىپ وتىر», دەپ ەسكەردى الفيا اديەۆا.
قازىرگى تاڭدا جوبالار سانى وتكەن جىلعى 35-ءتى قوسقاندا 62-ءنى مەجەلەۋدە.
27 جوبا كەلەسىدەي الەۋمەتتىك ماڭىزدى باعىتتاردى قامتيدى:
1. دەنساۋلىق ساقتاۋ سالاسىندا جالپى بيۋدجەتى 954 ملن تەڭگەدەن استام سوماعا 4 جوبا ماقۇلداندى جانە ىسكە اسىرىلۋدا;
2. بءىلىم بەرۋ سالاسىندا – 1 ميلليارد 173 ملن تەڭگەگە 7 جوبا;
3. حالىقتىڭ نەعۇرلىم الەۋمەتتىك وسال توپتارىن قولداۋ باعىتى بويىنشا 1 ميلليارد 64 ملن تەڭگەگە 11 جوبا جۇمىس ىستەۋدە;
4. ءوڭىرلەردى دامىتۋ سالاسىنا - 782 ملن تەڭگە بولاتىن 2 جوبا بار;
5. مادەنيەت جانە سپورت باعىتىندا - 443 ملن تەڭگەگە 3 جوبا ماقۇلداندى.
جالپى قايىرىمدىلىق بيۋدجەتى 2022 جىلعىداي 10 ملرد تەڭگەنى قۇراپ وتىر.
ءباسپاسوز ءماسليحاتىندا قايىرىمدىلىق قىزمەتىندە بالالاردى قولداۋعا باسا نازار اۋدارىلاتىنى تۋرالى دا ايتىلدى. مىسالى, پەدياتريا جانە بالالار حيرۋرگياسى عىلىمي ورتالىعىنىڭ ونكولوگيا بولىمىنە 228 ملن تەڭگە تۇراتىن قان قۇرامىن وڭدەۋگە قاجەت قوندىرعى الىندى. تىرەك-قيمىل اپپاراتى بۇزىلعان 200 بالاعا ارنالعان سپورت لاگەرى ۇيىمداستىرىلدى. قوردىڭ قامقورلىعىمەن الماتىدا داۋن سيندرومى بار بالالارعا تۋعانىنان دامۋ مەن وقۋدىڭ بارلىق ساتىسىنان وتۋگە مۇمكىندىك بەرەتىن ورتالىق قولدانىسقا تاپسىرىلدى. جاڭعىرتىلعان نىسان ينكليۋزيۆتى ءبىلىم بەرۋ سالاسىنداعى مامانداردى دايىنداۋعا جانە داۋن سيندرومى بار ادامداردى جۇمىسقا ورنالاستىرۋعا جول اشادى.
شارا بارىسىندا «Samruk-Kazyna Trust» قورى 2023 جىلدىڭ سوڭىنا دەيىن اتقارىلۋى ءتيىس جوسپارىمەن دە ءبولىستى. ماسەلەن, قوستاناي وبلىسى امانقاراعاي اۋىلىندا اۋقىمدى دەنە شىنىقتىرۋ-ساۋىقتىرۋ كەشەنى پايدالانۋعا بەرىلەدى. سونىمەن قاتار قىزىلوردا, اباي, پاۆلودار, اقمولا جانە قوستاناي وبلىستارىندا اۋا-تىرەك قۇرىلىمىنداعى كوپسالالى سپورت كەشەندەرى ىسكە قوسىلادى. 2023 جىلدىڭ اياعىنا دەيىن قازاق ۇلتتىق اسپاپتارى مەن مەملەكەتتىك تىلدەگى كىتاپتار جيناعى وڭىرلەردىڭ مۋزىكالىق مەكتەپتەرى مەن كىتاپحانالارىنا بەرىلەدى.
جىل باسىنان بەرى ءاۋتيزمى بار بالالارعا ارنالعان 4 جانە 4 ەرتە ارالاسۋ ورتالىعى اشىلسا, الداعى 6 اي ىشىندە تاعى وسىنداي 13 ورتالىق ىسكە قوسىلىپ, ناتيجەسىندە بارلىعى 9 مىڭعا جۋىق بالاعا قامقورلىق جاسالاتىن بولادى. «سامۇرىق-قازىنا» قورىنىڭ 15 جىلدىعىنا وراي بىرىڭعاي قايىرىمدىلىق وپەراتورى ارقىلى قور كومپانيالارى اتىنان حالىقتىڭ الەۋمەتتىك وسال توپتاعى وتباسىلارىنان شىققان 15 مىڭ ءبىرىنشى سىنىپ وقۋشىسى مەكتەپ زاتتارى جيىنتىعىمەن قامتاماسىز ەتىلەدى.
بىرىڭعاي قايىرىمدىلىق وپەراتورىنىڭ قىزمەتى ارقىلى الداعى ۋاقىتتا دا «سامۇرىق-قازىنا» اق كومپانيالار توبىنىڭ جۇيەقۇراۋشى كاسىپورىندارى ورنالاسقان ايماقتاردا حالىقتىڭ ءومىر ءسۇرۋ ساپاسىن جاقسارتۋمەن بىرگە, جالپى ەلىمىزدىڭ الەۋمەتتىك-ەكونوميكالىق وركەندەۋىنە ۇلەس قوسىلماق.
