تۇساۋكەسەرگە ەلورداداعى ءدىني بىرلەستىكتەردىڭ باسشىلارى, عىلىمي-ساراپتامالىق قوعامداستىق وكىلدەرى, مەملەكەتتىك ورگانداردىڭ قىزمەتشىلەرى كەلدى. سالتاناتتى شارادا استانا قالاسى اكىمدىگىنىڭ تاپسىرىسىمەن شىعارىلعان 5 ءدىني ادەبيەتتىڭ تۇساۋى كەسىلدى. نەگىزى ەلدە جىل سايىن مەملەكەتتىك تاپسىرىسپەن ءارتۇرلى ءدىني كىتاپتار جارىق كورەدى. بۇل قادام قوعامدا رۋحاني, ادامگەرشىلىك قۇندىلىقتاردى نىعايتۋعا, ءدىن, مادەنيەت اراسىندا ءوزارا تۇسىنىستىك پەن كەلىسىمگە قول جەتكىزۋدە ماڭىزدى ءرول اتقارادى دەپ بىلەمىز.
ءىس-شارادا قالالىق ءماسليحاتتىڭ توراعاسى ەرلان كاناليموۆ تا ءدىن مەن ءداستۇر ساباقتاستىعى جايىندا تاعىلىمدى وي قوزعادى.
– ءدىن حالقىمىزدىڭ الەۋمەتتىك جانە رۋحاني ءومىرىنىڭ ءبىر بولىگى ىسپەتتى. قازاق حالقى ەجەلدەن سالت-ءداستۇر, ادەت-عۇرپىن دىنمەن ۇشتاستىرعانىن بىلەسىزدەر. ءيا, ءدىن مەن ءداستۇر ەگىز ۇعىم سەكىلدى. ۇرپاق تاربيەسىندە دە ءدىن مەن داستۇردەگى قۇندىلىقتار قاتار جۇرەدى. ەلورداداعى ءدىني نىسانداردى جانە ونىڭ شىعۋ تاريحىن تۇگەندەپ, ەنتسيكلوپەديا شىعارۋ – ۇلكەن ەڭبەكتى قاجەت ەتەتىن ءىس. ەندى كەلەشەكتە وسى كىتاپتار ەلوردالىقتارعا, قوناقتارعا, ءدىن سالاسىنىڭ زەرتتەۋشىلەرىنە سالماقتى نۇسقاۋلىق بولادى دەپ ويلايمىن. وسىنداي ىزگىلىككە ۇندەيتىن ەڭبەكتەر كوپ بولسىن. اۆتورلارعا العىس ايتامىز, – دەدى قايراتكەر.
بىلسەڭىزدەر, «ەلوردانىڭ ءدىني نىساندارى» دەگەن اتاۋمەن جارىق كورگەن ەنتسيكلوپەديا استانا قالاسىنداعى ءدىني بىرلەستىكتەردىڭ تاريحى مەن كۋلتتىك تاجىريبەسى تۋرالى ماعلۇمات قامتىلعان ەڭ العاشقى بىرىگەي ەڭبەك سانالادى. سوندىقتان استانا قالاسى اكىمىنىڭ ورىنباسارى ەسەت بايكەن دە وسى جيناقتىڭ مازمۇنىنا از-كەم توقتالدى.
– جىل باسىندا ءدىن ىستەرى باسقارماسىمەن كەڭەسىپ, ەلوردانىڭ شيرەك عاسىرىندا استانالىقتارعا قانداي دۇنيە ۇسىنامىز دەپ ويلادىق. اقىلداسا كەلە وسى ەنتسيكلوپەديانى جارىققا شىعارۋدى قولعا الدىق. ەلوردادا 14 ءدىني كونفەسسيا مەن 57 ءدىني بىرلەستىك ەل ەگەمەندىگىن العان تۇستان بەرىگە دەيىن ءوزىنىڭ دارا جولىن قالىپتاستىردى. وسى جەتىستىكتەردى بۇگىن تۇساۋىن كەسىپ وتىرعان جيناقتا كورسەتۋگە تىرىستىق. «ەلوردانىڭ ءدىني نىساندارى» ەنتسيكلوپەدياسى جانە ءدىني ساۋات اشاتىن كىتاپتار ەلوردالىقتارعا ولجا بولسىن, – دەدى ە.بايكەن.
جيناق 16 تاراۋدان تۇرادى. اربىرىندە ەلوردانىڭ ءدىني كونفەسسيالارى تۋرالى ماعلۇمات تۇگەندەلگەن. تۇساۋى كەسىلگەن كىتاپتاردىڭ ءمان-ماڭىزى تۋرالى «قازاق گازەتتەرى» جشس ديرەكتورى ديحان قامزابەك ۇلى بىلاي دەدى:
– بۇگىن تاعىلىمدى كىتاپتار بارشاعا وي سالىپ وتىر. ءبىرىنشى – تاريحقا بارلاۋ, ەكىنشى – بۇگىنىمىزدى ايقىنداپ الۋ, ءۇشىنشى – وسى كىتاپتىڭ شەڭبەرىندە قوعاممەن بايلانىستى قالاي نىعايتامىز دەگەن ماسەلە توڭىرەگەنىدەگى پايىم. قالانىڭ تاريحىنا زەر سالساق, اۋەلى ءبىزدىڭ مىڭ جىلدىق جولىمىز, بوزوق قالاشىعى, ەسىلدىڭ بويىنداعى قالا, قونىستاردان باستاۋ الادى. بۇل – دالانىڭ تاريحى. ال بۇگىن تۇساۋى كەسىلىپ جاتقان جيناقتا اقمولا استانا بولعان تۇستان بەرگى ىزدەنىستەر, عيماراتتار قامتىلعانىن مازمۇنىنان اڭعاردىق. ەنتسيكلوپەديامەن قاتار ءدىنتانۋشىلاردىڭ ءتورت ەڭبەگى دە ماڭىزدى. ءبىز ءدىن تۋرالى ۇعىمىمىزدى ناقتىلايتىن, جۇيەلەيتىن كەزەڭدە تۇرمىز. لايىم, بۇگىنگى كىتاپتاردىڭ وقىرمانى كوپ بولسىن.
سالتاناتتى جيىنعا كەلگەن قوناقتار تاريحي كەزەڭدە تۇساۋى كەسىلىپ جاتقان كىتاپتار ەلگە كەڭ تاراپ, زەردەلى وقىرمانىن تاپسىن دەگەن جىلى لەبىزىن ءبىلدىرىپ, قۇتتى بولسىن دەستى.
