13 شىلدەدە تۇركىستان وبلىسىنىڭ سارىاعاش اۋدانىندا زورلىقپەن ءولىم بەلگىلەرى بار كىشكەنتاي قىزدىڭ ءمايىتى تابىلعانى بەلگىلى.
سول كۇنى پوليتسيا قىزمەتكەرلەرىمەن وسى قىلمىستى جاسادى دەگەن كۇدىكپەن بۇرىن بىرنەشە رەت سوتتالعان اۋدان تۇرعىنى گ. ۇستالىپ, ۋۇي-نا قاماۋعا الىندى.
وسى فاكت بويىنشا قىلمىستىق كودەكستىڭ 99-بابىنىڭ 3-بولىگى (جاس بالانى ءولتىرۋ) بويىنشا سوتقا دەيىنگى تەرگەپ-تەكسەرۋ باستالدى.
«مەملەكەت باسشىسىنىڭ تاپسىرماسى بويىنشا بولعان وقيعانىڭ بارلىق ءمان-جايلارى انىقتالىپ جاتىر. كۇدىكتى گ. 2006 جىلى ادام ولتىرگەنى ءۇشىن 10 جىلعا باس بوستاندىعىنان ايىرۋ جازاسىنا سوتتالعانى انىقتالدى. 2023 جىلدىڭ مامىرىندا گ. الكوگولدىك ىشىمدىك ءىشۋ بارىسىندا ورىن العان جانجالدا اۋىلداسىن بالتامەن ۇرعانى ءۇشىن سوتتالعان. سوت گ. جابىرلەنۋشىمەن تاتۋلاسقانىن جانە ونىڭ بۇرىنعى سوتتىلىعى وتەلگەنىن ەسكەرە وتىرىپ, وعان پروباتسيالىق باقىلاۋ بەلگىلەي وتىرىپ, 3 جىل باس بوستاندىعىن شەكتەۋ تاعايىنداعان», دەپ حابارلادى ۆەدومستۆو.
باس پروكۋراتۋرا اتالعان ۇكىمگە جازانى قاتاڭداتۋ جانە باس بوستاندىعىنان ايىرۋدى تاعايىنداۋ تۋرالى كاسساتسيالىق نارازىلىق كەلتىردى.
پروباتسيالىق باقىلاۋدا بولعان گ. اسا اۋىر قىلمىس جاساعانىن ەسكەرە وتىرىپ, پروباتسيا قىزمەتىنىڭ قىزمەتكەرلەرىنە قاتىستى سالعىرتتىق فاكتىسى بويىنشا سوتقا دەيىنگى تەرگەپ-تەكسەرۋ باستالدى.
پرەزيدەنتتىڭ تاپسىرماسىنا سايكەس جەكە ادامعا قارسى اسا قاۋىپتى قىلمىستار ءۇشىن قىلمىستىق جاۋاپكەرشىلىكتى كۇشەيتۋگە باعىتتالعان زاڭنامالىق تۇزەتۋلەر توپتاماسى ازىرلەنۋدە.
وسى قىلمىستار بويىنشا سانكتسيالاردى قايتا قاراۋ, جازالاردى تاعايىنداۋ جانە ودان بوساتۋ, سوتتىلىعىن وتەۋ ءتارتىبىن, جەكە ادامعا قارسى اۋىر جانە اسا اۋىر قىلمىستار ءۇشىن جازاسىن وتەپ جاتقان ادامدارعا اكىمشىلىك قاداعالاۋدى بەلگىلەۋ شارتتارىن وزگەرتۋ ماسەلەلەرى پىسىقتالۋدا.
قىلمىستىق ءىستى تەرگەپ-تەكسەرۋ بارىسى باس پروكۋروردىڭ جەكە باقىلاۋىنا الىندى.
