وزدەرىڭىز بىلەتىندەي, زاڭسىز الىنعان اكتيۆتەردى قايتارۋ ۇدەرىسى وتكەن جىلى باستالعان ەدى. بىلتىر زاڭسىز يەمدەنىلگەن جانە ەل اۋماعىنان شىعارىلعان 600 ميلليارد تەڭگەدەن استام اكتيۆ مەملەكەتكە قايتارىلدى.
جاڭا زاڭ بۇل جۇمىستىڭ تيىمدىلىگىن ارتتىرىپ قانا قويماي, قوعام الدىنداعى اشىقتىقتى قامتاماسىز ەتۋگە مول مۇمكىندىك بەرەدى. وسى ورايدا, اكتيۆتەردى قايتارۋ جونىندەگى ارنايى كوميسسيا قۇرىلىپ, ونىڭ قۇرامىنا ۋاكىلەتتى ورگانداردىڭ وكىلدەرى, قوعام بەلسەندىلەرى, حالىق قالاۋلىلارى كىرەتىنىن دە ايتا كەتكىم كەلەدى.
بۇعان قوسا, جاڭا قۇجاتتا اكتيۆتەردى ەرىكتى تۇردە نەمەسە ماجبۇرلەپ قايتارۋدىڭ زاڭنامالىق قۇرالدارى ايقىندالدى. بۇل – بىرقاتار مەملەكەتتىك قۇرىلىمدى تارتۋدى تالاپ ەتەتىن اۋقىمدى جۇمىس.
زاڭ جوباسىن ازىرلەۋ كەزىندە ءماجىلىس دەپۋتاتتارى الەمنىڭ وزىق تاجىريبەسىنە سۇيەندى. اكتيۆتەردىڭ قوماقتى بولىگى وزگە مەملەكەتتەردە بولۋى مۇمكىن ەكەنىن ەسكەرە وتىرىپ, شەتەلدىك ورگاندارمەن ىنتىماقتاستىق تەتىكتەرى قاراستىرىلدى. بۇل قادام اكتيۆتەردى ەلگە قايتارۋ كەزىندە ءوزارا ءتيىمدى ءارى جەدەل ءىس-قيمىل جۇرگىزۋگە مۇمكىندىك بەرەدى. زاڭ ەڭ الدىمەن ءىرى سىبايلاس جەمقورلىق سۋبەكتىلەرىنە جانە وليگوپوليالىق توپتارعا قولدانىلاتىنىن ەرەكشە اتاپ وتكىم كەلەدى.
بىلتىر مەملەكەت باسشىسى اكتيۆتەردى ەلگە قايتارۋ جۇمىسى ادىلدىك ورناتۋعا ىقپال ەتەتىنىن اتاپ وتكەن ەدى. بۇل قۇقىقتىق اكتى زاڭسىز بايۋدىڭ سەبەبى مەن ءمان-جايىن جويۋدىڭ بەرىك نەگىزى بولادى. مەملەكەتكە قايتارىلعان اكتيۆتەر الەۋمەتتىك جانە ەكونوميكالىق جوبالاردى قارجىلاندىراتىن ارنايى قورعا قۇيىلادى.
حالىقتىڭ اۋزىنان جىرىپ, مەملەكەتتىڭ قورجىنىنا قول سۇققان ادامداردىڭ ايلا-شارعىسى ماڭگى جالعاسا بەرمەيدى. «ۇرلىق ءتۇبى – قورلىق». جالعىز اقيقات – وسى. قايتارىلعان قازىنا ەڭ الدىمەن ەل يگىلىگىنە جۇمسالادى. ادال ءومىر سۇرە بىلەيىك. ادىلەتتى قازاقستاندى قۇرۋ ىسىنە بىرىگىپ اتسالىسايىق.
ەلنۇر بەيسەنباەۆ,
ءماجىلىس دەپۋتاتى
