وڭىردە دەنساۋلىق ساقتاۋ, پەداگوگيكا, ءدىن, مادەنيەت جانە قۇرىلىس سالالارى بويىنشا مامان تاپشى. اسىرەسە دارىگەر ماماندار جەتىسپەيدى. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ابدراحمانوۆانىڭ ايتۋىنشا, ءدال قازىر وبلىستا 247 مامان-دارىگەردىڭ ورنى بوس تۇر. سونىڭ ىشىندە جالپى تاجىريبەلىك دارىگەرلەر, انەستەزيولوگتەر, اكۋشەر-گينەكولوگتەر جەتىسپەيدى.
ارينە, ءوڭىردى قاجەتتى ماماندارمەن قامتاماسىز ەتۋ ءۇشىن جان-جاقتى, جوسپارلى شارالار جۇرگىزىلەدى. سونىڭ ءبىرى – جەرگىلىكتى بيۋدجەت قاراجاتى ەسەبىنەن ءبىلىم بەرۋ گرانتتارىن تاعايىنداۋ. جەرگىلىكتى بيۋدجەت قاراجاتى ەسەبىنەن وڭىردەگى ءتۇرلى باسقارمالاردىڭ سۇرانىسىن ەسكەرە وتىرىپ, 2017 جىلى – 190 گرانت, 2018 جىلى – 96 گرانت, 2020 جىلى – 48 گرانت, 2021 جىلى – 90 گرانت, 2022 جىلى 114 گرانت بولىنگەن ەكەن.
– 2023 جىلعا ءبىلىم گرانتتارىن بەلگىلەۋگە ءبىزدىڭ باسقارما وبلىس بويىنشا قاجەتتى ماماندىقتارعا تاپسىرىس جيناقتادى. قازىرگى تاڭدا قاجەتتىلىك 86 «باكالاۆر», 55 «رەزيدەنتۋرا», بارلىعى 141 ماماندى قۇراپ وتىر, – دەيدى وبلىستىق ءبىلىم باسقارماسىنىڭ باسشىسى ايگۇل مىڭباەۆا. بۇل گرانتتاردىڭ 60-ى – مەديتسينا سالاسىنا, 10-ى – ماتەماتيكا ءپانىنىڭ مۇعالىمى, 3-ءۋى – لوگوپەد-پەداگوگ, 3-ءۋى – تيفلوپەداگوگ, 3-ءۋى – سۋردوپەداگوگ, 3-ءۋى – وليگوفرەنوپەداگوگ ماماندىعىنا, 4-ەۋى قۇرىلىس سالاسىنا بەرىلمەك.
ارينە, بۇل مەملەكەتتىك ءبىلىم گرانتىنا قول جەتكىزە الماي قالعان تۇلەكتەر ءۇشىن اجەپتاۋىر كومەك. بۇل گرانتقا كوپبالالى نەمەسە كەمىندە ءۇش جىل تولىق ەمەس وتباسى مارتەبەسى بار وتباسىلارداعى بالالار, بالا كەزىنەن مۇگەدەكتەر, ءبىرىنشى جانە ەكىنشى توپتارداعى مۇگەدەكتەردى تاربيەلەپ وتىرعان وتباسىلاردىڭ بالالارى باسىمدىقپەن قول جەتكىزبەك. «وبلىس اكىمىنىڭ گرانتىنا» يە بولعان ستۋدەنت جەرگىلىكتى اتقارۋشى ورگانمەن جانە جوعارى وقۋ ورنىمەن ءۇش جاقتى شارتقا وتىرىپ, ديپلوم العان سوڭ 5 جىل بويى وبلىستا جۇمىس ىستەۋگە مىندەتتى. ال ديپلوم الۋعا جەتپەي وقۋدان شىعىپ كەتكەن جاعدايدا وقۋعا جۇمسالعان قارجى مەن شاكىرتاقى وبلىستىق بيۋدجەتكە قايتارىلادى.
وبلىس اسىرەسە دارىگەرلەرگە مۇقتاج دەدىك قوي. وزگە وڭىرلەردەن مەديتسينا ماماندارىن تارتۋ ءۇشىن گرانتتان بولەك, ءبىر جولعى كوتەرمەاقى تولەۋ ماسەلەسىن دە وبلىستىق ءماسليحات دەپۋتاتتارى قولداپ, ارنايى شەشىم شىعارعان بولاتىن. ياعني بۇرىن اۋىلدىق ەلدى مەكەندەرگە بارىپ, قىزمەتكە كىرىسكەن جاس ماماندارعا 1 ملن تەڭگە كولەمىندە ءبىر جولعى كوتەرمەاقى بەرىلسە, بيىلدان باستاپ وبلىس ورتالىعىنان 500 شاقىرىم قاشىقتىقتاعى بوكەي ورداسى, جانىبەك اۋداندارىنا قىزمەتكە باراتىن ماماندارعا 5 ملن تەڭگە كوتەرمەاقى بەرىلەدى. ال ورال قالاسىنان 250 شاقىرىمداعى اۋىلعا بارىپ ەڭبەك ەتسە, 2,5 ملن تەڭگە, شاھارعا جاقىن ماڭداعى بايتەرەك, تەرەكتى, تاسقالا اۋداندارعا باراتىن ماماندارعا 1,5 ملن تەڭگە كوتەرمەاقى ۇسىنىلادى. قالادا جۇمىسقا ورنالاسۋشىلارعا 1 ملن تەڭگە كولەمىندە كوتەرمەاقى قاراستىرىلعان جانە تۇرعىن ۇيمەن قامتاماسىز ەتىلەدى.
باتىس قازاقستان وبلىسى
