ءاليحان سمايىلوۆتىڭ ايتۋىنشا, باتىس ءوڭىرىنىڭ ەنەرگەتيكا جۇيەسىنىڭ جاي-كۇيىنە جاسالعان اۋقىمدى تالداۋ ناتيجەسىندە ەنەرگەتيكا كاسىپورىندارىنىڭ جۇمىسىندا بىرقاتار كەمشىلىك جىبەرىلگەنى انىقتالدى. بۇدان بولەك, ەنەرگەتيكا مينيسترلىگىنىڭ, «KEGOC» اق, «ماەك» جشس جانە «قازمۇنايگاز» ۇك» اق جۇمىسىندا ولقىلىقتار بار ەكەنى ءمالىم بولدى.
«قازمۇنايگاز» ۇك» اق باسقارما توراعاسى ماعزۇم مىرزاعاليەۆكە مۇناي وڭدەۋ زاۋىتىنىڭ قاۋىپسىز جانە تۇراقتى جۇمىسىن قامتاماسىز ەتۋ شارالارىن ۋاقتىلى جۇزەگە اسىرماعانى ءۇشىن سوگىس بەرىلەدى.
بۇدان بولەك, باتىس ەنەرگيا تورابىنىڭ قاۋىپسىزدىگىنە ءتيىستى دەڭگەيدە باقىلاۋ جاساماعانى ءۇشىن ەنەرگەتيكا ۆيتسە-ءمينيسترى جاندوس نۇرماعانبەتوۆكە سوگىس جاريالاۋ تۋرالى شەشىم قابىلداندى. سونداي-اق «ماەك» جشس, ءاموز, «KEGOC» اق باسشىلارى مەن لاۋازىمدى تۇلعالارىنا قاتىستى اكىمشىلىك سيپاتتاعى شارالار قولدانىلادى.
ۇكىمەت كەلەشەكتە مۇنداي داعدارىس جاعدايلارىنا جول بەرمەۋ ءۇشىن ماڭعىستاۋ اتوم ەنەرگەتيكالىق كومبيناتىنا جاڭعىرتۋ جانە كۇردەلى جوندەۋ جۇرگىزۋ, باتىس ەنەرگەتيكالىق ايماعىن كۇشەيتۋ, اتىراۋ مۇناي وڭدەۋ زاۋىتىن سىرتقى ەلەكتر قۋاتىمەن تۇراقتى قامتاماسىز ەتۋ جانە سول جەردە ءوزىن-ءوزى ەنەرگيامەن قامتاماسىز ەتەتىن ستانسا سالۋ, باتىس ايماعىن قازاقستاننىڭ بىرىڭعاي ەلەكترەنەرگەتيكالىق جۇيەسىنە قوسۋ جۇمىستارىن جانە باسقا دا بىرقاتار شۇعىل جانە جۇيەلى شارالاردى جۇزەگە اسىرادى.
سونىمەن قاتار مەملەكەت باسشىسىنا ۆەگەتاتسيالىق كەزەڭى سۋ تاپشىلىعى جاعدايىندا ءوتىپ جاتقان وڭتۇستىك وڭىرلەردى سۋمەن قامتاماسىز ەتۋ ماسەلەسى تۋرالى مالىمەت بەرىلدى. وسىعان بايلانىستى ۇكىمەت پەن جەرگىلىكتى اتقارۋشى ورگاندار قاجەتتى شارالار قابىلداپ جاتىر. اتاپ ايتقاندا, سۋمەن قامتاماسىز ەتۋ ءۇشىن سۋارمالى اۋىل شارۋاشىلىعى داقىلدارىنىڭ قايسىسىنا باسىمدىق بەرىلەتىنى انىقتالادى, سۋاينالىم ءادىسى قولدانىلادى. بۇدان بولەك, سۋ ۇنەمدەۋ تەحنولوگياسىن ەنگىزۋ جۇمىستارى بەلسەندى جۇزەگە اسىرىلۋدا. ارنالارداعى سۋ شىعىنىن ازايتۋ جانە جيناقتالاتىن سۋ مولشەرىن كوبەيتۋ ءۇشىن گيدروتەحنيكالىق قۇرىلىستارعا كۇردەلى جوندەۋ جۇمىستارى جۇرگىزىلىپ جاتىر.
سونداي-اق پرەمەر-مينيستر ءاليحان سمايىلوۆ ء«تاريفتى ينۆەستيتسياعا ايىرباستاۋ» باعدارلاماسىن جۇزەگە اسىرۋعا, كوممۋنالدىق ينفراقۇرىلىمدى جاڭعىرتۋعا جانە كيىكتەر پوپۋلياتسياسىن ورنىقتى باسقارۋعا قاتىستى قابىلدانىپ جاتقان شارالار جونىندە باياندادى.
