نۇرلان جاقىپوۆتىڭ ويىنشا, «روساتوممەن» نەمەسە باسقا دا كومپانيامەن كەلىسسوز جۇرگىزبەس بۇرىن قازاقستاندا اتوم ەلەكتر ستانساسىن سالۋ نەمەسە سالماۋ جونىندە ناقتى شەشىم قابىلداۋ قاجەت.
«بۇل ەلەكتر ەنەرگياسىنىڭ اقىسىن كىم تولەيدى؟ ءبىز بە, الدە بالالارىمىز با؟!. ولارعا نە قالدىرامىز؟ بۇل ماسەلە توڭىرەگىندە جان-جاقتى تالداۋ جاساپ, ەڭ وڭتايلى جولداردى ويلاستىرۋ كەرەك», دەدى نۇرلان جاقىپوۆ.
وسى تۇستا قور توراعاسى اەس سالىناتىن جەر تۋرالى ءبىراز سۇراقتار تۋىنداپ جاتقانىن العا تارتىپ, سول جەرگە ەكولوگيا جانە سۋمەن جابدىقتاۋعا قاتىستى بىرقاتار تالاپ قويىلاتىنىن ەسكەردى.
«اەس سالۋعا قويىلاتىن تالاپتاردىڭ ءبىرى – ۇلكەن سۋ قويماسىنىڭ بولۋى. ەكولوگيا جاعىن بىلە بەرمەيمىن, بىراق مەن ەسەپتەردى وقىپ ءجۇرمىن. كاسپي قازىردىڭ وزىندە تارتىلىپ جاتىر, بالقاش تا تايازدانىپ بارادى. بىرەۋىن تاڭداپ, اتوم ەلەكتر ستانتسياسىن سالىپ, 10 جىلدان كەيىن سۋ تاعى 10 مەترگە تارتىلاتىن بولسا, نە بولماق؟ ءبىز كۇن سايىن وزگەرىپ جاتقان زاماندا جۇمىس ىستەپ وتىرمىز. دارۆين ايتقانداي, ەڭ كۇشتىلەر ەمەس, ەڭ جىلدام بەيىمدەلەتىندەر امان قالادى. وعان قوسا, جەرگىلىكتى تۇرعىندار تاراپىنان ءالى دە سۇراقتار بار. بۇيىرىندە اەس جۇمىس ىستەپ تۇراتىنىنا ءبارى بىردەي دايىن ەمەس. سوندىقتان بىرقاتار سۇراققا سالماقتى جاۋاپ ىزدەپ, ءتيىمدى شەشىم قابىلداۋىمىز كەرەك», دەپ تۇيىندەدى نۇرلان جاقىپوۆ.
