بۇگىندە اۋىل شارۋاشىلىعى وندىرۋشىلەرى ەگىس جۇمىستارىنا ميلليونداعان قاراجات سالادى. ءوز الاڭدارىن اقبوكەندەردەن قورعاۋ ءۇشىن كاسىپكەرلەر تۇراقتى كەزەكشىلىك ۇيىمداستىرۋعا ءماجبۇر. مۇنى ىستەۋ ءۇشىن ولار جەكە كولىك, ادامداردى ءبولۋى كەرەك. بۇل فەرمەرلەر ءۇشىن قوسىمشا شىعىن مەن قارجىلاي جۇكتەمە ەكەنى بەلگىلى.
ايتا كەتسەك, قازاقستاندا اقبوكەندەردى اۋلاۋعا تىيىم سالىنعان. ويتكەنى كيەلى جانۋار يۋنەسكو-نىڭ قورعاۋىنا الىنعان.
«اتامەكەن» ۇكپ ءباسپاسوز قىزمەتى حابارلاعانداي, فەرمەرلەر ەگىستەردى قىزىل كىتاپقا ەنگەن جانۋاردىڭ شابۋىلىنان دا ساقتاندىرا المايدى, ويتكەنى بۇگىندە مۇنداي ساقتاندىرۋ ءتۇرى جوق.
بۇل رەتتە, اۋىل شارۋاشىلىعى وندىرۋشىلەرىنىڭ قارجى ينستيتۋتتارى الدىندا اعىمداعى نەسيەلىك مىندەتتەمەلەرى بار. ۋاكىلەتتى ورگانداردىڭ ارەكەتسىزدىگى كەزىندە بۇل فەرمەرلەردىڭ قارجىلىق جاعدايىن ودان ءارى ناشارلاتۋى مۇمكىن.
وتكەن جىلى وبلىستىڭ اۋىل شارۋاشىلىعى تاۋارىن وندىرۋشىلەر جالپى الىمدا دا, ماتەريالدىق تۇرعىدا دا ۇلكەن شىعىنعا ۇشىرادى. اقبوكەندەردىڭ اۋىل شارۋاشىلىعى داقىلدارىن بۇلدىرۋىنەن كەلتىرىلگەن زالال 8 ملرد تەڭگەدەن استى (1 گا ءۇشىن 55 مىڭ تەڭگە ەسەبىنەن). ماسەلەن, ەگىندىكول اۋدانىندا 45 مىڭ گەكتاردان استام, استراحان اۋدانىندا – 22 مىڭ گەكتاردان استام, جاقسى اۋدانىندا – 19 مىڭ گەكتارعا جۋىق, جارقايىڭ اۋدانىندا – 10 مىڭ گەكتارعا جۋىق ەگىس القابى ءب ۇلىندى.
جارقايىڭ اۋدانىنداعى ەڭ ءىرى شارۋا قوجالىقتىڭ يەسى تەمىرحان جانگەلديننىڭ ايتۋىنشا, بيىل اقبوكەندەر ودان دا كوپ.
«ولاردىڭ تارالۋ ايماعى ارتتى, اقبوكەندەر ءبىزدىڭ اۋداننىڭ اۋماعىنا ەتەنە ەندى. ءبىز ۆاگونداردى قورشاۋ الاڭدارىنا قويامىز, كۆادروتسيكلداردى ساتىپ الدىق, جانۋارلاردى ايداۋ ءۇشىن ادامداردى جالدايمىز, بىراق ناتيجە جوق. بۇل جاعدايدى قۇرعاقشىلىق تا ناشارلاتىپ وتىر. ول داقىلدارعا اسەر ەتەدى, ال اقبوكەندەر ونسىز دا ءالسىز داقىلدى تاپتاپ جاتىر», دەپ شاعىمداندى فەرمەر.
اقمولا وبلىسىنىڭ كاسىپكەرلەر پالاتاسىنىڭ ساراپشىلارى بىرقاتار ۇسىنىس جاسادى. اتاپ ايتقاندا, ۋاكىلەتتى ورگاندار, «وحوتزووپروم» ءوب» رمقك مامانداندىرىلعان ۇيىمىنىڭ كۇشىمەن اقبوكەندەردىڭ سانىن رەتتەۋدى ۇسىندى.
«اقبوكەندەردىڭ كوشى-قونى جولىندا مامانداندىرىلعان جەم-ءشوپ الاڭدارىن انىقتاۋ بويىنشا جۇمىستى جولعا قويۋ, قورشاۋدى دايىنداۋ جانە ورناتۋ ءۇشىن رەسپۋبليكالىق بيۋدجەتتەن قاراجات كوزدەۋ قاجەت. سونداي-اق ورتالىق دەڭگەيدە اقبوكەندەردىڭ كەلتىرگەن زالالىن باعالاۋ ءۇشىن قۇزىرەتتى مەملەكەتتىك ورگانداردىڭ وكىلدەرى مەن تاۋەلسىز ساراپشىلار قاتارىنان كوميسسيا قۇرۋ, زالالدى وتەۋ ءۇشىن مەملەكەتتىك قازىنادان قاراجات ءبولۋ مۇمكىندىگىن قاراستىرۋ قاجەت», دەپ سانايدى وڭىرلىك كاسىپكەرلەر پالاتاسىنىڭ اوك ءبولىمىنىڭ باستىعى جايسان بەكقوجين.
