پرەزيدەنت قول قويعان «ونلاين-پلاتفورمالار جانە ونلاين-جارناما تۋرالى» زاڭ – بۇگىنگى قوعام ءۇشىن وتە قاجەت قۇجات. نەگىزى بۇدان ەرتەرەك قابىلدانۋى كەرەك ەدى.
مەن وسى زاڭعا قاتىستى ەكى وي ايتار ەدىم. بىرىنشىدەن, ارينە, بۇل ينتەرنەتتە, ونىڭ ىشىندە الەۋمەتتىك جەلىلەردە بەلگىلى ءبىر جاۋاپكەرشىلىكتىڭ تۋىنداۋىنا اسەر ەتەدى. ەندى جەلى قولدانۋشىلارى جاۋاپسىزدىققا باس ۇرىپ, ويىنا كەلگەنىن جازىپ, جالعان اقپاراتتار مەن زياندى مالىمەتتەردى تاراتا بەرمەيدى. ءبىر-ءبىرىنىڭ ار-نامىسىنا نۇقسان كەلتىرەتىن, ۇلتارالىق, دىنارالىق ارازدىقتى قوزدىراتىن ادامداردىڭ ارەكەتىنە توسقاۋىل قوياتىنداي زاڭنىڭ ماڭىزى زور. ءبىر سوزبەن ايتقاندا, قوعامنىڭ اقپارات ايدىنى زيانكەس سوزدەر مەن كورىنىستەن تازارادى دەپ ويلايمىن.
ەكىنشىدەن, ەندى بۇل زاڭ قالاي جۇمىس ىستەيدى؟ الەۋمەتتىك جەلىلەردە وتىرعان مىڭداعان ادامنىڭ ءبارىن كىم باقىلايدى, زاڭ بۇزعانداردى قالاي جاۋاپقا تارتامىز؟ وسى جاعى شەشىلدى مە؟ مەنىڭ ويىمشا, قازىرگى كۇنى ىشكى ىستەر ورگاندارىندا ينتەرنەتتەگى جالعان اقپارات تاراتۋشىلار مەن قارجى پيراميدالارىن ۇيىمداستىرۋشىلار سەكىلدى زاڭ اياسىندا جاۋاپقا تارتىلۋعا ءتيىس ادامداردىڭ ءبارىن انىقتاپ, جازا قولدانۋعا مۇمكىندىكتەرى جوق. بۇنى بىلاي قويعاندا, ءتارتىپ ساقشىلارى ۇرلىق-قارلىق پەن ادام ءولتىرۋ سەكىلدى قىلمىستاردىڭ ءبارىن بىردەي اشا الماي وتىر. ەندى ولارعا جەلىدە زاڭ بۇزعانداردى جاۋاپقا تارتۋدى جۇكتەيتىن بولسا, پوليتسيا قىزمەتكەرلەرى ونىڭ بارىنە قالاي ۇلگەرەدى؟
سوندىقتان, مەنىڭشە, ىشكى ىستەر مينيسترلىگىنە قوسىمشا قاراجات ءبولىنىپ, بارلىق ايماقتا وسى جاڭا زاڭ اياسىندا جۇمىس ىستەيتىن ارنايى بولىمشەلەر نەمەسە توپتار قۇرىلۋعا ءتيىس. ياعني پوليتسيانىڭ الەۋەتىن ارتتىرۋ قاجەت. ويتكەنى زاڭ ىسكە قوسىلعاننان كەيىن ىشكى ىستەر ورگاندارىنا جالعان اقپارات تاراتۋ, ار-نامىسقا ءتىل تيگىزۋ, ت.ب. بويىنشا ارىزدار كوپتەپ تۇسە باستايدى. پوليتسيا قىزمەتكەرلەرى ولاردىڭ 10 پايىزىن عانا قاراپ, جاۋاپقا تارتۋعا مۇمكىندىگى جەتەر. ال قالعانى جاۋاپكەرشىلىكتەن قۇتىلىپ كەتۋى مۇمكىن. سودان كەيىن حالىقتا زاڭعا جانە مەملەكەتتىك ورگاندارعا دەگەن سەنىمسىزدىك پايدا بولادى. «بالەنشە بلوگەر ءبىر ءسوزى ءۇشىن ءىستى بولدى, ال تۇگەنشە بلوگەر نەگە جاۋاپقا تارتىلمايدى؟» دەگەن زاڭدى سۇراقتار تۋىندايدى. بۇل زاڭ حالىقتىڭ بيلىك ورگاندارىنا دەگەن سەنىمىن ارتتىرۋعا ءتيىس.
تاڭىربەرگەن بەردوڭعار,
قوعام قايراتكەرى, بلوگەر
