قازاق دالاسىنا جاڭالىق الا كەلگەن الىپ تەمىرجولدىڭ قۇرىلىسى جىلدارعا سوزىلدى. ارقاسىن ات تۇياعىنان باسقا تاپتاماعان سالقار مەكەندى سان كۇيگە بولەگەن بۇل شويىنجولعا مىڭداعان ەڭبەك ادامىنىڭ تەرى ءسىڭدى. مۋزەيدە ورىن العان مىنا ءبىر ەكسپوزيتسياعا ەڭبەككەرلەردىڭ قۇرىلىس كەزىندە تۇتىنعان تەمىر شامدارى قويىلىپتى. وعان قوسا العاشقى رەلس رەتىندە توسەلگەن شويىن تەمىردىڭ بولشەگى دە تاريحقا اينالعان وتكەن كەزەڭدەردىڭ جارقىن كورىنىسىنە ساپار شەكتىرەدى. مۋزەي قىزمەتكەرى ابادان تىلەۋبەرگەنوۆا بۇل بۇيىمدارعا كەلۋشىلەردىڭ ىنتا-ىقىلاسى ەرەكشە ەكەنىن ايتادى.
«تۇركىستان-ءسىبىر تەمىرجولى ورتالىق ازيا مەن ءسىبىردى بايلانىستىرۋ ءۇشىن سالىنعان كسرو-داعى ءىرى ماگيسترالدىڭ ءبىرى. تەمىرجول قۇرىلىسى ءبىر مەزەتتە سولتۇستىكتە سەمەي جانە وڭتۇستىكتە لۋگوۆوي بەكەتتەرىنەن باستالىپ, 1442 شاقىرىمدىق جول 1930 جىلى اينابۇلاق بەكەتىندە ءتۇيىستى. تۇركسىب تەمىرجولىنىڭ جولاۋشىلار تاسىمالدايتىن باعىتتارى بويىنشا بەلگىلەنگەن كەستەگە سايكەس الماتى-1 تەمىرجول بەكەتىنىڭ كاسساسى دا ارنايى ينستاللياتسيا ارقىلى كورەرمەنگە ۇسىنىلعان. دالا وركەنيەتىندەگى ايتۋلى وزگەرىس بىرقاتار شىعارماشىلىق يەلەرىن تەرەڭ شابىتقا بولەدى», دەيدى ول.
قازاق بەينەلەۋ ونەرىنىڭ زاڭعارى ءابىلحان قاستەەۆ تە العاشقى ەڭبەك جولىن ءداپ وسى تەمىرجول قۇرىلىسىنىڭ اينابۇلاق بەكەتىندە جەر قازۋشى بولىپ باستادى. كۇندەردىڭ كۇنى توسىن سىيى كوپ تىرشىلىك كوكىرەگىندە قايناپ جاتقان تالانت بۇلاعىنىڭ باعىتىن ۇلكەن ارناعا بۇرىپ, ۇلى دارىن تۋعان توپىراعىنا قۇبىلىس بولىپ كەلگەن الىپ تەمىرجولدى كۇرەكپەن ەمەس, قىلقالاممەن سالىپ شىقتى. كەيىن ونىڭ ايگىلى «تۇركسىب» شىعارماسى قازاق تەمىرجولىنىڭ پاسپورتىنا اينالدى. تۇركسىب تەمىرجولىنىڭ قۇرىلىسىنا قاتىستى كوپتەگەن قىزىقتى دەرەك بار. ون مىڭنان استام ادام جىلدار بويى تىنىمسىز ەڭبەك ەتكەن تەمىرجول قۇرىلىسىندا تۇرار رىسقۇلوۆ پەن مۇحامەدجان تىنىشباەۆتىڭ ءرولى ەرەكشە.
الماتى
