جالپى, كوزىقاراقتى قاۋىم امانگەلدى باتىردىڭ بيىك تۇلعاسىن اتاقتى حالىق سۋرەتشىسى ءابىلحان قاستەەۆتىڭ ايشىقتى سومداعان پورترەتى ارقىلى جاقسى بىلەدى. ال ءبىز اڭگىمە ەتىپ وتىرعان سۋرەتتەگى باتىر بەينەسىن كورنەكتى قىلقالام شەبەرى نيكولاي كرۋتيلنيكوۆ بەدەرلەپتى.
قوستاناي وبلىستىق تاريحي-ولكەتانۋ مۋزەيىنىڭ باسشىسى باتىرحان جۇمابايدىڭ ايتۋىنشا, بۇل جۇمىس 1956 جىلى ۇلت-ازاتتىق كوتەرىلىستىڭ 40 جىلدىعىنا وراي سالىنعان. سول كەزدە ونى قازاق مەملەكەتتىك باسپاسى 15 مىڭ دانامەن باسىپ شىعارعان.
– بۇل كارتينا 1956 جىلى وتكەن كورمەگە ءبىر رەت قويىلعان. ودان كەيىن ەشقايدا ۇسىنىلماعان. جەتپىس جىلعا جۋىق قوردا ساقتاۋلى تۇر. بيىل امانگەلدى يمانوۆتىڭ 150 جىلدىعىنا بايلانىستى ءىس-شارا وتكىزەتىن بولدىق. سوندا اتالعان كوتەرىلىسكە قاتىستى قورداعى جادىگەرلەر تىزىمىنەن وسى سۋرەتتى كوردىم. ءوزىم دە تاڭعالدىم. قۇندى ەكسپونات. ونى استانادا وتكەن باتىردىڭ مەرەيتويىنا ارنالعان كورمەگە دە اپاردىق. جۇرت قىزىعا كوردى. بۇل ءبىزدىڭ مۋزەي ءۇشىن دە ءبىر جاڭالىق بولدى, – دەدى ول.
اۆتور ءوز ەڭبەگىندە باتىردىڭ ءور رۋحىن كەلىستى كوركەمدەگەن. قاباعى قاتۋ, ءجۇزى سۇستى. الىسقا كوز تىككەن جانارىنان وتتى كورەسىز. ءبىر قاراعاندا, سۋرەتشى بۇعان 1938 جىلى تۇسىرىلگەن «امانگەلدى» فيلمىندەگى باس سارداردى سومداعان ەلۋباي ومىرزاقوۆقا ۇقسايتىن كەيبىر دەتال مەن شتريحتاردى شەبەر پايدالانعان سەكىلدى. دەگەنمەن مازمۇندى دۇنيەنىڭ حالىق باتىرىنا قاتىستى جادىگەرلەردىڭ ىشىندە الار ءوز ورنى بار.
ال ەندى نيكولاي كرۋتيلنيكوۆ كىم دەگەنگە كەلەيىك. ول – وتاندىق بەينەلەۋ ونەرىنىڭ دامۋىنا زور ۇلەس قوسقان تۇلعا. قازاقستاننىڭ حالىق سۋرەتشىسى. رەسەيدە كىندىك قانى تامعانىمەن, بار سانالى ءومىرى قازاق جەرىندە وتكەن. 1921-1924 جىلدارى سەمەي تەاترىندا سۋرەتشى, سودان كەيىن سەمەيدەگى كوركەمسۋرەت ستۋدياسىنىڭ جەتەكشىسى بولعان. 1928 جىلى ەلىمىزدەگى العاشقى ۇيىمداستىرىلعان كوشپەلى سۋرەت كورمەسىنە بەلسەنە اتسالىسقان. ودان سوڭ الماتى كوركەمسۋرەت ۋچيليششەسىندە ۇستازدىق قىزمەت اتقارعان. ونەرتانۋشىلار قىلقالام شەبەرىنىڭ تانىمال تۇلعالاردىڭ پورترەتتەرى مەن ەڭبەك ادامدارى تۋرالى توپتاما سۋرەتتەرىن جوعارى باعالاعان.
