كوكشەتاۋ قالالىق سوتىنىڭ ءباسپاسوز قىزمەتى جاريالاعان اقپاراتقا سايكەس, كاسىپكەر اسا ءىرى كولەمدە الاياقتىق جاساعانى ءۇشىن, ال شەنەۋنىك الاياقتىققا قاتىسقانى ءۇشىن سوتتالدى.
انىقتالعانداي, كاسىپكەر مەن دەنساۋلىق ساقتاۋ باسقارماسىنىڭ بۇرىنعى باسشىسى جەكە قىلمىستىق ءىس بويىنشا تەرگەلىپ جاتقان ءۇشىنشى تۇلعامەن قىلمىستىق كەلىسىمگە كەلگەن. ولار 2017 جىلى بۋراباي اۋدانىنداعى دەنساۋلىق ساقتاۋ نىساندارىن سەنىمگەرلىك باسقارۋعا بەرۋ تۋرالى كەلىسىمگە قول قويعان.
شارت بويىنشا «اۆيتسەننا – بۋراباي» جشس ستاندارتتار مەن تەحنيكالىق شارتتارعا, ساپا كورسەتكىشتەرىنە جانە نورماتيۆتىك قۇقىقتىق اكتىلەرگە سايكەس كەلەتىن جاڭا مەديتسينالىق جابدىقتاردى ساتىپ الۋعا مىندەتتەلگەن. ءىس جۇزىندە كاسىپورىن ساپاسىز مەديتسينالىق قۇرال-جابدىقتاردى جەتكىزىپ, ءبىر ميلليارد تەڭگەدەن استام قارجىنى يەمدەنگەن.
«كاسىپكەر اسا ءىرى كولەمدە الاياقتىق جاسادى (قىلمىستىق كودەكستىڭ 190-بابىنىڭ 4-بولىگى, 2-تارماعى), لاۋازىمدى تۇلعا الاياقتىققا قاتىسقان (قىلمىستىق كودەكستىڭ 28-بابىنىڭ 5-بولىگى, 190-بابىنىڭ 4-بولىگىنىڭ 2-تارماعى). ولاردىڭ كىناسى كۋالار مەن جابىرلەنۋشى تاراپتىڭ ايعاقتارىمەن, سوت-مەديتسينالىق ساراپتامالاردىڭ قورىتىندىلارىمەن راستالادى. جازا تاعايىنداۋ كەزىندە سوت سوتتالۋشىلار لاۋازىمدى تۇلعا بولا تۇرا, انت بەرىپ, قىزمەتتىك بابىن پايدالانىپ, قىلمىس جاساعانىن, ماتەريالدىق زالالدى وتەمەگەنى سياقتى اۋىرلاتاتىن ءمان-جايلاردى ەسكەردى», دەلىنگەن سوت حابارلاماسىندا.
ەكى ايىپتالۋشى دا توعىز جىلعا سوتتالدى. كاسىپكەردىڭ كولىگى تاركىلەندى.
